A comunidade de Misioneiras Eucarísticas de Nazaret de Lugo organizou varios actos de acción de grazas polos 100 anos de existencia da Congregación. O mesmo día no que se cumpría o centenario, o 3 de maio, na igrexa de San Froilán o Sr. Bispo Mons. Alfonso Carrasco presidiu unha Eucaristía. Estiveron presentes sacerdotes da Diocese de Lugo e doutras dioceses veciñas, membros de distintas ramas da Familia Eucarística Reparadora, doutras congregacións, fregueses, amigos…
Na homilía, Mons. Alfonso Carrasco considerou “un inmenso privilexio que poidamos participar neste momento histórico do centenario da fundación por San Manuel González desta congregación adicada á presenza eucarística do Señor. Seguíase o modelo daquelas persoas que estiveron ao pé da Cruz, que dalgún xeito salvaron a nosa dignidade como xénero humano. San Manuel contemplaba o misterio da Eucaristía cando o seu corazón quedou conmovido definitivamente”.
Desde hai tres anos están en Lugo as Misioneiras Eucarísticas de Nazaret, irmás Esther Herrero e Mónica Maldonado, que promoven a lectio divina na Catedral, a formación de grupos eucarísticos, a motivación para a oración, colaboran na Delegación de Catequese.
