Parroquias

Peregrinación a Santiago organizada pola Parroquia de San Antonio de Padua (Lugo)

A Parroquia San Antonio de Padua de Lugo organiza unha peregrinación a Santiago polo Camiño Primitivo os sábados de setembro e outubro:

2 de setembro: Lugo – San Román da Retorta

9 de setembro: San Román da Retorta – As Seixas

16 de setembro: As Seixas – Melide

23 de setembro: Melide – Arzúa

30 de setembro: Arzúa – Santa Irene

14 de outubro: Santa Irene – Monte do Gozo

15 de outubro: Monte do Gozo – Santiago de Compostela, onde se asistirá ás 12 h á Misa do Peregrino na Catedral

Cada día a saída é ás 9 h e o regreso ás 18h, excepto o 14 de outubro, que se fai pernocta no Monte do Gozo.

Mercado solidario na parroquia da Milagrosa

 

A parroquia da Milagrosa organiza un mercado benéfico entre os días 25 de agosto e 5 de setembro, de 11:30 a 13:00 e de 17:30 a 20:30; baixo o lema: Compartir fainos medrar

Con esta acción a parroquia da Milagrosa márcase varios obxectivos:

  • Recadar fondos.
  • Promover comportamentos solidarios.
  • Vencer a indiferenza.
  • Concienciar.
  • Saír do noso individualismo.

A parroquia só crece se comparte a fe e tamén o que temos -material e inmaterial- para o crecemento de todos, especialmente dos máis necesitados.

Ademais da atención semanal que se realiza os xoves no despacho parroquial, hai programas e campañas encamiñadas a emendar na medida do posible, situacións de necesidade e desamparo:

Apadriña unha familia. O obxectivo do programa é que persoas da nosa comunidade, mediante distintas formas de colaboración, creen unha rede de apoio a familias en situación de necesidade.

Grupo de Baile. Coa idea de traballar e abrir a parroquia aos máis novos, e ofrecer un lugar de entretemento máis aló das rúas do barrio.

Talleres de alfabetización en lingua castelá para que, especialmente as mulleres inmigrantes, teñan autonomía lingüística.

A parroquia da Milagrosa actualmente acolle a 150 familias en situación de necesidade que son atendidas mensualmente.

Novena na honra da Virxe do Corpiño

Horario: Novena ás 12 da mañá e ás 6 da tarde

Xoves 15 PRIMEIRO DÍA Dedicado á oración. Exposición do Santísimo en oración polas vocacións e a vida consagrada.

Venres 16. SEGUNDO DÍA Dedicado aos defuntos. Pídese polos rectores, sacerdotes e devotos da Virxe do Corpiño que faleceron.

Sábado 17. TERCEIRO DÍA Dedicado á familia, matrimonios e á vida. Bendición das familias, nais embarazadas e as que desexan ter fillos e non o logran.

Logo da Misa das 6 da tarde, procesión coa imaxe da Virxe do Corpiño

Domingo 18 CUARTO DÍA Dedicado aos nenos e aos novas

Bendición dos nenos e os mozos. Celebración do Santísimo Corpo e Sangue de Cristo. CORPUS CHRISTI. Procesión da Unidade Parroquial, co Santísimo Sacramento ás 12 h.

Luns 19 QUINTO DÍA Dedicado ao canto. Bendición dos instrumentos musicais, do coro “Nosa Señora do Corpiño” e das persoas dedicadas ao canto.

Martes 20 SEXTO DÍA Dedicado aos traballos humildes e aos traballadores. Bendición das mans, ferramentas de traballo e aos que non teñen traballo.

Mércores 21 SÉTIMO DÍA Dedicado ás persoas maiores e enfermos. Rézase polos anciáns e os enfermos. Bendición das medicinas e auga para tomalas.

Xoves 22 OITAVO DÍA Dedicado a Cáritas e aos máis necesitados: operación quilo. Cada un aporta un quilo de alimentos non perecedeiros e entréganse a Cáritas.

Venres 23. NOVENO DÍA Dedicado aos peregrinos, devotos e seguidores das redes sociais. Rézase polos devotos en xeral e en especial polos que están lonxe e seguen os actos do santuario por internet e as redes sociais.

Proxecto solidario da Parroquia San Antonio de Padua, Lugo

Caritas Parroquial de San Antonio de Padua de Lugo ten en proxecto a construción dun galiñeiro artesanal para unhas 20 galiñas. Este galiñeiro estará situado nun terreo situado en Santiago de Saamasas, nunha eira pertencente á casa de Domingo de Souto que a cede para tal fin.

OBXECTIVOS

1. Xerar recursos para a axuda solidaria ás persoas necesitadas da contorna da Parroquia.

2. Divulgar a acción solidaria que se realiza desde a Parroquia de San Antonio de Padua de Lugo.

3. Estimular iniciativas en beneficio dos desempregados e persoas que viven en precario.

4. Crear un espazo orixinal de encontro e integración para persoas que reciben axuda, no que se fomenten valores como o respecto e o esforzo.

5. Construír utilizando materiais reciclados, na medida do posible.

6. Recuperar os traballos e costumes tradicionais do mundo rural galego como medio para xerar recursos materiais e en especie.

7. Involucrar na construción do galiñeiro ao alumnado do centro escolar máis próximo.

8. Dar a coñecer este proxecto a través da venda dos ovos no mercado local ou noutro lugar adecuado.

REALIZACIÓN

Para levar a cabo este proxecto cóntase cun deseño elaborado polo alumnado do colexio Divino Mestre de Lugo. Así os estudantes coñecen de primeira man e participan activamente neste proxecto solidario. A realización concreta será os meses de setembro e outubro do presente ano 2017.

ORZAMENTO

Calcúlase un investimento total de 1000 euros.

DIVULGACIÓN

O proxecto vincúlase a un reto persoal que se levará a cabo a partir do 17 de xuño de 2017: completar en bici o Camiño de Santiago desde a cidade de Roma. Tres membros do Club Ciclista Melidense unirán dúas cidades emblemáticas, tanto pola súa historia como pola súa influencia social e cultural en occidente. Ademais, son dous destinos únicos de peregrinación. Os membros do club ciclista divulgarán a iniciativa solidaria da Parroquia de San Antonio a través dos seus contactos nas redes sociais.

Novenas en honra de Nosa Señora de Fátima

O venres día 5 comeza na Parroquia de San Pedro, Lugo, a Novena en honra de Nosa Señora de Fátima. Os actos inícianse ás 18:30 (o domingo será ás 17:30h) co rezo do santo Rosario, exercicio da Novena e celebración da Eucaristía.

O sábado 13, día da Virxe de Fátima e centenario das aparicións, ás 11h da mañá será a Misa dos Enfermos, con administración do sacramento da Santa Unción.

O 5 de maio comeza na Parroquia A Estación de Monforte a novena en honra á Nosa Señora de Fátima, co seguinte horario:

  • 19’15 h: Novena 19’30 h: Santa Misa

A %d blogueros les gusta esto: