A Nosa Voz

O mércores 30 de novembro, o sábado 10 de decembro e o mércores 14 de decembro, realízanse visitas teatralizadas á igrexa de Sta. Mª de Meira. Terán unha duración de 3 horas repartidas en dúas partes da seguinte maneira:

Teatralización: de 10.30 a 12:00 e actividades: de 12:00 a 13:30 (non é necesario asistir ás dúas partes. Pódese elixir a que resulte máis interesante).

Con este ciclo dáse a coñecer a historia da vila e do Mosteiro de Sta. Mª de Meira desde a súa fundación no século XII ata a actualidade pero non relatada por un guía senón vivida e contada polos personaxes de cada época: abades, monxes, soldado francés… Estes personaxes caracterizados, escenifican nas súas intervencións todos os acontecementos salientables que aconteceron no mosteiro e na vila.

Despois de cada unha das actuacións teatrais, nas que o público pode participar, haberá unha serie de actividades e xogos medievais e tradicionais que terán lugar na Praza do Convento, e que están destinados tanto para nenos coma para maiores.

A asistencia e as actividades son gratuítas. Prégase confirmar asistencia mínimo 5 días antes da representación elixida.

Contacto: Oficina de Turismo de Meira. Pza. do Convento s/n. Meira.

Teléfono: 618.679.632
Fax: 982.330.102
e-mail: turismo@concellodemeira.com

Dentro das actividades de Cáritas Diocesana para favorecer o acceso ao emprego está o programa “Abrindo portas”. Durante este mes de novembro quince persoas con difícil inserción laboral están recibindo formación en traballos básicos de bar, restaurante e cociña tanto a nivel teórico como práctico en distintos establecementos de hostalaría.

A Asociación de Hostalaría de Lugo imparte as ensinanzas: servizo básico de restaurante e bar, aprovisionamento de bebidas e comidas rápidas, manipulación de alimentos e prácticas en empresas.

No curso, participan desempregados, mulleres en situación vulnerable ou de exclusión, inmigrantes, xoves que sufriron fracaso escolar e persoas en paro con difícil inserción no mercado laboral. Todos os alumnos que superen a formación de maneira satisfactoria formarán parte dunha bolsa de emprego como camareiros.

Cáritas Diocesana acolle de bo grado a colaboración de empresas neste programa, posibilitando prácticas formativas, contratando a algún dos participantes no curso a ou con achegas económicas para sufragar gastos.

O 18 de novembro celébrase unha Eucaristía de Acción de Grazas pola canonización de Bonifacia Rodríguez. A Eucaristía, presidida polo señor bispo D. Alfonso Carrasco Rouco, será na parroquia de San Pedro ás oito da tarde.

Bonifacia Rodríguez Castro fundou as Servas de San Xosé, e o pasado 23 de outubro foi canonizada en Roma, onde estivo unha representación da Diocese lucense: Servas de San Xosé, Laicos, profesorado e alumnado do colexio San Xosé.

  O día 12 de novembro comeza a novena preparatoria da Solemnidade de Cristo Rei, que organiza o Apostolado da Oración.

Esta novena celébrase na parroquia de Santiago A Nova de Lugo ata o domingo 20, solemnidade de Cristo Rei. Está presidida polo Consiliario de Vida Ascendente e párroco de Mougán, Ramón Álvarez Varela. O horario é o seguinte: ás sete e media da tarde, Santo Rosario e ás oito: novena e celebración da Eucaristía.