paz

Eucaristía pola paz en Lalín

O venres, 4 de marzo, ás 20 horas, na igrexa parroquial de Lalín, celebrarase unha Eucaristía pola paz ante o ataque militar contra Ucraína.
Na celebración participarán cidadáns ucraínos e rusos residentes nas comarcas de Deza e Tabeirós-Terra de Montes. Ademais, a colecta que se faga durante a mesma destinarase a Cáritas Ucraína, respondendo así á petición feita polo bispo de Lugo, Mons. Alfonso Carrasco: “Dada a situación que viven as xentes a consecuencia da guerra, ofrezamos a nosa axuda a través de Cáritas en Ucraína. É un signo de apertura ao próximo e ás súas necesidades, pero tamén de conversión de todas as cobizas e os odios, que impiden a paz.”.

O papa Francisco pide unha xornada de oración pola paz en Ucraína o 26 de xaneiro

O domingo 23 de xaneiro, despois do rezo do Ángelus, o Papa Francisco expresou a súa preocupación ante as crecentes tensións en Ucraína». Como xesto concreto de proximidade espiritual, o Santo Padre propuxo realizar unha xornada de oración para invocar a paz neste país o mércores 26 de xaneiro.
«Sigo con preocupación as crecentes tensións que ameazan con asestar un novo golpe á paz en Ucraína e pon en dúbida a seguridade do continente europeo, con repercusións aínda máis vastas. Fago un chamamento sincero a todas as persoas de boa vontade para que recen a Deus Todopoderoso para que todas as accións e iniciativas políticas estean ao servizo da fraternidade humana e non de intereses partidistas», dixo o Papa

2021 Ano Internacional da Paz e a Confianza

Nacións Unidas declarou 2021 Ano Internacional da Paz e a Confianza; con iso pretende mobilizar esforzos para promover a paz e a confianza entre as nacións sobre a base, entre outras cousas, do diálogo político, o entendemento mutuo e a cooperación, a fin de lograr unha paz, unha solidariedade e unha harmonía sustentables. 

Unha vida autenticamente humana é posible grazas á confianza, a pensar que non van ser defraudadas as expectativas que teñamos sobre algo, especialmente sobre o que fagan as outras persoas.

Para que haxa confianza, ten que haber respecto, e así tamén temos unha das bases da paz.

A confianza mantense e aumenta se está acompañada de xestos amistosos, de tolerancia, de simpatía, de cordialidade e, sobre todo, se a confianza é correspondida con confianza.

Polo contrario, debilítase a confianza se hai silencios, reservas, dúbidas… e todo iso alimentaría o conflito.

Cando está a punto de perder a paz, é boa a confianza en organismos supranacionais, pois o ideal é que as partes en conflito confíen en que a institución pacificadora actuará con xustiza.

Rezar un minuto pola paz o 8 de xuño

O Papa Francisco convida os fieis de todo o mundo a participar o martes 8 de xuño ás 13 horas da iniciativa de oración “Un minuto pola paz”, que neste ano 2021 está adicada a orar por Terra Santa e polo país asiático de Myanmar.

En Terra Santa o conflito bélico entre Israel e Hamás agudizouse en maio. É considerado o peor que houbo desde 2014.

En diversas zonas de Myanmar hai enfrontamentos entre o exército nacional e os grupos de resistencia, desde o golpe militar do 1 de febreiro de 2021.

Segundo Acción Católica “Un minuto pola paz” é unha proposta simple, masiva, testemuñal para ofrecer a oración e asumirnos como promotores de paz.

“Un minuto pola paz” naceu o ano do histórico encontro entre o Papa Francisco e os presidentes de Israel e Palestina, nos xardíns do Vaticano en 2014, como signo de esperanza que hoxe segue reclamando acordos de paz.

Un minuto pola paz o sábado 8 de xuño ás 13 h

A iniciativa Un minuto pola paz foi lanzada polo Foro Internacional de Acción Católica (FIAC), a Acción Católica Arxentina, a Acción Católica Italiana, a Unión Mundial de Organizacións de Mulleres Católicas (UMOFC) e outras asociacións.

A data lembra a reunión para invocar a paz promovida polo Papa Francisco o 8 de xuño de 2014 nos Xardíns do Vaticano xunto co Presidente de Israel naquel entón Shimon Peres, o Presidente Palestino Abu Mazen e o Patriarca de Constantinopla, Bartolomeu I.

Os promotores desta acción buscan motivar a todos aqueles que teñen a paz no corazón, involucrando a todas as persoas que coñecemos en tantos contextos da vida.

Esta semana o Santo Padre invitou a que se dedique o 8 de xuño ás 13 h “un minuto á paz, de oración, aos crentes; de reflexión, para quen non cren; todos xuntos por un mundo máis fraterno”.

A %d blogueros les gusta esto: