Corpus

Mons. Alfonso Carrasco: “Temos un extraordinario valor porque somos inmensamente amados”

 

Corpus intervención D. Alfonso

O domingo 22 de xuño, ás 11 h na Catedral, o Bispo da Diocese, Mons. Alfonso Carrasco, presidiu a Solemne Eucaristía de Corpus.

Na súa homilía, o prelado lucense mencionou que a festividade do Corpus en Lugo “vívese de forma especial pola permanente presenza do Santísimo na nosa catedral, expresión da fe deste pobo á Eucaristía”

Facéndose eco das palabras do papa Francisco, Mons. Alfonso Carrasco, lembrounos que “se só miramos a forza ou o diñeiro, o que move este mundo, a cantos non descartaremos; non podemos guiarnos polo valor do diñeiro nin polo poder, porque iso lévanos a desprezar e minusvalorar ao próximo. Sen fe, sen saber cal é o verdadeiro valor que cada un de nós ten aos ollos do Señor, podemos caer na terrible a cultura do descarte”.

Para Mons. Alfonso Carrasco Rouco, “temos un extraordinario valor, non porque sexamos ricos ou poderosos senón porque somos inmensamente amados, e o seremos para sempre; e ninguén o poderá evitar”

“Celebrar o Corpus, – continuou o Bispo de Lugo- é lembrar que o noso Señor sacrificouse por nós; é a proclamación pública e solemne de que Deus amounos El primeiro e que estamos chamados a permanecer no seu amor”.

 

Lugo e o Corpus Christi

Desde a miña inxenuidade teño as miñas dúbidas sobre o que pasa en Lugo no mes de xuño. A conxunción de Arde Lucus e Corpus suscita algunhas sospeitas. Algo non cheira ben, e nunca mellor dito. Perdoade, pero recoñezo as miñas teimas con certos asuntos.
A Cidade do Sacramento dá a sensación de que se vai a quedar só nunha cidade común. Cambiar a Deus por nada non creo que sexa o mellor choio. Pasamos de telo todo, a quedarnos baleiros…
Vivimos nun mundo moderno, cuns avances científicos e tecnolóxicos sorprendentes, pero tamén cunha serie de problemas que non se corresponden co progreso alcanzado no último século. Non se comprenden, por tanto, os insultos, violencias, desconfianzas, mentiras, fraudes, corrupcións, divisións, envexas, guerras, mortes, moitas mortes de todo tipo… que temos que soportar todos os días.
Empeñámonos en botar fóra do quebracabezas a única peza que estivo desde o principio e que daba unha perfecta cohesión a todo o conxunto. Sen esta peza o construído por unha banda disólvese por outro… É como facer castelos de area, xa sabemos o que duran!
Un mundo que se parece a un coche de alta gama, pero que conducimos co freo de man posto e con grave perigo de incendiarse e quedar reducido a cinzas.
Celebrar o Corpus é desexar e recoñecer a presenza de Deus no mundo. Un Deus que se implica coas persoas até as últimas consecuencias, para que non quedemos reducidos a cinzas, senón que teñamos vida abundante e eterna.
Contemplar a Xesús Sacramentado na Custodia non é mirar para unha peza de museo ou unha reliquia. Prostrarnos diante de Xesús-Eucaristía é mirar ao mundo e a nós mesmos a través dos ollos de Deus, ao mesmo tempo que tamén nos sentimos mirados e queridos por El.
En Lugo temos por diante unha semana e pico para celebrar solemnemente a presenza real de Cristo na Eucaristía. Non  desaproveitemos esta oportunidade.

Na Catedral, onde está exposto permanentemente o Santísimo Sacramento, temos un faro que ilumina a toda a cidade. Non fai ruído, pero está. Non o vemos, porque nos enganan os sentidos, pero ninguén queda fóra da súa mirada infinita.

Pasamos del, pero El non pasa de nós. Menos mal!
As actividades que se organizan desde a Diocese e as parroquias axudarannos a celebrar e a recoñecer o valor deste “tesouro”.

Miguel Ángel Álvarez Pérez

Carta pastoral do señor Bispo con motivo do Corpus Christi

Queridos irmáns,

Na festividade de Corpus Christi exprésase o cumio da nosa fe. De feito, este día coroa o camiño polo que o noso Señor Xesús levou a cabo a súa obra de salvación, que, partindo do Nadal, celebramos sobre todo ao longo da Semana Santa, na Pascua de Resurrección, na Ascensión e o envío do Espírito Santo en Pentecosté. Así, grazas a El, puidemos crer de novo e verdadeiramente en Deus, na Santa Trinidade, Pai, Fillo e Espírito Santo, como celebramos o pasado domingo. Agora, na gran festa de Corpus, dicimos como nunha palabra abreviada a nosa fe, a nosa esperanza e o noso amor; profesamos firmemente que o noso Deus e Señor segue presente connosco todos os días, alimenta as nosas vidas e ábrenos un camiño novo na historia.

Dende hai moitos séculos sabemos ben en Lugo, na cidade e na Diocese, e igualmente en Galicia, que así é a nosa fe, que Xesús Sacramentado está no seu corazón, que El é a fonte de onde mana vida e amor, esperanza e paz para os homes, tamén pecadores ou necesitados.

1. Neste ano 2014 a celebración de Corpus fainos pensar especialmente na caridade, nas obras e iniciativas en que ha de expresarse o amor verdadeiro e, polo tanto, a fe cando está viva. Porque celebramos o 50º aniversario da erección da nosa Caritas diocesana por Mons. Antonio Ona de Echave, entón Bispo de Lugo. Foi un 4 de xuño, no contexto das festas de Corpus daquel ano.

Aquel xesto segue falándonos a nós hoxe coa mesma claridade de entón. Recórdanos que non diriamos a verdade se honrásemos a Xesús con xestos e palabras, pero non fixésemos caso dos seus mandamentos e das súas obras, se non procurásemos seguilo coa vida. E o seu mandamento é sempre unha novidade para nós, aínda cando sexa xa moi coñecido por todos: camiña na luz da fe quen ama aos seus irmáns e permanece na escuridade quen os odia (cf. 1Xn 2,3-11).

Ler máis

Ofrenda do Antigo Reino de Galicia a Xesús Sacramentado

Ofrenda Antigo reino de Galicia

Ás 12 da mañá do 9 de xuño comezaba na Catedral de Lugo a cerimonia da Ofrenda do Antigo Reino de Galicia ao Santísimo Sacramento. O Bispo de Tui-Vigo, Mons. Luís Quinteiro Fiuza presidiu a Eucaristía na que concelebraron Arcebispo e bispos da provincia eclesiástica galega.

Acompañaron ao delegado rexio, alcalde de Tui, os representantes das cidades do antigo Reino de Galicia: Lugo, Santiago, Betanzos, Ourense, Mondoñedo e A Coruña; así como outras autoridades civís e militares.

O delegado Rexio, o alcalde de Tui, Moisés Rodríguez Pérez, presentaba a Ofrenda ao Santísimo Sacramento en nome do Antigo Reino como vén facendo desde hai séculos.

Na súa ofrenda apelou ás raíces cristiás de Galicia e agradeceu a protección, amparo e consolo do Señor sacramentado aos que acoden a El.

O alcalde de Tui pediu ao Santísimo polos gobernantes: “para que nos ilumines para promover, fronte a unha cultura do beneficio, unha cultura da xenerosidade, de solidariedade, de comuñón da que nos deches sempre exemplo”.

Na contestación á Ofrenda, o Bispo de Tui- Vigo, Mons. Quinteiro Fiuza, agradeceu as palabras do oferente cheas de confianza cristiá e de fonda preocupación social.

Facendo alusión ao refrán que di que unha cousa é predicar e outra dar pan, Mons. Quinteiro, afirmou que “o Señor dinos que hai que predicar e tamén dar para comer. Isto é algo que a súa Igrexa non pode deixar de atender nin de vivir”. Lembrou que celebrar a Eucaristía de costas aos irmáns e aos problemas do mundo é unha incoherencia na que os cristiáns non podemos caer:

Finalizada a celebración eucarística, todas as autoridades eclesiásticas e civís saíron en procesión acompañando ao Santísimo Sacramento polas rúas de Lugo. 

Exposición e recital poético-musical de temática relixiosa

Acto poetico musicalO xoves 6 de xuño, na praza de Santa María de Lugo, poderá verse de 17 h a 20 h. a exposición “Viron e creron. A alegría de ser cristián” que a través de paneis con foto e texto fai un percorrido polos fundamentos da fe católica.

Ás 18.30 h, no mesmo lugar, terá lugar un recital de poesía e música relacionada co Corpus. A Summa poética consistirá no recitado de poemas clásicos e algún actual de temática eucarística. Na parte musical intervirá o Orfeón lucense.

A %d blogueros les gusta esto: