Hospitalidade de Lourdes

A Hospitalidade Diocesana Nosa Señora de Lourdes de Lugo realizou o día 25 de outubro, unha convivencia-reunión en Meira. Presididos polo Vicario Xeral da Diocese de Lugo, Mario Vázquez Carballo, participaron os membros da Xunta Directiva e os responsables e corresponsables de todas as zonas da diocese lucense. Aprobaron o calendario de actividades do ano 2014, centrado nas peregrinacións diocesanas a Lourdes e Fátima, e a novena da Nosa Señora de Lourdes.

Tras unha visita guiada ao conxunto histórico da Igrexa Monasterial de Santa María de Meira, o alcalde da vila dirixiu unhas atentas palabras de benvida no Salón de Plenos, lugar onde se celebraron as reunións. A última hora da mañá, tivo lugar unha Eucaristía na igrexa parroquial, concelebrada por doce sacerdotes. Xa pola tarde, percorréronse os arredores (Pedregal de Irimia, a Fonte Miñá, o Castro de Viladonga). 

Na peregrinación diocesana a Lourdes (1-5 de xullo) participaron un total de 642 peregrinos, acompañados de 28 sacerdotes e os 18 compoñentes da Xunta Directiva da Hospitalidade, que viaxaron en doce autobuses. Os peregrinos participantes eran: enfermos, persoal sanitario, hospitalarios e peregrinos, todos eles socios desta Hospitalidade diocesana.

Convén destacar a nutrida representación xuvenil que acompañou este ano a peregrinación, composta por 23 nenos e mozos. A peregrinación lucense foi a máis numerosa de todas cantas acudiron a Lourdes ao longo da primeira semana de xullo e unha das poucas que non suspenderon a súa viaxe, debido aos gravísimos danos ocasionados durante as recentes inundacións, que manteñen pechadas ou a medio uso boa parte das súas igrexas e instalacións, así como numerosos hoteis da localidade.

A peregrinación estivo presidida polo novo Vicario Xeral da Diocese de Lugo, D. José Mario Vázquez Carballo.

O día 11 de febreiro, a partir das 4,30 da tarde, terá lugar na Casa Diocesana de Exercicios de Lugo, a Asemblea-convivencia da Hospitalidade de Lourdes. Algúns actos son os seguintes:

• Reflexión Mariana, co título do lema do ano 2.013: “Lourdes, unha porta da Fe”, a cargo da Dra. Ana María Fedormo Murado, médico en Navia de Suarna e peregrina na última peregrinación a Lourdes.

• Información do pasado curso e programación do curso actual.

• Vivencias ou resonancias persoais dos participantes.

Ás 19h, será a Eucaristía.

Ese día é unha oportunidade de reencontrarse; compartir cos compañeiros peregrinos; estar ao día da marcha da Hospitalidade.

Ademais, nese día ábrese a inscrición para a Peregrinación a Lourdes.