Diocese

Promóvese a declaración de Ben de Interese Cultural para a Ofrenda do Antigo Reino de Galicia ao Santísimo

Ofrenda do Antigo Reino de Galicia ao Santísimo (30/06/2019)

A instancias da Diocese de Lugo, a Catedral e o Centro Eucarístico Lucense, inicianse os trámites para que a Xunta de Galicia declare a Ofrenda do Antigo Reino de Galicia ao Santísimo como Ben de Interese Cultural. Tendo en conta que se trata dunha tradición cunha acreditada historicidade que destaca a función do patrimonio cultural inmaterial na sociedade como elemento de carácter identitario para o conxunto da Comunidade. O bispo de Lugo, Mons. Alfonso Carrasco reuniuse o 5 de febreiro co conselleiro de Cultura e Turismo, Román Rodríguez e co delegado da Xunta, José Manuel Balseiro.

Para o deán da Catedral, Mario Vázquez “é importante que os lucenses valoremos a Ofrenda e redescubramos a importancia que tivo e ten para a Diocese e para Galicia, non só polo feito de que os representantes das 7 cidades do Antigo Reino de Galicia se puxesen de acordo para honrar ao Santísimo senón sobre todo polo feito singularísimo de que o Santísimo está exposto día e noite na Catedral”

Actos de Mans Unidas na Campaña contra a Fame

Venres 7 de febreiro, Día do xaxún Voluntario

Ás 17 h. terá lugar no Seminario a presentación da 61ª CAMPAÑA CONTRA A FAME: “QUEN MÁIS SOFRE OS MALOS TRATOS AO PLANETA NON ES TI. Colaborar está na túa man”.

Relatorio: “Conciencia ambiental”, impartido por Miguel Leiva Torreiro, profesor do Seminario Diocesano. Falará da escaseza que hai no planeta de certos recursos naturais e de conceptos como renuncia e consumo responsable.

Ás 18:00 h  Eucaristía

Ás 19:00 h  Xaxún voluntario.

Domingo 7 de febreiro, Xornada Nacional de Mans Unidas

O segundo domingo de febreiro, día 9, é a Xornada Nacional de Mans Unidas, organización a quen se adican as colectas das eucaristías celebradas ese día.

[Manifesto e información dos proxectos que financia Lugo]

Conferencia da misioneira Rosa Mª de los Reyes

Dentro da Campaña contra a Fame 2020 de Mans Unidas, a misioneira Rosa Mª de los Reyes pronunciou unha conferencia o 3 de febreiro no Seminario. Explicou a situación da cidade na que vive Mbuji-Mayi, na República Democrática do Congo. Alí dá clase de Biblia no Seminario, é formadora de profesores de Relixión e colabora co centro salesiano Muetu Don Bosco de reinserción de nenos vulnerables. Sobre o país dixo que é rico pero moi maltratado. Hai diamantes, e aínda que non son cualificados “diamantes de sangue” como en Serra Leoa (onde houbo guerras a causa das pedras preciosas) si hai mortes, sobre todo nos pozos de onde nenos, mozos e adultos extraen artesanalmente diamantes e o problema está nos afundimentos, que acaban coas vidas de quen están traballando dentro.

Tamén falou Rosa Mª de los Reyes do Seminario Maior de Cristo Rei Kasayi Theologicum / Malole, en concreto das condicións de vida dos seus alumnos, que son as mesmas cás do pobo: sen auga, sen electricidade, sen unha dieta variada…

Curso “Acompañamento de feridas emocionais”

Destínase ao profesorado de Educación Infantil, Primaria, Secundaria, FP, orientadores, pais e nais de nenos entre 1 e 18 anos

O Curso Acompañamento de feridas emocionais na educación será o sábado 8 de febreiro no Seminario Diocesano de Lugo. Os obxectivos xerais son descubrir que son as feridas emocionais e cales son os seus efectos na infancia. Presentarase un método práctico de acompañamento e curación afectiva.

Esta actividade, organizada polo Centro de Orientación Familiar Diocesano de Lugo, está homologada pola Consellería de Cultura, Educación e Orientación Universitaria.

Información no correo electrónico info@cofdiocesano.org

OBXECTIVOS XERAIS

Descubrimento de que son as feridas emocionais e cales son os seus efectos. Presentar un método práctico de acompañamento e curación afectiva integral nos límites da actividade educativa. Proporcionar ferramentas para o acompañamento das feridas emocionais.

CONTIDOS

Que son as feridas emocionais, a súa orixe e manifestación

Sanación e coidado persoal

Recuperación do amor a un mesmo

Sanación e restablecemento de relacións

Agradecemento

Formación do carácter

Método de acompañamento de feridas

TALLERES

Guía de feridas

Trono de bendicóns

Descrición de afectos e moficación cognitiva

Coñecer e expresar sentimentos

Narracíón autobiográfica positiva

Ferramentas para romper con falsos deberes, falsas culpas, mensaxes negativas, para dicir ‘adeus’

A misioneira Rosa María de los Reyes participa en Lugo na Campaña contra a Fame

Durante estes últimos días de xaneiro e primeiros de febreiro está participando na Campaña contra a Fame de Mans Unidas – Lugo Rosa María de los Reyes, misioneira mercedaria de Berriz. Vive en Mbuji-Mayi, cidade da República Democrática do Congo, país sobre o que di:

“Hai 8.000 km de distancia, pero é como ir dun planeta a outro. Nos países do Norte un neno non está sacando diamantes dun pozo que pode afundirse e acabar coa vida da criatura. No Congo é moeda corrente, xa sexa buscando coltán, cobalto, diamantes, ouro…”

Ademais dunha crise humana hai unha crise ambiental:

“En África son de plástico os vasos, os pratos, as cadeiras, as mesas… Hai pequenas fábricas que venden moito material de plástico, que non é biodegradable e que rompe con facilidade, Entón desbótase e está acumulándose de xeito moi esaxerado; a terra está completamente invadida polos plásticos. Hai que facer algo pois a contaminación do solo é moi forte e o impacto sobre a poboación tamén é grande. A isto únese que dos países do Norte chegan a África coches vellos, autobuses vellos, todo así, polo que ao continente negro vai o máis contaminante.”

E sobre o labor de Mans Unidas fala Rosa Mª de los Reyes con gran coñecemento, pois ela mesma foi avalista de varios proxectos, por exemplo:

“Montouse en Mbuji-Mayi coa axuda de Mans Unidas un centro de saúde para a infancia. A maioría dos nenos atendidos teñen febres tifoideas recorrentes, malarias recorrentes, problemas de saúde mental, discapacidades físicas moi fortes. Son nenos que non poden facerse un sitio nunha sociedade tan dura e acaban na rúa. O primeiro que reciben os nenos que chegan constantemente é unha atención sanitaria; saben que poden curar”.

 Rosa Mª de los Reyes impartirá unha conferencia no Seminario de Lugo o luns 3 de febreiro ás 20 h.

A %d blogueros les gusta esto: