Corpiño

O domingo 17 de xuño, a unha semana da Coroación Pontificia da Benaventurada Virxe María do Corpiño, estivo repleto de fregueses ao longo de toda a xornada. Durante toda a mañá chegaban autobuses de diversos lugares de Galicia: Laracha, A Coruña, Porto do Son, estes últimos, acompañados do seu sacerdote, D. Ramón, o cal presidiu a Eucaristía das 12 h. A tarde non foi menos concorrida; nesta ocasión a Santa Misa presidiuna o Vicario de pastoral da Diocese de Lugo Luis Manuel Rodríguez Pérez.

Ao finalizar, tivo lugar uno dos actos máis agardados: o mestre ourive sevillano Fernando Marmolejo explicou por medio de fotos e videos, o proceso de realización da coroa da imaxe da Virxe, o cal levou seis meses. Ao final tamén houbo un tempo para preguntas por parte dos presentes, que en varias ocasións emocionáronse e iso viuse reflectido en emotivos aplausos que fixeron saltar algunha bágoa ao ourive.

Nesta presentación o máis destacable foi a implicación por parte do autor da obra para realizar a coroa, reflectindo nela todo o que rodea á Virxe e ao Santuario do Corpiño, tanto física como devocionalmente, desde os carballos ata a Custodia da Diocese de Lugo; algo que para levar a cabo motivou varios desprazamentos a Galicia.

O domingo, 10 de xuño, celebrouse o último Xubileu do Ano Santo Mariano; que foi dedicado nesta ocasión aos noivos e comprometidos e que tivo gran afluencia de fieis.

Sobre as 11:45 h atopábanse na Carballeira do Santuario o Reitor e os devotos cos peregrinos que chegaban de realizar o Camiño dos pastorciños, para impartir a bendición e iniciar a procesión cara á Porta Santa. Ás 12:00 h empezaba a Santa Misa, por todos os noivos e comprometidos. Ao finalizar impartiuse a bendición a todos os presentes.

Aínda que non hai máis xubileus programados no Santuario; todo o que queira poderá gañar o xubileu ata o domingo 24 de xuño, día en que conclúe o Ano Santo e realizarase a Coronación Pontificia da Benaventurada Virxe María do Corpiño.

Para conseguilo é necesario:

– Confesar

– Comulgar

– Rezar polas intencións do sumo Pontífice

– E orar ante a imaxe da Virxe María do Corpiño

Tamén, ata o 24 de xuño, poderán obterse os certificados de peregrino.

O domingo, 26 de maio, celebrouse o Xubileu dos nenos e mozos, que coincidiu coa celebración das Fillas de María.

Ao redor das 11:40 h o Reitor saía do Santuario para recibir aos peregrinos que chegaban de realizar o Camiño dos pastorciños acompañado dos nenos que máis tarde recitarían os poemas á Inmaculada, tras prepararse para este día durante un mes.

Na Carballeira do Santuario, agardaba tamén o grupo de gaitas “Os Trasnos de Doade”, que amenizaron a Procesión ata a Porta Santa, unha vez recibida a bendición dos peregrinos.

Sobre as 12 h comezaba a Eucaristía coa participación dos nenos. Ao finalizar a Santa Misa 14 nenos, desde os 4 ata os 11 anos, recitaron os poemas de memoria, entregando cada un, unha flor á Virxe. A continuación tivo lugar a Procesión coa Inmaculada rodeada polos nenos botando pétalos, ao mesmo tempo que desde os balcóns do Santuario, os voluntarios fixeron que fose aínda máis espectacular a Procesión coa choiva de pétalos que crearon.

Ao terminar impartiuse a bendición a todos os presentes. E o reitor, José Criado, obsequiou a cada neno cun detalle. Pola súa parte, o Coro do Santuario agardou ata o final para entoarlle feliz aniversario a un neno que nese día cumpría oito anos.

Unha vez acabada no interior a celebración, o grupo de gaitas novamente tocaba no exterior.

O Santuario do Corpiño celebrou o 20 de maio o Xubileu dos traballadores do campo, e a Festa de San Cidre, patrón dos labradores.

Sobre as 11:45 h atopábanse na Carballeira do Santuario o Reitor e os fregueses cos peregrinos que chegaban de realizar o Camiño dos pastorciños, para impartir a bendición e iniciar a procesión cara á Porta Santa, acompañada pola música do Grupo de Gaitas Vainela, de Salgueiros, Vila de Cruces.

Ás 12:00 h empezaba a Santa Misa, que contou co coro Voces da Terra como acompañamiento musical, na cal tívose presentes a todas as persoas que se dedican aos traballadores agrícolas, recordouse especialmente aos falecidos en traballos do campo.

Ao finalizar tivo lugar a procesión, nesta ocasión, coa imaxe de San Cidre Labrador, portada por unha das carrozas que os veciños da Parroquia adornaron con produtos típicos do campo.

Na Eucaristía das 18:00 h (imaxe inferior), o Delegado Episcopal de Pastoral da Saúde, Jorge Vázquez Freire, expuxo o relatorio-catequese “María, consolo na enfermidade”.

O domingo 6 de maio, tivo lugar no Santuario do Corpiño a celebración do día da Nai e o Xubileu das Nais.

Ás 11:50 h chegaban os peregrinos que realizaron o Camiño dos pastorciños á Carballeira do Santuario, onde se impartiu a bendición aos devotos, para seguidamente iniciar a peregrinación cara á Porta Santa.

Ás 12:05 h, comezaba a Eucaristía por todas as nais, con especial mención por parte do Reitor ás nais falecidas dos presentes. Ao finalizar a Eucaristía obsequiouse cunha flor a cada nai.

Ao longo do día, fregueses de diferentes puntos de Galicia, visitaron o Santuario: particulares desde Carballo, Vigo e autobuses desde Sanxenxo foron algúns dos moitos que o 6 de maio participaron nalgunha Eucaristía, aproveitando para gañar o xubileu e levarse o certificado do peregrino.

O próximo xubileu adicado a unha colectividade será o domingo 13 de maio: Xubileu das Confrarías e Irmandades.