apostolado segrar

O venres 31 de maio ás 16 h na parroquia San Francisco Xavier (Lugo) terá lugar a presentación de Frater, movemento de apostolado segrar de enfermos e discapacitados. A presentación corre a cargo de Enrique Alarcón García, que presidiu Frater e na actualidade é padre sinodal.

Frater está implantado en catro continentes e en 25 dioceses de España. A súa función principal radica no apostolado segrar, é dicir, ser membros vivos dunha Igrexa viva que sexa expresión do Pobo de Deus encarnado, e dunha maneira moi especial, entre as persoas con discapacidade e/ou grave enfermidade. Forma parte dos movementos de Acción Católica e vive intensamente a súa tarefa evanxelizadora e transformadora da realidade en comuñón eclesial.

O domingo 5 de xuño, solemnidade de Pentecoste, celébrase tamén o Día da Acción Católica e do Apostolado Segrar, co lema “Sigamos construíndo xuntos. O Espírito Santo necesítanos”. Aínda que as persoas necesitan do Espírito Santo e de todos os seus dons, o Espírito Santo tamén necesita as persoas. Cada bautizado, polo traballo da súa fe, a pertenza á Igrexa e a asunción de responsabilidades misioneiras, colaborará na construción da Igrexa. A construción da Igrexa nace do anuncio cooperativo do Evanxeo por parte do Señor e os seus discípulos. É unha acción colaborativa, comunitaria e forxadora de fraternidade. A construción require da comunicación, do mutuo entendemento e do diálogo en acción, que fornece efectos de cimentación -comuñón-, habitabilidade -participación- e crecemento -misión-.

[Materiais]

O sábado 22 de maio ás 20:30 h na parroquia de San Francisco Xavier (Lugo) celébrase a Vixilia de Pentecoste. Tratará de recoller dun xeito oracional e vivencial o camiño formativo coa Fratelli Tutti que organiza a Delegación de Apostolado Segrar de Lugo. Desde hai varias semanas a devandita Delegación vén realizando un itinerario de formación desde a Fratelli Tutti vista desde 5 claves: chamada a vivir o modelo do BO SAMARITANO; crear un modelo económico onde se busque o ben común; migrantes, un corazón aberto ao mundo; un mundo sen guerra; e diálogo e reconciliación.

Na celebración do Día do Apostolado de Segrar e da Acción Católica búscase que as mensaxes de Fratelli Tutti impulsen ao mundo laical da Igrexa que peregrina en Lugo a deixarse mover pola forza do Espírito Santo que sempre arrasa os medos e fortalece o servizo fraterno. Facer vida tendo en conta que “os soños se constrúen xuntos” desde unha Igrexa sinodal.

[Materiais]