Diocese

O Día da Caridade significa a aspiración máis profunda das persoas de boa vontade: que na humanidade enteira non haxa discriminación nin pobreza.

LEMA: As cousas importantes fanse con corazón

O Delegado episcopal de Acción Caritativa e Social, Antón Negro, fixo unha glosa do lema:

Este lema ten unha dobre vertente: teolóxica (hai que destacar o cristianismo de conversión sobre o cristianismode tradición) e social (debe prevalecer a militancia sobre a burocracia). Realmente, as persoas desexan estar posuídas por un ideal antes que ter un simple labor de funcionario. Ademais, as cousas importantes da vida piden unha implicación completa.

A referencia ao corazón é porque nel residen os grandes valores.

No lema fálase de “facer” e tal actividade debe buscar o ben común.

O Director de Cáritas Lugo, Ginés Fernando Plaza, explica que o programa Empresas con corazón, iniciado o mes de xaneiro, ten unha boa resposta por parte das empresas. Ademais da colaboración económica, hai profesionais que durante un tempo aportan os seus coñecementos, e outras empresas fan donativos en especie. É o caso dun hospital que fixo unha doazón de dúas camas especiais para enfermos encamados; ou unha empresa láctea que dará mensualmente 500 litros de leite, que se repartirán nas parroquias.

Segundo o Director de Cáritas, existe sensibilidade cara aos problemas económicos dos demais. E aumenta o número de doantes, pero non a cantidade recadada, porque as contías son menores.

A Secretaria Xeral de Cáritas, Mónica Yáñez, informa dos actos programados:

MÉRCORES 22 DE XUÑO, ás 20 horas PREGÓN DA CARIDADE no Salón Rexio do Círculo das Artes. Conferencia a cargo de José Blanco López (Ministro de Fomento).

XOVES 23 DE XUÑO

– Desde as 10.30 da mañá ata as 13.30 do mediodía, haberá en Lugo, mesas para recoller donativos, atendidas por persoas voluntarias.

– As 18 horas, entrega de Diplomas aos nenos dos colexios de Lugo por parte de D. Alfonso Carrasco, Bispo de Lugo, no Salón de Actos da Fundación Caixa Galicia

– As 19 horas, actividades para nenos/as na Praza de Santa María organizadas polo Servizo de Infancia e Xuventude de Cáritas de Lugo.

DOMINGO 26 DE XUÑO

– Desde as 10:30 da mañá ata as 14 horas, haberá en Monforte, Melide e Lalín mesas para recoller donativos, atendidas por persoas voluntarias.

– Colectas nas Misas de toda a Igrexa Diocesana

As XII Xornadas de Apostolado Seglar iniciáronse cunha conferencia do sacerdote e Delegado de Misóns, Ramón Jacobo Bernárdez.

O Delegado de Misións comezou a súa intervención expoñendo unha serie de necesidades: de diálogo, tanto dentro da Igrexa como co mundo. Tamén se necesita unha Palabra que denuncie e anuncie que é posible vivir todos como irmáns aínda que sexamos diferentes. E necesitase o Espírito para axudarnos a vivir a diferencia en comuñón.

Ramón Jacobo fixo un repaso da historia da misión:

• unha primeira época apostólica, con tres notas dominantes: movemento misioneiro, animado polo Espírito e organizado a partir de pequenas comunidades domésticas.
• séculos II e III, época na que a misión baséase na hospitalidade, o amor mutuo, a caridade cara aos pobres e un gozo irradiado polos crentes.
• séculos IV e seguintes, cando a metodoloxía evanxelizadora cambia: esténdese por socialización e non tanto por unha conversión persoal.
• séculos XV – XIX: a Igrexa implántase en moitas partes do mundo.
• Vaticano II, e o que supuxo de encarnación solidaria fronte a espiritualidade individualista.

A misión non é algo puntual, senón nuclear. Porque a Igrexa, por natureza é misioneira, os cristiáns, os somos misioneiros, ou non somos cristiáns. Ademais, a misión é osixenante, pois permítelle á Igrexa proxectarse máis alá dos límites e das limitacións.

Ramón Jacobo considerou o encontro persoal co Señor e vivir a fe en comunidade como algunhas das condicións necesarias para un bo labor evanxelizador. Labor que non se pode limitar aos países do sur, senón tamén necesario nos países do norte. Entre outras cousas porque un exceso de riqueza é tan prexudicial como unha excesiva pobreza.

O encontro diocesano para clausurar o curso pastoral 2010-2011 será o próximo 17 de xuño, venres, no santuario do Cebreiro.

É un encontro-convivencia para sacerdotes, relixiosos, consagrados e fieis laicos. O motivo é reunirse para dar grazas a Deus por este curso pastoral. Ademais, é unha ocasión para verse, compartir experiencias, rezar e comer xuntos. Preside o encontro o Sr. Bispo.

É necesario apuntarse para a comida e para o desprazamento en autobús desde Lugo. O prezo da comida son 14 € e o autobús 8 €.

O encontro desenvólvese da seguinte maneira:

11:00 h: Acollida – Oración

11:20 h: Reflexión. Dirixe D. Javier Porro, Delegado de Mocidade de Santiago

12:30 h: Descanso

13:00 h: Oración, exposición do Santísimo

14:15 h: Comida

16:00 h: Oración mariana

17:00 h: Fin do encontro

Para inscribirse chamar ao teléfono 982 214 265 antes do 15 de xuño.

O sábado día 11 celébrase no Seminario o día de Fin de Curso. Será unha xornada chea de emocións e de boas novas. Un día con moito ánimo por parte de todos e de agradecemento a aqueles que, poñendo un pouco máis da súa parte, farán pasar un bo rato aos demais ese día 11.

O día 10 de xuño ás oito da tarde no Salón de Actos do Seminario de Lugo terá lugar o primeiro acto. O sacerdote e Delegado de Misións, Ramón Jacobo Bernárdez, falará sobre o “Servizo para a misión”

O día seguinte, sábado 11 ás oito e media da tarde, na Parroquia do Bo Pastor de Lugo, será a Vixilia de Pentecostés, celebración na que os nenos tamén participan.

E o domingo 12 ás 13 horas, Eucaristía na Catedral presidida por D. Alfonso Carrasco, Bispo de Lugo.