Diocese

Encontro de pais

O Centro de Orientación Familiar Diocesano e o Instituto da Familia organizan un Encontro de pais en liña a partir do 19 de abril. Unha primeira parte dedícase ás novas tecnoloxías e as dificultades para a súa educación e a segunda parte á resolución de conflitos en familia.

Modo de acceso

Os pais e nais inscribiranse na web do Encontro e recibirán as claves de acceso á Plataforma onde están os contidos.

Que atoparán na plataforma educativa

En cada curso os pais acceden a vídeos explicativos, exercicios para realizar cos fillos ou eles mesmos (con fichas que se poden descargar independentemente) e test sinxelos de autoavaliación. Nun foro de debate poderase intervir libremente cantas veces se queira e nel poderán contarse experiencias, facer preguntas (que serán contestadas por un especialista do Instituto da Familia), facer suxestións, solicitar información complementaria, etc.

I. Novas tecnoloxías e educación.

Contidos

a. Saturación do virtual e nostalxia do real

b. Saltaron todas as alarmas

c. Como afectan a: coñecemento, comportamento, hábitos de lectura, aprendizaxe

d. Mal uso, abuso e adicción ás novas tecnoloxías

e. Como educar e protexer: claves

II. Ferramentas e estratexias educativas eficaces para pais (2 meses)

Contidos:

a. Analicemos a situación: regra de ouro, afrontar conflitos

b. Que podemos facer? Estratexias básicas nos conflitos

c. Ferramentas para afrontar conflitos

Primeiros actos de Semana Santa na cidade de Lugo

Venres 26 de marzo: VÍA CRUCIS POLAS VÍTIMAS DO COVID -19 ás 18:30 h na Catedral

Organiza a Xunta de Confrarías de Semana Santa

28 de marzo: DOMINGO DE RAMOS: Eucaristía e bendición de ramos ás 12 h na Catedral

Colabora a Confraría da Entrada Triunfal de Xesús en Xerusalén.

O domingo 28 de marzo ás 19:30 h na igrexa dos PP. Franciscanos celébrase unha EUCARISTÍA EN HONRA Á VIRXE DAS DORES

Organiza a Confraría do Desencravo do Señor e das Maiores Dores de María Santísima.

Ao remate, o Orfeón Xoán Montes interpretará a “Salve Raíña”

O luns 29 de marzo na igrexa Parroquial de Santiago “A Nova” EUCARISTÍAS EN HONRA Á VIRXE DA ESPERANZA ás 12.00 h e 19.00 h

Organiza a Insigne Confraría da Virxe da Esperanza

Intervirán membros da Banda de Música do Tercio Norte da Armada Española, que interpretarán ao final das dúas misas a “Salve Mariñeira”.

Celebracións no Santuario do Corpiño

O xoves 25 de marzo terá lugar no Santuario da Virxe do Corpiño a Festa de Inverno – O Corpiño pequeno e conclúe a Novena que se celebra na honra da Benaventurada Virxe María.

Celebraranse eucaristías desde as 9 da mañá. Ás 11 h será a Misa de Enfermos e ás 12 h a Misa Solemne. Esta será retransmitida en directo a través de Facebook: Santuario de O Corpiño.

Pola tarde haberá misas ás 17 e ás 18h.

Este ano, debido á pandemia, non hai procesión.

Inicio do Ano da Familia “Amoris Laetitia” en Lalín

Na mañá do día de San Xosé, o Delegado de Pastoral Familiar, Nicolás Susena, presidía en Lalín a Misa solemne e o comezo do Ano da Familia. Na Eucaristía concelebrada polo párroco, Marcos Torres, tiña lugar a bendición do cadro da Sagrada Familia que vai percorrer toda a Diocese.

Na homilía destacaba Nicolá Susena a «importancia de San Xosé na vida daquela familia de Nazaret, porque sen el a familia estaría incompleta». Ademais, subliñaba que este santo do que apenas coñecemos unha soa palabra pronunciada no Evanxeo «falounos da paternidade ao evidenciar que se trata dunha tarefa educativa e de acompañamento no amor para que os fillos sexan os verdadeiros protagonistas da súa historia».

A homilía concluía sinalando que a familia é un «lugar de comuñón, onde nos pequenos detalles pode comprobarse o amor verdadeiro que se comunica e que xera unha comunidade. María, Xesús e Xosé móstrannos o amor que os uniu e que é unha escola para todos nós».

Ao finalizar a celebración, o Delegado agradeceu ao párroco e á comunidade a acollida do inicio deste singular ano que conxuga a San Xosé e á Familia nun período de tempo. Tamén comunicou que a partir de setembro o cadro comezará o seu itinerario polas principais parroquias da Diocese, volvendo novamente a Lalín por un prazo de días máis longo.

O día 20, o cadro chegou ao Mosteiro da Visitación, onde as Madres Salesas rezan polas familias da Diocese, por todas as familias do mundo e polos froitos deste ano.

[Artigo orixinal]

Encontro en liña sobre a encíclica Fratelli Tutti

A Fratelli tutti chámanos a ser parte activa na rehabilitación de sociedades feridas que pretenden xustificar a indiferenza. Desprenderse dos demais é común hoxe en día, o que fomenta exclusión. Coidemos a fraxilidade de cada home, cada muller, cada neno e cada ancián, con esa actitude solidaria e atenta, a actitude de proximidade do bo samaritano. A proposta de Fratelli Tutti é facernos presentes para aqueles que precisan axuda desde: o sentido social da nosa existencia, a dimensión fraterna da verdadeira espiritualidade, a convicción sobre a innegable dignidade de cada persoa e as profundas motivacións que deberían levarnos a amar e acoller a todos (Cf. Ft 86).

Presentamos o guión para traballo persoal ou en grupo do capítulo segundo da Fratelli Tutti «Un estrano no camiño», e así poder compartir nun encontro en liña que terá lugar o luns 22 de marzo ás 8 na plataforma Zoom. (Para acceder ao guión e ao enlace visitar a web http://daslugo.org/)

A %d blogueros les gusta esto: