Diocese

Sesión de formación na Ermida (Quiroga)

O sábado 25 de maio ás 20 h no Santuario Nosa Señora da Ermida (Quiroga) continúan as sesións de formación con motivo da coroación canónica da imaxe da Virxe dos Remedios. Tratará sobre a dignidade da persoa, a dimensión moral da vida humana, o pecado e a graza, temas sobre os que disertará o Vicario de Coordinación Pastoral, Luis Manuel Rodríguez Pérez:

  • A dignidade da persoa (Gaudium et Spes 12, 17)
  • Dimensión moral da vida humana
  • A conciencia (voz, eco, luz, xuíz, testemuño, corazón)
  • O pecado (Catecismo da Igrexa Católica; Gaudium et Spes 13; Gál 5, 19-21; Mt 15, 19-20)
  • A graza (Antigo e Novo Testamento, Catecismo da Igrexa Católica)

Encontro de movementos e confrarías da Diocese

O luns 20 de maio no salón de actos do Seminario presentáronse os movementos e confrarías da Diocese para unha toma de contacto para levar a cabo un traballo conxunto de cara ao vindeiro curso e baixo a coordinación de Miguel Asorey Otero, que presidiu o acto. Ao final do mesmo interviu Miguel Ángel Mouriz Lamas, que participou no Encontro de Laicos sobre o Primeiro Anuncio o mes de febreiro en Madrid. Comentou os obxectivos do Encontro para que os movementos da Diocese os faga propios e que se reflexione sobre eles sabendo que se está en comuñón coa Igrexa:

Eses obxectivos son:

  • subliñar a comuñón das distintas vocacións do Pobo de Deus;
  • insistir na vocación bautismal, que nos fai evanxelizadores;
  • tomar conciencia de que todos os ámbitos sociais son espazos privilexiados para o anuncio do Evanxeo;
  • e concretar e impulsar procesos e proxectos para os vindeiros anos que axuden na tarefa do Primeiro anuncio e faciliten, a través da formación e mediante camiños de discernimento comunitario, a creación de espazos de acollida, escoita, diálogo e acompañamento nos distintos ámbitos, así como a construción de estruturas que favorezan a evanxelización.

Miguel Ángel Mouriz tamén lembrou os conceptos que máis soaron no Encontro: anuncio, acompañamento, formación, vivencia da fe, comuñón, testemuño, compromiso.

Asemblea de Catequistas

O sábado 18 de maio no Colexio FEC San Xosé de Lugo (Rúa Santiago, 2) terá lugar a Asemblea de Catequistas, co lema do curso catequético 2023-24, “Catequistas para servir”. O programa é o seguinte:

  • 10.00 h  Acollida.
  • 10.30 h  “A creación fonte da catequese” por Francisco J. Castro Miramontes
  • 11.30 h  “A espiritualidade infantil. O método Godly Play”, por Anaís Ferreiro e responsables de Godly Play Galicia.
  • 13.00 h  Percorrido orante pola Catedral. Equipo do Departamento de Catequese de Lugo.
  • 13.30 h Clausura.

Peregrinos a Lourdes

“Eu recomendo que a única expectativa sexa ver á Virxe, convivir cos demais e deixarse levar. Poñerse nas mans de María e dicirlle “aquí estou”; a partir de aquí sácase unha experiencia interesante”

“Estiven moi a gusto desde o primeiro momento. E o que máis me gustou foi, cando ía a Lourdes, esa sensación de ir visitar á Virxe á súa casa, porque eu creo que Santuario de Lourdes é unha das moitas casas que ten a Virxe polo mundo.

Marien Pérez Casanova

 

 

“Desde que teño 16 anos, peregrino con moita frecuencia ao santuario de Nosa Señora de Lourdes. É precioso poder ver como a mocidade coida dos enfermos, como estes acoden á Virxe vendo que nela teñen un socorro, un amparo. É unha experiencia singular.

“Considero que a experiencia en Lourdes cambia a calquera persoa. Por iso, neste ano especial no que se lembran as palabras da Virxe de ir “en procesión”, quero invitar a todos os fregueses e diocesanos de Lugo a experimentar os coidados da nosa Nai do ceo”.

Carlos Presas

 

 

 

“A peregrinación a Lourdes paréceme unha oportunidade para desconectar e pedirlle axuda á nosa Nai con todo aquilo que nos preocupa. Ela ten gardada para cada un de nós unha sorpresa que non podemos deixar polo que, se aínda dubidas, esta é a túa oportunidade.

“O tema que se nos presenta este ano reflicte o camiño que facemos todos xuntos en comunidade cara ao ceo, ao carón de María”.

Uxía (Chantada)

A Hospitalidade de Lourdes peregrina ao santuario francés do 1 ao 5 de xullo. Os interesados acudirán á Parroquia ou ao responsable de zona.

[Testemuños completos e outros máis]

Nova edición da Biblia en galego

É motivo de ledicia dar noticia da aparición da cuarta edición da Biblia traducida á lingua galega partindo das orixinais: hebreo, arameo e grego. Esgotada a edición anterior, non podíamos permanecer indiferentes ante o baldeiro existente e as necesidades das moitas peticións que xurdían directamente do pobo galego e de diversos grupos e institucións.

Esta nova edición, presentada xa na Diocese de Lugo, non soamente é unha aportación pedagóxica e necesaria para a investigación senón que, sobre todo, ofrece unha nova revisión lingüística dos textos adaptados á normativa actual do galego. Un equipo de filólogas e filólogos convocados pola editorial SEPT, e co apoio da Xunta de Galicia, traballaron con esmero e xenerosidade. É de recoñecer tamén a valiosa aportación do biblista Xosé Fernández Lago quen supervisou esta nova edición e o profesor da Diocese lucense Xosé Antonio Salgado Agromartín, quen traduciu o Libro de Daniel.

O beneplácito dos Bispos das Dioceses da Provincia Eclesiástica Compostelá en Galicia, representados polo arcebispo emérito D. Xulián Barrio, contribuiu a significar a relevancia deste feito no campo relixioso do cristianismo e da cultura universal.

Importantes razóns xustifican esta publicación: 1) a cooperación co movemento de implantación da liturxia na nosa lingua que coa publicación do novo Misal, ano MMXXIII, (cuxa reedición actualizada foi aprobada recentemente polos bispos das dioceses de lingua galega e confirmada pola congregación do culto divino) e doutros textos axudará a restablecer a normalidade lingüística na expresión litúrxica e devocional dos católicos galegos. 2) Desde unha perspectiva estritamente cultural, con importantes repercusións no desenvolvemento e no enriquecemento da singularidade dun pobo, nunca debemos esquecer que estamos ante os libros máis fermosos e mellores da literatura e do pensamento universal.

Xa o Papa Paulo VI recordaba na Evangelii Nuntiandi que a nova evanxelización perdería moito da súa eficacia se non se tomase en consideración o pobo concreto ao que se dirixe, ou se non se utilizase a súa lingua, signos e símbolos.

Xosé Mario Vázquez Carballo

Vicario Xeral da Diocese

A %d blogueros les gusta esto: