Igrexa

Colecta pro Terra Sancta

Con motivo da celebración un ano máis, da Semana de Paixón, abrazados polo don marabilloso do Deus que se fai un de tantos e ábrenos as portas do paraíso, sentimos especialmente sensibles ao que sucede en Terra Santa. Por iso oramos intensamente pola paz. Neste ano 2024 celebramos dous eventos vinculados á veneración da Santa Cruz. Trátase de senllos Anos Santos, até o día 15 de abril en Santo Toribio de Liébana e durante todo o ano en Caravaca de la Cruz (Murcia). Así mesmo, conmemoramos o oitavo centenario da estigmatización de San Francisco de Asís no monte Alvernia, en Italia. Todos eles memorandos de profunda significación espiritual que nos vinculan tamén a través da evocación da Santa Cruz a Terra Santa.

A Colecta Pontificia de Semana Santa implica un xesto de solidariedade para coas comunidades cristiás que viven en Terra Santa e desta maneira contribuímos a soster a presenza cristiá naquelas terras, así como as importantes obras sociais, culturais e o sostemento dos santuarios vinculados á historia da nosa redención.

Grazas por colaborar. Grazas por facer posible que non se borre a pegada cristiá na nosa común patria espiritual. Terra santa, Deus bendínos. Se me esquezo de ti, Xerusalén, que se me paralice a man dereita, que se me pegue a lingua ao padal se non me lembro de ti, se non poño a Xerusalén no cume das miñas alegrías.

Frei Francisco Castro Miramontes

Cadea Eucarística

O 21 de marzo ten lugar en España a Cadea Eucarística da Coresma 2024.

A Igrexa española súmase así a unha iniciativa do Consello de Conferencias Episcopais de Europa que pretende ser signo de comuñón e esperanza para o Vello Continente. Un tempo para considerarnos todos irmáns e implorar a Deus o fin da guerra, tanto en Europa como en Terra Santa.

24 Horas para o Señor

«24 horas para o Señor» é unha iniciativa coresmal de oración e reconciliación instituida por vontade do Papa Francisco e que se celebra do venres 8 ao sábado 9 de marzo. O lema desta undécima edición é «Camiñemos nunha vida nova» (Rm 6,4). Para facilitar que as comunidades cristiás preparen esta celebración, o Pontificio Consello para a Promoción da Nova Evanxelización presenta un subsidio cos seguintes contidos:

Parte I. A confesión

  1. O perdón recibido, posibilidade de camiñar nunha vida nova
  2. O rito do Sacramento da Reconciliación
  3. Testemuño de conversión, Kevin Matthews
  4. Testemuño de perdón, Gemma Capra Calabresi

Parte II. Vixilia

  1. Premisas xerais
  2. Desenvolvemento da vixilia
  3. Lectio Divina sobre Rm 6, 1-14
  4. Catequese do Papa Francisco sobre o Perdón

[Ver subsidio]

Fieis Defuntos

O xoves 2 de novembro é o día da Conmemoración de todos os Fieis Defuntos. A Igrexa ten a convicción de que está en comuñón cos defuntos; que se expresa neste día sobre todo, coa participación e ofrecemento da Eucaristía; aínda que pode expresarse tamén en oracións, esmolas, obras de penitencia e indulxencias. Aos fieis que visiten devotamente o cemiterio ou oren só mentalmente polos defuntos concédeselles a indulxencia plenaria en cada un dos días do 1 ao 8 de novembro.

Ás 17 h no cemiterio de San Froilán, celébrase a Eucaristía presidida polo Sr. Bispo Mons. Alfonso Carrasco Rouco.

Solemnidade de Todos os Santos

A celebración de Todos os Santos, lémbranos a unha multitude de santos e santas, xente corrente como nós que viviron de maneira sinxela pero que comunicaron paz, que foron auténticos, compasivos, solidarios, que entregaron a súa vida xenerosamente e que participan dunha vida plena. É unha festa de esperanza e de alegría xa que hai moito ben no mundo se sabemos descubrilo. Os santos demóstrannos que seguir a Xesús é posible aínda que tiveron defectos, cometeron pecados, non eran perfectos.

Tamén lembramos nesta festa a unha multitude de santos anónimos sen coroa e sen altar. Como di o Papa Francisco: “os santos da porta do lado”. É dicir, santos anónimos, que coas súas boas obras, ben intencionadas, poden transformar a súa contorna, facela máis cristiá, máis humana.

Na festa de Todos os Santos, podemos dicir de corazón:

Señor, fai crecer en nós o desexo de vivir o espírito das Benaventuranzas: a alegría, a paz, a misericordia e a felicidade de atoparnos contigo e de saír ao encontro dos outros!

Parroquia do Bo Pastor, Lugo

A %d blogueros les gusta esto: