Diocese

O día 13 ofrécese aos participantes estranxeiros nos Días na Diocese a oportunidade de coñecer Santiago e para os que xa estiveron alí, visitar a zona sur da provincia: Monforte (visita ao museo das Clarisas, visita e Eucaristía en San Vicente do Pino, comida no Santuario de Cadeiras e tamén visita aos Escolapios e dunha adega na Ribeira Sacra).

Antes de partir, a coordenadora dos Días na Diocese, Ana Sureda, encargouse de facer unha presentación da figura do Apóstolo na igrexa de A Nova (Lugo). O párroco, josé Pérez Barreiro impartiu a bendición.

A xornada do sábado remata cun rosario pola muralla ás 22 horas desde a Porta de Santiago.

O día 12 foi o primeiro día completo da presenza en Lugo dos xoves que participarán na Xornada Mundial da Xuventude. O grupo estadounidense xa estivo facendo o Camiño de Santiago en días precedentes.

Ás once tivo lugar unha Eucaristía na Catedral, presidida polo señor Bispo. A recepción dos peregrinos pode verse en:

www.youtube.com/results?search_query=misa+bienvenida+ded+lugo&aq=f

Os actos trasladáronse a continuación ao Concello, onde dúas concelleiras deron a benvida aos mozos e mozas, regalando a cada participante un exemplar do libro de José Molejón sobre a Historia da ofrenda do Reino de Galicia ao Santísimo Sacramento. Un representante de cada país tivo unha breve intervención na que presentaban o seu lugar de procedencia e expresaban as súas expectativas sobre estas xornadas.

O resto da mañá pasárona os mozos e mozas no edificio da Xunta de Galicia. Alí foron recibidos por un representante do Goberno Autónomo que lles desexou o mellor para a súa estancia en Lugo e Madrid. Seguidamente visionaron un audiovisual sobre a Diocese de Lugo, especialmente a celebración da Semana Santa.

Esta primeira xornada remata ás 22 horas cunha Adoración e Exposición do Santísimo na igrexa de San Pedro de Lugo.

Tres rapaces da nosa Diocese foron seleccionados para participar nos actos centrais da Xornada Mundial da Xuventude con Benedito XVI, practicamente ao seu carón. Desde a organización en Madrid conseguiron que todas as dioceses españolas estivesen representadas nos encontros co Santo Padre e, ademais dos seminaristas que terán un encontro con el, nas celebracións de acollida, na Vixilia e na Misa, un mozo de cada Diocese estará con el no estrado. É unha forma de agradecer á mocidade o seu traballo nas delegacións diocesanas durante o tempo de preparación da Xornada Mundial da Xuventude.

Os agraciados son: Antonio Torres e Iria Ramos, de Lalín e Patricia Pérez, de Lugo.

O 3 de agosto, presentouse a camiseta que levarán os mozos da Diocese de Lugo participantes na Xornada Mundial da Mocidade.

Na entrada da fábrica de Florentino (polígono  industrial “Lalín 2000”), o deseñador lalinense fai entrega pública dunha camiseta ao Delegado de Mocidade da Diocese de Lugo, Marcos Torres.

O deseñador lalinense Florentino Cacheda desexa colaborar activamente coa Xornada Mundial da Mocidade .  En palabras do propio deseñador “as camisetas son moi modernas e xuvenís”. Florentino pretende que, a través desta peza de roupa, todos os mozos do mundo recoñezan e coñezan aos mozos da Diocese de Lugo; por iso, “as camisetas serán únicas”.

O deseño exclusivo das 400 camisetas inspírase na Eucaristía e na mocidade.

O 19 de xullo, no Salón de actos do Seminario, o Delegado de Mocidade, Marcos Torres, e a coordinadora dos Días na Diocese, Ana Sureda, presentaron os actos, os colaboradores e as novidades relacionadas coa Xornada Mundial da Xuventude.

Nos días previos, uns 1000 xoves (norteamericanos, brasileños, venezolanos, australianos, irlandeses, arxentinos, italianos…) pasarán pola Diocese. Os grupos con máis participantes estarán aloxados en pavillóns e albergues públicos e privados; os menos numerosos repartiranse por casas particulares e congregacións. Segundo Ana Sureda, “trátase de que vivan uns días entre nós, coñecendo o que somos e o que temos”. Tamén explicou que estas acitividades en Lugo son posibles grazas a que hai moitos e moi bos colaboradores. Así, por exemplo, xa son 25 as familias acolledoras, hai voluntarios xoves e maiores, as institucións (Concello, Xunta, Subdelegación do Goberno) mostraron interese e a duquesa de Lugo é madriña de honor dos actos.

Marcos Torres sinalou que a participación de Lugo na Xornada Mundial da Xuventude leva preparándose un ano, con visitas a grupos de xoves das parroquias. Uns 200 xoves, sobre todo das cidades de Lugo e Lalín, uniranse aos 2,5 millóns que acompañarán ao Papa nun encontro histórico aberto a crentes e non crentes. Ademais, Marcos Torres, informou que os participantes pola Diocese de Lugo levarán unha camiseta, cunha referencia especial á Eucaristía e á mocidade, que elabora o deseñador lalinense Florentino.