Vida e actualidade da Diocese de Lugo
O mércores 3 de xullo ás 12 h inaugurouse na igrexa do Mosteiro de Santa Clara, na rúa San Roque de Santiago de Compostela, a exposición itinerante “350 años da Ofrenda do Antigo Reino de Galicia a Xesús Sacramentado na Catedral de Lugo”. No acto de inauguración estivo presente o arcebispo emérito de Tánger Mons. Santiago Agrelo.
A iniciativa Un minuto pola paz foi lanzada polo Foro Internacional de Acción Católica (FIAC), a Acción Católica Arxentina, a Acción Católica Italiana, a Unión Mundial de Organizacións de Mulleres Católicas (UMOFC) e outras asociacións.
A data lembra a reunión para invocar a paz promovida polo Papa Francisco o 8 de xuño de 2014 nos Xardíns do Vaticano xunto co Presidente de Israel naquel entón Shimon Peres, o Presidente Palestino Abu Mazen e o Patriarca de Constantinopla, Bartolomeu I.
Os promotores desta acción buscan motivar a todos aqueles que teñen a paz no corazón, involucrando a todas as persoas que coñecemos en tantos contextos da vida.
Esta semana o Santo Padre invitou a que se dedique o 8 de xuño ás 13 h “un minuto á paz, de oración, aos crentes; de reflexión, para quen non cren; todos xuntos por un mundo máis fraterno”.
O 1 de xuño no Seminario Maior de Lugo e na Catedral tivo lugar a Asemblea Rexional de Galicia da Unión Eucarística Reparadora (Marías do Sagrario e Discípulos de San Juan).
Presidiu o acto o consiliario da UNER en Lugo, Luís Varela Castiñeira. Todo virou en torno ao tema “Reaviva a túa vida á luz da Eucaristía”.
O relatorio foi impartida pola Irmá Mª del Valle Camino (Delegada Xeral da UNER e Vicaria Xeral das Misioneiras Eucarísticas de Nazaret).
Algúns participantes expresaron que lles gustou a profundidade do tema e das dinámicas de grupo, a fraternidade entre os asistentes e o coñecemento máis profundo deste belo carisma, fundado por San Manuel González.
Pola tarde tivo lugar un acto eucarístico moi emotivo na Catedral, participando todos ante o Santísimo.
Catro membros novos, tres de Lugo e unha de Ferrol, fixeron a súa ofrenda UNER recibindo a medalla de Marías do Sagrario, comprometéndose a vivir este carisma máis profundamente na Igrexa.
Foi un encontro de motivación, ánimo e alegría, que supón un gran empuxe para este movemento de laicos en Galicia e de maneira especial para Lugo.
Patricia e Susana (UNER Lugo)
O día da solemnidade da Ascensión do Señor, o domingo 2 de xuño, celébrase a Xornada Mundial das Comunicacións Sociais. O tema que propón o papa Francisco para 2019 é «”Somos membros uns dos outros” (Ef 4,25). Das comunidades nas redes sociais á comunidade humana».
O Papa convida a reflexionar sobre o fundamento e a importancia do noso estar-en-relación; e interroga: Como reencontrar a verdadeira identidade comunitaria sendo conscientes da responsabilidade que temos uns con outros tamén na rede?
Os bispos da Comisión de Medios de Comunicación da Conferencia Episcopal Española desexan que “na rede haxa novas comunidades cristiás cos mesmos trazos das primeiras: lugares de comuñón e celebración da palabra, espazos para o alento e a compañía ante as dificultades, ambientes nos que se organiza e prepare a misión”.
O VI Domingo de Pascua a Igrexa española celebra a Pascua do enfermo. Ese día -26 de maio- é o final dun itinerario que se iniciou o 11 de febreiro, Xornada Mundial do Enfermo.
A Igrexa española achégase no seo das súas comunidades parroquiais, ao mundo dos enfermos, as súas familias e os profesionais sanitarios. E mostra o rostro de Cristo curando e acompañando.
O tema desta Campaña é «O voluntariado na Pastoral da Saúde». Todos temos necesidade de ser coidados, acompañados e poder compartir as nosas dores e soidades.
«Gratis recibistes, dade gratis», é o lema deste ano.
Con esta Campaña preténdese recoñecer o valor da gratuidade na entrega ao coidado dos enfermos, como recoñecemento do recibido. Cómpre facer unha reflexión na importancia do voluntariado e a necesidade de animar a máis persoas nesta dirección.