Vida e actualidade da Diocese de Lugo
A Congregación para o Culto Divino e a Disciplina dos Sacramentos no Vaticano, emitiu un decreto no que, seguindo a vontade do Papa Francisco, establece que a memoria litúrxica de Santa María Madalena que se celebra o 22 de xullo, pase a ter rango de festa. A Misa contará cun prefacio propio.
O 21 de xuño, o Delegado de Liturxia José Antonio Ferreiro fixo a presentación do novo Leccionario no marco dunha sesión formativa organizada pola parroquia de San Francisco Xavier.
José Antonio explicou a distribución das lecturas, feita desde a persoa de Cristo, porque interpretamos por exemplo o Antigo Testamento a partir do misterio pascual (morte, paixón e resurrección de Xesucristo e doazón do Espírito Santo).
Tamén recordou que a celebración litúrxica é un acto de culto a Deus (algo que non sempre se ten presente) e que coa proclamación da Palabra, é Deus mesmo quen se está dirixindo ao pobo (daí a actitude que se debe adoptar, a postura de pé, as palabras coas que a asamblea responde).
O texto que se le pode ser o mesmo nunha voda e nun funeral, pero resoa de distinta maneira. Tamén hai textos do Antigo Testamento que nun primeiro momento nos poden botar para atrás, pero debemos contextualizalos e mesmo aplicalos á nosa vida. Se na lectura se describe o abuso dun poderoso…, pensemos se nós, na nosa medida, debemos cambiar algo equivalente.
José Antonio Ferreiro presentou a nova edición do Leccionario: os cambios na presentación, na tradución. Sobre isto último sinalou que segue sendo válida a tradución que xa estamos a usar nas nosas biblias, textos catequéticos…, só que eses cambios serán incorporados ás novas publicacións que se fagan de catecismos.