Xornadas Abertas de Teoloxía

O 14 de marzo comezaron as Xornadas Abertas de Teoloxía coa conferencia “Os desafíos da corrección política para a liberdade” a cargo do profesor da Universidade CEU Cardenal Herrera (Elxe – Alacante) Higinio Marín Pedreño. Tras ofrecer unha perspectica histórica para ver o que é novo e o que non, explicou que na actualidade a corrección política vai máis alá dunhas restriccións sociais sobre o que se pode facer e o que se pode dicir. Dixo Higino Marín que alcanza “unhas dimensións sociais que implican un status informal pero efectivo de confesionalismo e polo tanto a asunción dun punto de vista particular que informa o ordenamento legal e institucional dun país e o contido do aceptable e do non aceptable na conducta dos seus cidadáns que moi singularmente está promovido por unha nova élite que ten unhas características moi particulares: forma parte dun cosmopolitismo globalizado, hipertecnolóxico, promovido por persoas con posicións económicas moi influentes que se capilarizan en cada un dos países. E esas restriccións teñen un alcance capilar que afecta á conducta cotiá de persoas no desempeño profesional, nos seus círculos sociais”

Entre os días 14 e 16 de marzo, o Seminario, o Instituto Teolóxico Lucense e o Instituto Superior de Ciencias Relixiosas organizan as Xornadas Abertas de Teoloxía. Esta 36ª edición desenvólvese no Salón Rexio do Círculo das Artes ás 20 h co título “Os desafíos da corrección política”.

Luns 14

Conferencia: “Os desafíos da corrección política para a liberdade”

Relator: D. Higinio Marín Pedreño.

Doutor en Filosofía, profesor da Universidade CEU Cardenal Herrera (Elxe – Alacante). É autor, entre outros, dos seguintes libros: Civismo y ciudadanía, Mundus: una arqueología filosófica de la existencia, Entre dichos: ensayos sobre la ciudadanía, El hombre y sus alrededores: estudios de filosofía del hombre y de la cultura, Teoría de la cordura.

Martes 15

Conferencia: “Os desafíos da corrección política para a persoa e a familia”

Relatora: Dna. María Lacalle. Vicerreitora da Universidade Francisco de Vitoria (Madrid). Algúns dos seus libros: En defensa de la vida humana, La persona como sujeto del derecho, Introducción a la teología, En busca de la unidad del saber, Mujeres en la encrucijada de la fe.

Mércores 16

Conferencia: “Corrección política e evanxelización”

Relator: Mons. D. Luis Argüello. Bispo Auxiliar de Valladolid e Secretario Xeral da Conferencia Episcopal Española. Participou nos seguintes libros: Derecho y literatura en la novela de Miguel Delibes, La Ley Orgánica de Libertad Religiosa (1980-2020), Lux aeterna, Actas del VI Congreso Nacional de Cofradías, Hospitales.

As XXXV Xornadas Abertas de Teoloxía concluíron o 10 de marzo co relatorio do bispo de Lugo, Mons. Alfonso Carrasco, titulado “Cremos na resurrección da carne”

 Mons. Alfonso Carrasco sinalou que “do testemuño da resurrección de Cristo pende a nosa esperanza e en realidade toda a nosa fe en Deus, do que comprendemos así que non nos abandona. Porque Xesucristo, pasando da morte á vida, non nos deixou atrás a nós e a este mundo que poderiamos dicir traidor, que o traizoara, para ir a terras e ceos máis felices. Non resucitou para quedar só senón para ben de todos como o primoxénito…. A resurrección da nosa carne será froito da incorporación ao Corpo de Cristo, dunha participación, dunha unidade con El que ten a súa expresión histórica nos sacramentos”.

Mons. Alfonso Carrasco repasou algunhas perspectivas non cristiás da morte:

– Están os que identifican glorificación da humanidade cunha conclusión do progreso humano

– A perspectiva helenística (hoxe representada por quen fala de mitos gnósticos) ve a alma nunha prisión corporal

– Os desinteresados polo destino da alma trala morte consideran como único importante o mundo terreal

– Os crentes na reencarnación, algo nada esperanzador, pois nin unha nin mil reencarnacións abondarían para alcanzar a salvación.

– Outra perspectiva non cristiá é a de quen ve a morte como aniquilamento de alma e corpo

Tamén advertiu Mons. Alfonso Carrasco tanto sobre as ideoloxías para as cales este mundo non vale nada como aqueloutras que, divinizando o mundo, convérteno no único horizonte da vida humana.

O 9 marzo o Bispo de Tortosa, Mons. Enrique Benavent, interveu a través de videoconferencia na segunda sesión das Xornadas Abertas de Teoloxía

 Comezou sinalando Mons. Enrique Benavent que no trasfondo dos números 15-18 da instrucción pastoral Un Dios de vivos está o debate sobre o tema da resurrección. Mentres que a cristoloxía clásica fixaba a súa mirada na encarnación, na redención por medio da cruz, a cristoloxía das últimas décadas puxo no centro do debate a resurrección e ao mesmo tempo houbo unha eséxese crítica. Mons. Enrique Benavent referiuse a dúas obras –Ser cristiano de Hans Küng e Jesús, la Historia de un Viviente de Edward Schillebeeckx- e comentou que as explicacións de ambos non axudan a superar todas as cuestións que suscitan os textos bíblicos. No fondo queren explicar a resurrección de Xesucristo reconstruíndo o proceso que vivirían os apóstolos (conversión, vocación) para chegar á convicción de que Cristo estaba vivo. Küng e Schillebeeckx pregúntanse pola orixe da fe pascual, pero unha teoloxía que explique plenamente o contido da fe na resurrección de Xesucristo non pode conformarse so coa pregunta sobre o proceso vivido polos discípulos, hai que preguntarse polo fundamento da fe. A vida dos discípulos cambiou totalmente ata o punto de que estaban dispostos a dar a súa vida por testemuñar a verdade do acontecemento da resurrección.

Tamén sinalou Mons. Enrique Benavent que hai fundamentalmente dúas manifestacións comprobadas sobre a resurrección de Xesucristo: o achado do sepulcro baleiro, que é un signo esencial, e a aparición de Cristo aos discípulos trala súa resurrección.

O Vicario Xeral da Arquidiocese de Oviedo, Jorge Juan Fernández Sangrador, inaugurou o 8 de marzo no Círculo das Artes de Lugo as XXXV Xornadas Abertas de Teoloxía tratando sobre a percepción da morte no noso tempo.

Comezou falando de 6 tendencias emerxentes que teñen a súa particular visión da morte: transhumanismo, animalismo, neurocientismo, ideoloxía de xénero, pensamento débil e emerxentismo. Unha das diferencias coa escatoloxía cristiá é que nesta non haberá resurrección da carne ata que esteamos todos, mentres que nas outras escatoloxías pesa máis o individualismo.

Tamén se referiu Jorge Juan Fernández Sangrador ás crenzas que subxacen na contorna da alta tecnoloxía (Palo Alto, Silicon Valley): “todo o que se pensa, pode facerse” é o seu mantra, sen pararse a pensar nos porqués. Pero a grandeza do ser humano reside no feito de dar sentido ao que fai.

Outro tema tratado foi o da ética e a intelixencia artificial, poñendo como casos os de robots que atenden a anciáns nas súas casas, ou mesmo robots usados no ámbito relixioso (Mindar, Bless U-2).

Finalmente presentáronse experiencias de persoas transformadas no terreo espiritual a partir da audición de certos temas musicais: Erik Varden, García Morente, Paul Claudel.