misión en Lugo

O mércores 14 no Museo Provincial Yolanda Ferrer ofreceu unha conferencia titulada “Espera un milagre”. É unha frase que un día Vicente Ferrer e a súa esposa atoparon pintada nunha parede.

Ata o 18 de outubro, hai no Museo Provincial unha exposición de fotografías feitas por Yolanda Ferrer en Anantapur. Alí coñeceu a obra da Fundación Vicente Ferrer e agora Yolanda é a súa representante na Coruña. Estes actos organízaos a Delegación de Misións con motivo da Xornada do DOMUND (18 de outubro).

A Delegación de Misións programou o 7 de outubro unha conferencia de D. Santiago Agrelo, arcebispo de Tánger, que realiza o seu labor pastoral na fronteira tanto con cristiáns como con musulmáns.

D. Santiago Agrelo, sinalou que África é o continente máis rico pero o que ten máis pobres. Algúns deles inician un periplo, en condicións espantosas, fuxindo da súa situación. Ante isto, en Europa hai autoridades civís, eclesiásticas, e tamén cidadáns, que só ven cuestións técnicas (cámaras de vixilancia, reconducir fluxos migratorios…). Pero os cristiáns non debemos poñer o centro na técnica senón no corazón. Desde a Revelación, desde o Evanxeo, máis que falar de inmigración, hai que falar de persoas, ante as que non podemos mostrarnos indiferentes, senón ser xustos, compasivos e hospitalarios.

Fronte á indiferencia, Santiago Agrelo invitou a ter estoutras actitudes: “Nunca veremos aos pobres se neles non nos vemos a nós mesmos”, “espero que na fronteira, á luz da fe, nos confundan cos pobres”.

Con motivo da Xornada do DOMUND, a Delegación de Misións invita a ver unha exposición na 2ª planta do Museo Provincial ata o 18 de outubro. Son fotografías feitas por Yolanda Ferrer (na imaxe superior), representante da Fundación Vicente Ferrer. Trátase de mostrar unha cidade do sureste da India – Anantapur- coñecida como “cidade do infinito”. Nela habita unha das comunidades tamén máis pobres e excluídas do sistema de castas indio, os dálits ou intocables e os grupos tribais. 

Preto de 30 fotografías compoñen esta exposición, instantáneas que van acompañadas de comentarios e reflexións da propia autora.

O martes 6 de outubro ás 19:00 h. será a inauguración e a autora ofrecerá unha conferencia o día 14 ás 19 h, que se titulará “ESPERA UN MILAGRE”.

O misioneiro xaveriano Rolando Ruiz Durán falou o día 18 de maio no Seminario de dous documentos da Conferencia Episcopal: “Actualidade da misión ad gentes en España hoxe” e “Orientacións sobre a cooperación misioneira entre as igrexas para as dioceses de España”. Para Rolando, o dinamismo misioneiro dos fieis é signo de madurez e a dimensión misioneira revitaliza toda a acción pastoral. Tamén resulta positivo entrar en contacto cos territorios de misión, sendo un exemplo disto a viaxe que fixo o Papa emérito Benedito XVI a África: cambiou a súa visión eurocéntrica que tiña os primeiros anos do seu pontificado.

 Con este acto concluían as tres xornadas de animación misioneira que veu realizando a Delegación Diocesana de Misións.