Igrexa

Curso en liña “Acompañamento familiar”

O Instituto da Familia de Ourense pon en marcha un curso en liña sobre o acompañamento ás familias e matrimonios, que é unha aprendizaxe necesaria para todo aquel que vive en familia. Pero de xeito especial é necesario para profesores, titores, psicólogos, axentes de pastoral familiar, médicos, terapeutas e todas cantos por profesión ou vocación teñen que traballar con familias.

Ao final deste curso procúranse conseguir os seguintes obxectivos:

Aprender a mirar sistémicamente á familia nun proceso de acompañamento.

Coñecer as principais características do acompañamento familiar, o seu método propio.

Ofrecer uns criterios e claves para un acompañamento familiar en aspectos básicos nunha familia harmónica e madura

Obter criterios, información e claves para o acompañamento familiar en aspectos propios das familias occidentais do século XXI.

Estrutura

1. Que é o acompañamento familiar

2. Proceso do acompañamento familiar

3. Familyfullness

4. Acompañamento educativo

Contidos prácticos

Neste vense prácticas de construción ou reconstrución da familia a partir de todo o positivo que xa hai nela. Para iso, proponse:

a. Traballar a especificidade do acompañamento familiar respecto dos acompañamentos individuais

b. Mostrar e experimentar de modo práctico un método de acompañamento familiar

c. Mostrar as claves prácticas do Familyfullness

d. Experimentar as destrezas e estratexias educativas básicas en família

Duración e prezo

O curso comeza o 4 de maio e dura seis semanas. Dedicación estimada, entre 3 e 4 horas á semana. O curso, que ten un prezo de 150 euros, abonarase a través da plataforma de pago, seguindo as indicacións que aparecen no apartado de matriculación da web institutodafamilia.es

1 de maio, festa de San Xosé e Día internacional dos traballadores

As entidades promotoras da iniciativa Igrexa polo Traballo Decente (Fundación Juan Soñador, Cáritas, Confer, Irmandade Obreira de Acción Católica, Xustiza e Paz, Mocidade Estudante Católica, Mocidade Obreira Católica) priorizan dinámicas de sensibilización, visibilización e denuncia sobre o traballo humano, central na sociedade e esencial na vida de millóns de persoas.

Un eixo de intervención está orientado á celebración da festa de san Xosé Obreiro e Día Internacional dos traballadores, o 1º de maio.

Publícase un manifesto que mostra unha realidade moitas veces silenciada como é o traballo escasamente valorado de traballadores que a pesar das súas condicións laborais débiles e precarias, son esenciais para o coidado da vida. Ademais incorpora unha serie de reclamacións para dar resposta a esta crise socioeconómica.

[Ver manifesto]

A diferenza doutros anos, a convocatoria deste Primeiro de Maio terá un carácter extraordinario, por motivos de confinamento e distanciamento social necesario neste tempo, pero esta situación non suporá permanecer inmóbiles, senón que haberá:

  • Oración. [Guión litúrxico]
  • Colocación en xanelas ou balcóns de carteis co lema “Aplauso polo Traballo Decente”. As fotos que se fagan poden facerse chegar a empleolugo@caritas.es.
  • Cacerolada o venres 1 de maio ás 12h.

Día de oración e xaxún en memoria dos misioneiros mártires

O 24 de marzo de 2020 celébrase o vixésimo oitavo día de oración e xaxún en memoria dos misioneiros martirizados.

É unha cita que se converteu nun punto de referencia para quen ven o martirio en odium fidei non como un mero sacrificio senón como o cumprimento dunha vida no seguimento de Cristo.

O lema do día é: “Namórate e vive”. Unha mensaxe con varios significados. Un, a paixón por Deus Pai e as súas criaturas. Outro significado: un imperativo real, o legado que os mártires recibiron do Noso Señor ao transmitilo hoxe. Só aqueles que se namoran están dispostos a abandonar o superfluo para captar a esencia da vida con ese propósito. Esta promesa non é só unha esperanza para o futuro, senón sobre todo unha garantía para o presente.

O mártir namorouse dunha causa, dun pobo, porque mirou a través dos ollos do Evanxeo e decidiu vivir por esa causa, por esas persoas. Cando alguén namora dunha causa pode vivir plenamente e atopar a súa vocación.

Mesmo despois da morte, os mártires seguen sendo para sempre un signo de amor e vida.

Durante o ano 2019 foron asasinados 29 misioneiros. Ver informe

Nota dos bispos da Provincia Eclesiástica de Santiago de Compostela sobre as novas medidas nos actos relixiosos ante a expansión do “coronavirus”

Ante a situación creada pola expansión do virus Covid19, a responsabilidade polo ben da saúde propia e do próximo lévanos a adoptar algunhas medidas destinadas a evitar a propagación da enfermidade con ocasión das nosas celebracións litúrxicas e encontros pastorais. É unha responsabilidade cidadá e unha esixencia do amor ao próximo previr o contaxio nestes momentos. Estas novas medidas engádense ás xa ofrecidas na Nota dos Bispos da Provincia eclesiástica de Santiago de Compostela do pasado 8 de marzo.

Como indicación xeral, en espera doutras medidas que poidan ser adoptadas polo Ministerio de Sanidade ou pola Consellería de Sanidade da Xunta de Galicia, queremos convidar a todos os fieis a seguir as disposicións dadas polas nosas autoridades sanitarias, e particularmente a aqueles que pertencen a grupos considerados de risco, segundo os criterios oficiais das autoridades sanitarias nacionais e autonómicas.

Dadas as advertencias primeiras, establecemos:

Celebracións litúrxicas

  • Dispénsase aos fieis cristiáns das dioceses da Provincia eclesiástica de Santiago de Compostela da asistencia á Eucaristía, os domingos e festas de precepto. Pódese seguir a santa Misa por radio ou televisión, así como por internet. A comuñón espiritual é unha práctica tradicional da Igrexa que temos que recuperar nestas dolorosas circunstancias, e pode ser ocasión de santificación e de comuñón eclesial.
  • Suspéndese as celebracións comunitarias e públicas da Santa Misa ata ser superada a actual situación de emerxencia.
  • Os sacerdotes continuarán celebrando diariamente a Eucaristía, rezando polo Pobo de Deus, sendo posible a asistencia dun pequeno grupo de fieis. Aínda que non poidamos reunirnos fisicamente todos, seguimos sendo comunidade, parroquia, Igrexa de Deus.
  • Os funerais poden celebrarse segundo a modalidade de Celebración “das Exequias sen misa”. As misas exequiais poden ser celebradas despois desta fase crítica; ou nestes momentos só co grupo dos familiares máis achegados.
  • Pospóñanse as celebracións de aniversarios ata despois de Semana Santa.
  • Estas indicacións aplicaranse igualmente para as celebracións litúrxicas da Semana Santa. Aconsellamos igualmente aos responsables das Confrarías que sigan tamén as orientacións das autoridades sanitarias.
  • Suspéndese a celebración das Confirmacións.
  • Rógase que se pospoña, igualmente, calquera outra celebración que non sexa urxente.
  • Para o sacramento da penitencia, úsense espazos que permitan cumprir coas esixencias hixiénicas indicadas polas autoridades sanitarias.

Catequese

Suspéndense os encontros parroquiais, arciprestais e diocesanos de catequese, en principio ata despois de Semana Santa.

Actividades formativas

Suspéndense, ata nova indicación, todos os encontros programados polas distintas Delegacións ou Secretariados diocesanos e polos Arciprestados e as Parroquias. Igualmente aconséllase ás diferentes asociacións e movementos das nosas Igrexas diocesanas que suspendan posibles encontros previstos.

Acción caritativa

Polo que se refire á actividade das Cáritas parroquiais, interparroquiais e diocesanas, non se pecharán os espazos dedicados á actividade caritativa. Pero convídase a extremar a prudencia na atención individualizada.

Museos, bibliotecas e arquivos

Seguindo a recomendación das autoridades autonómicas, polo momento permanecerán pechados ao público os museos, as bibliotecas e os arquivos dependentes das Dioceses.

Os templos das nosas Dioceses seguirán abertos, a menos que as autoridades sanitarias digan o contrario, como signo de esperanza e ao dispor dos fieis para que poidan ir rezar, sen aglomeracións e vivir no silencio estes momentos difíciles. Aos fieis lémbraselles a posibilidade de contactar coa súa Parroquia para calquera necesidade, especialmente para a recepción de sacramentos como, por exemplo, a Penitencia ou a Eucaristía.

Estamos a vivir un tempo de desconcerto, aínda que sabemos que Deus na súa providencia está pendente de nós pois non é alleo a canto nos pasa. Temos que pedir nestes momentos que nos axude a vivir esta realidade con sentido profundamente cristián.

De acordo coa nosa fe, que nos convida a confiar sempre en Deus, exhortamos á oración a todo o Pobo de Deus, encomendando ao Señor e á Santísima Virxe María esta situación que atravesamos. Rogamos en particular que os presbíteros ofrezan a Santa Misa pola saúde do noso pobo, particularmente dos enfermos e do persoal sanitario; e que esta intención estea presente no rezo da Liturxia das Horas, e na oración das nosas comunidades de vida consagrada, particularmente contemplativas.

Os cristiáns temos que responder con responsabilidade e a través da caridade, xerando novas formas de presenza e de coidado, moi particularmente cara ás persoas soas ou abandonadas. Agora máis ca nunca necesitamos renovar a nosa confianza en Deus e reavivar en nós o don da caridade. Así mesmo agradecemos o traballo abnegado que están a realizar os profesionais sanitarios e investigadores científicos, así como os axentes da pastoral da saúde.

Estas medidas, e outras que eventualmente se puidesen tomar, á espera das indicacións das autoridades ante o novo escenario do estado de alarma, teñen carácter temporal. E estarán en vigor en principio ata despois de Semana Santa.

+ Julián, Arcebispo de Santiago.

+ Luís, Bispo de Tui-Vigo.

+ Alfonso, Bispo de Lugo.

+ José Leonardo, Bispo de Ourense.

+Luís Angel cmf, Bispo de Mondoñedo-Ferrol.

+ Jesús, Bispo Auxiliar de Santiago.

Nota dos bispos da Provincia eclesiástica de Santiago de Compostela sobre as medidas que poden evitar a expansión do coronavirus nos actos relixiosos

Atendendo ás recomendacións que a Consellería de Sanidade da Xunta de Galicia nos fixo chegar para a prevención do contaxio do coronavirus no ámbito das celebracións litúrxicas e devocionais e ás indicacións realizadas desde a Conferencia Episcopal Española, os bispos da Provincia eclesiástica de Santiago de Compostela ofrecemos unha serie de indicacións co obxectivo de extremar as medidas de hixiene adecuadas nos actos litúrxicos, especialmente naqueles que conleven accións de bicar as imaxes relixiosas ou outras manifestacións externas de piedade popular:
1. É conveniente retirar a auga bendita das pías que hai nas entradas dos templos e noutros lugares de devoción.
2. Manter a indicación de evitar dar a man e outras formas de contacto físico no rito da paz; e lembrar que, segundo o previsto nas normas, é posible tamén prescindir deste rito nestas circunstancias, e convidar directamente á preparación para a Comuñón.
3. Que os sacerdotes e os ministros extraordinarios que distribúen a comuñón durante a Eucaristía, se laven as mans antes e despois deste momento. Aconséllase aos sacerdotes que para iso teñan un spray ou líquido desinfectante nas sancristías e o usen antes de celebrar os actos de culto.
4. Que as mostras de devoción e afecto cara ás imaxes, tan propias deste tempo de Coresma e na próxima Semana Santa, poidan ser substituídas por outras como a inclinación de cabeza ante as imaxes sacras do Señor, da súa Nai ou dalgún outro santo de especial devoción. O día de Venres Santo na adoración da Cruz utilícese a segunda forma, nº 19 (Cf. O sacerdote, toma a cruz e, de pé ante o altar, convida o pobo a que adore a Santa Cruz en silencio). É necesario evitar todo tipo de contacto físico con cruces, medallas, escapularios, etc. que xa fosen bicadas por outros fieis, facilitando, ademais, unha maior rapidez que evite aglomeracións innecesarias.
A prudencia e a preocupación polo ben propio e do próximo parécennos razóns suficientes para que tamén como Igrexa contribuamos no posible a evitar circunstancias que poidan dar lugar á expansión infecciosa do virus COVID-19. Vivir con fe esta situación pídenos igualmente non deixarse dominar polo medo, coma se non tivésemos esperanza, dando así testemuño do destino de vida ao que estamos chamados por Deus; e procurar exercer a caridade nos modos adecuados: que ninguén quede abandonado nas nosas comunidades parroquiais, nin quede sen resposta o próximo que necesite a nosa axuda.
Os Bispos da Provincia eclesiástica de Santiago de Compostela participamos da crecente preocupación, os temores e ansiedades da poboación pola rápida propagación do coronavirus a nivel mundial. Así mesmo, agradecemos a xenerosa dedicación do persoal sanitario e administrativo, auxiliares e voluntarios durante este período.
Queremos vivir estes momentos de dificultade unidos, como Igrexa; e, por iso, xunto coas medidas e propostas anteriores e, á espera de ulteriores medidas que puidesen emitir as autoridades sanitarias, convidamos insistentemente a todos os fieis desta Provincia eclesiástica de Santiago de Compostela a ser constantes na oración pola saúde pública e a de todos os afectados, e a confiar sempre en Deus Pai.

+ Julián, Arcebispo de Santiago.
+ Luis, Bispo de Tui-Vigo.
+ Alfonso, Bispo de Lugo.
+ José Leonardo, Bispo de Ourense.
+Luis Ángel cmf, Bispo de Mondoñedo-Ferrol.
+ Jesús, Bispo Auxiliar de Santiago.

A %d blogueros les gusta esto: