Vida e actualidade da Diocese de Lugo
O sábado 18 de xullo a igrexa Santiago A Nova de Lugo ás 20:30 acolle un concerto conmemorativo “Camiño Primitivo de Santiago e Catedral de Lugo. Patrimonio da Humanidade”.
Actúan a Coral “Ensaio” da Escola de Música de Povoa de Varzim (Portugal) e o Quarteto Verazin. Como soprano intervén Margarida Hipólito. A dirección corre a cargo de José Abel Carriço.
O sábado 27 de xuño terá lugar en Lousada, Samos, un encontro de voluntarios e monitores da Fundación O Noso Lar. Con motivo de cumprirse 25 anos de traballo, farase balance do vivido ata agora por parte do voluntariado da zona de Samos. E comentaránse propostas de cara ao futuro, para que haxa vida no Concello. Será unha oportunidade de tomar conciencia de que puido facerse moito cando a xente colabora.
“Diferentes personalidades,
diferentes cores de pel.
Uns os luns, outros os xoves ou…
os sete días da semana.
En todo tempo.
Todos cun horizonte común.
Homes e mulleres anónimos que
sudan a camiseta polos máis”.
Voluntarios, voluntarias.
A ilustración e os versos son da autoría de Matilde Arrizado.
A parroquia lucense do Sagrado Corazón de Xesús celebrou o día 14 a Misa solemne ás 12h e de seguido a procesión. Foi posible lucrar indulxencia plenaria.
Ademais, reestreouse unha campá de 1929 que estaba nunha antiga capela que tiña a estación ferroviaria e que agora está na entrada do templo. O primeiro toque nesta segunda vida da campá deullo o sacristán Luis Alejandro Cabrerizo Rodríguez.
Calquera peregrino ou visitante que s acerque á Romaxe da Nosa Señora dos Remedios da Ermida dispón dunha completa guía que axuda a vivir o presente e o pasado da Romaxe.
Nunha primeira parte o lector ve como esa historia de fe concretouse nun patrimonio visible no templo, nos seus ornamentos, destacando o crismón.
Nunha segunda parte explícase con detalle toda a rica tradición que durante 4 séculos polo menos foi xerándose en torno á procesión da Nosa Señora dos Remedios, a peregrinación e posterior procesión coas pampórnigas a figura do meco, as cantigas, os exvotos.
E na terceira parte fálase da advocación de Nosa Señora dos Remedios e de como, a través desta festa da Nai de Deus os devotos peregrinan á Ermida, sendo postos así en relación coa historia da salvación do seu fillo.
O 1 de maio ás 12:30h en Oural, homenaxe ás nais cunha celebración eucarística presidida por Mons. Alfonso Carrasco Rouco. Será un día especial vivido desde a fe e agasallando ás nais con cariño e admiración.
O 2 de maio é a Festa dos avós das parroquias do Incio. Hai unha Eucaristía ás 13h e a continuación unha comida de confraternidade. Organizan o Concello e sacerdotes do Incio.
