Lvcensia

O mércores 25 de maio presentouse no salón de actos do Seminario o número 64 da revista Lvcensia. O acto estivo presentado por Luis Varela e o director da publicación, Gonzalo Fraga encargouse de dar a coñecer os contidos.

Interveu Lois Ladra, autor no número que se presenta dun traballo titulado “O adiviñanceiro popular do Corgo”. Na súa intervención explicou que “ademais de revisar todas as fontes documentais, fontes escritas tanto inéditas como publicadas, tamén temos que contar co traballo do alumnado dos centros escolares. É un traballo libre, voluntario e extraacadémico. Quen quere apúntase e cubre uns cuestionarios. O tempo no que estivemos encerrados vímolo como unha oportunidade para facilitar o comunicación entre pais, fillos e netos e facer a recollida nos anos 2021 e 2022. O traballo realizado pode usarse como base para unha proposta didáctica para os centros de ensino primario e secundario. E tamén se trata de que o material quede rexistrado no 2022 e non se perda nun futuro”.

Pechou o acto o Vicario Xeral da Diocese, Mario Vázquez, que transmitiu unhas verbas de alento “ao Consello de Redacción de Lvcensia, aos asesores e a todos os colaboradores, para que non decaia tan inxente labor de investigación e tanto esforzo realizado durante 32 anos. Somos xa, por Lvcensia, membros dunha comunidade perseverante que non cansa de traballar e loitar pola cultura local. Isto é, sen dúbida, un dos mellores xeitos de entender a cultura universal e a pluralidade. Os lectores deste número fará gozar cos retazos da historia da cidade, da provincia, da Diocese”.

O 25 de maio na aula Magna do Seminario Diocesano de Lugo preséntase o número 64 da revista Lvcensia. O acto estará presidido polo Vicario Xeral da Diocese, Mario Vázquez Carballo, e polo director da publicación, Gonzalo Fraga Vázquez.

O colaborador convidado ao devandito acto será o antropólogo Lois Ladra que dará a coñecer unha recompilación de adiviñas tradicionais recollidas no concello do Corgo. Trátase dun rico patrimonio cultural inmaterial que se poderá utilizar como ferramenta de referencia para transmitilo, e evitar así que desapareza.

Entre os artigos publicados neste número abórdase, unha vez máis, a pervivencia da vía romana XIX na historia, pois xogou un papel importante na comunicación de Cervantes co Bierzo e o interior de Lugo. Feito que condicionou a implantación de grandes centros eclesiásticos como foron os mosteiros de Samos e Penamaior e os bispos de Lugo e León, e a conversión do mosteiro berciano de Carracedo no principal propietario da zona.

Outro artigo describe e analiza a facenda señorial da Casa de Lemos a finais da Idade Moderna apoiándose en documentos inéditos conservados no Arquivo Histórico Nacional que permiten estudar tanto a tipoloxía fiscal, como a capacidade produtiva dun dos espazos administrativos dos que o conde extraía as súas rendas en Galicia.

Preséntase ademais unha cronoloxía dos bispos lucenses do século VIII que aborda a historia de Lugo na primeira metade dese século e a figura de Odoario “o africano”. Fraga Vázquez fala neste número da historia da procesión do Corpus en Lugo con datos desde finais do s. XVI até o primeiro cuarto do s. XX. Molejón Rañón escribe a historia da Banda de Música Municipal de Lugo. O profesor Blanco Prado escribe sobre os etnorituais e ofrendas no Santuario Mariano dos Remedios no Alto do César en Sarria.

Con motivo da restauración da vidreira do Museo Provincial de Lugo, Aurelia Balseiro explica a intervención levada a cabo estudando a técnica e soporte empregados, así como os elementos máis representativos, tal é o caso do escudo da Deputación e o cáliz coa Sacra Forma, lembrando o antigo privilexio da catedral lucense consistente na exposición permanente e pública do Santísimo Sacramento.

García Porral e Ramón Balado recuperan o vocabulario zoolóxico recollido por Francisco Javier Rodríguez no primeiro Dicionario Galego-Castelán.

A revista Lvcensia, publicación da Biblioteca do Seminario Diocesano, ofrece no número 61 temas variados, como corresponde á súa condición de miscelánea. Temática variada pero toda referente a temas ou personaxes relacionados con Lugo. Este número de Lvcensia sae puntualmente, fiel á súa cita de outono, aínda que sen a presentación oficial que soía facerse.

Con motivo do trinta aniversario da publicación, Adolfo de Abel Vilela, asiduo colaborador da revista desde os seus inicios, presenta un resumo do que foi Lvcensia estes anos. Outro artigo trata sobre a presenza de Galicia en publicacións de Madrid e Cataluña, por parte do profesor César Camoira Vega. Concepción Fernández, profesora da Universidade de Santiago de Compostela, realiza un estudo pormenorizado do Acróstico de Odoario. Aurelia Balseiro lembra a figura do primeiro director do Museo Provincial de Lugo, Luís López-Martí. Outros temas de interese son as biografías de Frei Antonio Vázquez, por parte de José M. Pascual e do Padre Manuel Carreira Vérez, astrofísico falecido este ano e con raíces en Vilalba, estudo de Carlos Viscasillas. A historia da Schola Cantorum do Seminario é abordada por José Molejón, os curas e curatos do antigo arciprestado de Luaces, por Óscar G. Murado e un estudo sobre a cultura do café, por Ángeles Miranda.