Igrexa

Curso presencial, en liña e diferido sobre o Evanxeo de San Xoán

O Doutor en Teoloxía Dogmática Napoleón Ferrández Zaragoza impartirá un curso sobre o Evanxeo de San Xoán que organiza a Universidade Eclesiástica San Dámaso en 8 sesións repartidas en cada un dos 8 meses que van de outubro de 2024 a maio de 2025.

Os participantes no curso accederán a unha actualización dos últimos estudos sobre o evanxeo xoánico, penetraranse no tempo de Xesús e nos lugares onde suceden os feitos. O Evanxeo de Xoán preséntase como un relato profundamente asentado na historia e na cultura onde transcorre a vida, morte e resurrección de Xesús.

Programa:

  1. O texto de San Xoán 1 de outubro de 2024
  2. Quen é Xoán, fillo de Zebedeo «Este é o discípulo amado que dá testemuño destas cousas» (Xn 21,24) 5 de novembro de 2024
  3. «Acampou entre nós»: o Prólogo de Xoán «No principio existía a Palabra» (Xn 1,1) 3 de decembro de 2024
  4. «O vello pasou; mirade, existe algo novo», de Caná a Cafarnaúm «Despois disto houbo unha festa» (Xn 5,1) 8 de xaneiro de 2025
  5. A Pascua no corpo de Xesús «Achegábase a Pascua» (Xn 2,13) 4 de febreiro de 2025
  6. A Paixón empeza nos pés dos Apóstolos «Comprendedes o que fixen convosco?» (Xn 13,12) 4 de marzo de 2025
  7. «Velaquí o Home», a Paixón de Jesús 1 de abril de 2025
  8. Resurrección de Xesús e sabedoría das feridas

Para quen siga o curso de maneira presencial ou en liña en directo, o horario de cada sesión é de 18:00 h. a 19:00 h. cada un dos días sinalados enriba.

[Máis información]

Indulxencia con motivo da Xornada dos Avós e dos Maiores

Con motivo da IV Xornada Mundial dos Avós e dos Maiores, que se celebrará o próximo 28 de xullo e que terá como lema “Na vellez non me abandones” (cf. Sal 71,9), o Papa Francisco concedeu a indulxencia plenaria aos fieis que asistan ás misas dedicadas a este propósito ou visiten ás persoas maiores que están soas.

A Penitenciaría Apostólica publicou un decreto, no que se indica que a Indulxencia será concedida “nas condicións habituais (confesión sacramental, comuñón eucarística e oración segundo as intencións do Sumo Pontífice) aos avós, aos maiores e a todos os fieis que, animados por un verdadeiro espírito de penitencia e caridade, participen nas diversas celebracións que terán lugar en todo o mundo”.

Ademais, para subliñar que a visita é unha ocasión de reconciliación e de perdón, tamén será posible obter a indulxencia visitando ás persoas maiores que vivan soas no seu barrio ou que estean aloxadas en centros residenciais.

Encontro Matrimonial ofrece este verán un encontro para sacerdotes e consagrados

Será do 22 ao 26 de xullo e pode seguirse o encontro a través da internet. Trátase de compartir vida, tempo, inquietudes, celebrar a vocación, apoiarse uns a outros, reflexionar e compartir sobre as parábolas.

O encontro modérano un sacerdote, un consagrado e dous matrimonios. O matrimonio e a orde sacerdotal son sacramentos de relación cos demais: uns, entre os esposos, os outros cos fregueses ou o resto dos compañeiros do presbiterio ou a comunidade.

Unha parella xunto cun sacerdote ou unha consagrada (van alternándose) fan unhas presentacións sobre as parábolas, dando un enfoque, así como o seu testemuño de como viven eles, no seu día a día, a realidade que presentaron.

Seguidamente propoñen algunhas preguntas que axuden a concienciarse con relación ao tema e ás propias vivencias.

[Máis información]

 

A Igrexa lembra a Virxe do Carme e as xentes do mar

Cada ano, o segundo domingo de xullo, celébrase o Domingo do Mar. As comunidades católicas de todo o mundo rezan por quen traballan no sector marítimo e por quen se ocupan deles. O Domingo do Mar é unha ocasión para chamar a atención sobre un dos sectores dos que se fala pouco, pero que está no centro da vida de todos. Os esforzos dos mariños a miúdo chocan coa inxustiza, a explotación e a desigualdade. Por iso, a Igrexa acompaña e defende á xente de mar. A través do mar a Igrexa formouse e estendeuse por todo o mundo. Partindo e desembarcando en portos afastados, os Apóstolos e os misioneiros levaron a Boa Nova até os confíns da terra. A experiencia de entón pode ser tamén unha inspiración para a Igrexa de hoxe.

En España cada ano a Igrexa celebra o Día das xentes do mar coincidindo coa festa da súa patroa, a Nosa Señora do Carme, ou sexa, o 16 de xullo. O lema desta xornada no 2024 é «Coidade dos mares; coidade das súas xentes»

Xornada de Responsabilidade no Tráfico

O 7 de xullo celébrase a Xornada de Responsabilidade no Tráfico, en pleno éxodo das vacacións de verán e ás portas da festa de san Cristovo, patrón de condutores e transportistas.

«Eu son o Camiño e a Verdade e a Vida» (Xn 14,6) é o lema da 56.ª Xornada Nacional de Responsabilidade no Tráfico que propón a pastoral da estrada. El non é un camiño, é o Camiño. Non é unha verdade, é a Verdade, ademais de ser a Vida que dura para sempre.

É un día para ter moi presentes aos condutores e transportistas, e agradecerlles os bos servizos que prestan en ben da sociedade. Tamén se trata de tomar conciencia da responsabilidade que deben ter condutores e peóns.

Pídese a Deus, que, por intercesión de santa María da Prudencia e san Cristovo, cada día os usuarios das vías públicas cheguen felizmente ao seu destino.

[Materiais]

A %d blogueros les gusta esto: