formación

Os días 8 e 9 de novembro hai un curso sobre acompañamento psicolóxico e espiritual adecuado ás persoas que sofren a síndrome post-aborto. Diríxese a sacerdotes e colaboradores do Centro de Orientación Familiar Diocesano para crear unha rede que ofreza un lugar de esperanza, reconciliación e sanación ante o drama do aborto.

Este curso, denominado “Proxecto Raquel”, xurdiu hai máis de 20 anos en EEUU, e alí está moi implantado. Tamén está presente en 20 dioceses españolas, incorporándose no último trimestre Barcelona, Xaén, Cádiz, Tarragona e Lugo.

Imparten o curso en Lugo Dª María José Mansilla e o Rvdo. D. Jesús Chavarría Ibáñez. María José Mansilla preside Spei Mater (Asociación Provida da Igrexa Católica) e imparte cursos en España, EEUU e América Latina.

O P. Jesús Chavarría é Director Espiritual de Spei Mater, sacerdote da Diocese de Calahorra e a Calzada-Logroño.

Carlos Díaz estivo o día 28 no Colexio Divina Pastora de Lugo, onde foi presentado polo Delegado de Cáritas, Antón Negro. Na súa conferencia, Carlos Díaz transformou a coñecida frase de Descartes nestoutra: “Son amado, logo existo”. Porque o importante é saber dicir “ti” co corazón, e unha persoa xorde á vida persoal cando é amada. Tamén explicou Carlos Díaz o que é o personalismo comunitario: non se trata dun “eu” que se abre a un “ti”, pois desde que nacemos estamos abertos aos demais. Cantas máis persoas deixamos de abrazar, menos boa xente somos e menos grazas podemos dar a Deus. Sobre todo cando sabemos que hai persoas que non teñen un “ti” onde caerse mortas; esas persoas están agardándonos. Non somos Deus, pero fagamos o que poidamos.

O próximo venres, día 25, ás sete da tarde no Seminario Diocesano de Lugo, reanúdanse os cursos bíblicos. A este período 2013 – 2104 corresponde o tema dos evanxeos. Están organizados polo Movemento Bíblico Lucense.

Non é necesario inscribirse, abonda con presentarse o mencionado día 25 ás sete no Seminario.

Este ano o tema da VIII Xornada Diocesana de Liturxia responde ao interrogante de como se celebra a misa. Para desenvolver o tema, a Delegación de Liturxia acudiu ao reitor do Seminario de Girona, Jordi Font i Plana.

A xornada, dividida en dúas sesións, comezou ás 10.15 pola mañá. Pola tarde ás catro e media. Temas: partes da misa, xestos e signos, actitudes para vivir a Misa, sentido do canto.

O día 26 o salón de actos do Seminario acolleu unha Xornada de experiencias da reestruturación pastoral da Diocese de Lugo. Houbo un relatorio a cargo do Bispo de Lugo, D. Alfonso Carrasco “Fundamentación teolóxico pastoral da reestruturación das unidades pastorais e lugares de culto e educación na fe”. E a continuación houbo unha serie de comunicacións de experiencias prácticas pastorais dalgunhas comunidades cristiás da Diocese lucense.

Na foto (de esqda. a dta.), o vicario de coordinación pastoral, Luis Manuel Rodríguez; o Bispo de Mondoñedo, Sánchez Monge; o Bispo de Lugo e o director do Instº Teolóxico Lucense, David Gil.