Diocese

Presentación e Memoria de Obras Misionais Pontificias e Delegación Diocesana de Misións de Lugo

Preséntase a Memoria económica do curso 2021-2022. Non son simples números, senón que detrás de cada cifra hai un esforzo e sacrificio de persoas, comunidades, colexios. Desta maneira faise visible na diocese de Lugo o desexo de Paulina Jaricot, fundadora da Obra Pontificia Propagación da Fe, de crear unha rede universal de solidariedade e axuda ás misións.

O ano 2022 está a ser especial para as OMP. Cúmprense 400 anos da fundación da Congregación para a Evanxelización dos Pobos; 200 anos da fundación da Obra Propagación da Fe por parte de Paulina Jaricot, que acaba de ser beatificada en xuño; e 100 anos desde que o Papa Pío XI fixese pontificias as diversas obras misioneiras, de xeito que se crearon as Obras Misionales Pontificias (OMP). Todas estas celebracións axudan a dar un impulso misioneiro á diocese.

A nivel económico, procúrase reducir os gastos o máis posible –contamos coa axuda da diocese para conseguir este obxectivo- e pénsase como aumentar os ingresos. Todo o que se fai é en beneficio da misión. Contamos convosco coas achegas e oracións de todos. En nome de todas as comunidades que van recibir estas achegas, moitísimas grazas.

Pídeselle a san José María Díaz Sanjurjo que axude a renovarnos para que a misión ad gentes siga sendo un dos piares da vida das nosas comunidades.

[Memoria]

Jesús Manuel Santiago Vázquez

Delegado de Misións de Lugo

[Artículo original]

Xornada polo Traballo Decente

O 6 de outubro Marica Campo leu o Manifesto do Traballo Decente 2022

O 7 de outubro celébrase a Xornada polo Traballo Decente e con tal motivo hai varios actos en Lugo organizados por Igrexa polo Traballo Decente, Cáritas, Confer, HOAC, Fundación Juan Soñador e Taller de Solidariedade. O tema central será o das mulleres que traballan como empregadas de fogar. O primeiro dos actos foi o xoves 6 de outubro ás 20 h na igrexa Santiago a Nova, onde se celebrou a Eucaristía e ao seu remate a escritora Marica Campo fixo a lectura do Manifiesto polo Traballo Decente.

E para o venres 7 de outubro no Vello Cárcere está programado o seguinte:

Ás 19 h a coordinadora xeral da asociación Mobilidade Humana e secretaria da Rede de Mulleres de América Latina, Soledad Lucero, ofrecerá unha breve exposición sobre a experiencia das mulleres que traballan como empregadas de fogar e como coidadoras.

Ás 19:15 haberá unha mesa redonda moderada polo párroco de San Francisco Xavier, Jesús Fernández Aira, e na que intervirán:

  • Ana Pereiro, Secretaría de Política Social de UXT;

  • Carmen Seoane, Secretaría Igualdade e Muller de CC.OO. ;

  • Javier de Cominges, avogado e profesor;

  • Juan José Rodríguez, director provincial do INSS e da TXSS de Lugo;

  • Laura Arrojo, Secretaría da Muller de CIG Lugo-A Mariña;

  • Silvia Alonso, Concelleira de Muller e Igualdade do Concello de Lugo

[Carta pastoral de Mons. Alfonso Carrasco] [Manifesto]  [Nota da Pastoral Social da Conferencia Episcopal]

Semana das persoas migrantes e refuxiadas

Entre os días 26 e 30 de setembro a Pastoral de Migrantes realiza na cidade de Lugo as seguintes actividades:

Luns 26 de setembro, Vello Cárcere ás 20 h

Mesa redonda con organizacións sociais de Lugo que atenden a persoas migrantes (Accem, Acnur, Cáritas, Diaconía)

Martes 27 na Praza Maior, ás 20 h

Círculo de silencio. Trátase dunha acción en solidariedade coas persoas inmigrantes e de reivindicación dos dereitos de todas as persoas, seguindo o camiño da nonviolencia, para poñer a conciencia por riba da lei.

Mércores 28 no Vello Cárcere ás 20 h

Conferencia a cargo de Vladimir Grigoriev (Bielorrusia) sobre “Acompañamento espiritual a migrantes. Inculturación mutua”.

O sacerdote Vladimir forma parte da Asociacion Koinonia Juan Bautista Oasis de Astorga, comunidade evanxelizadora integrada por familias, laicos, consagrados e sacerdotes que comparten a mesma chamada, misión e espiritualidade.

Venres 30 na Biblioteca Pública da Avda. Ramón Ferreiro, Lugo, ás 20 h

Representación da obra teatral de David Bingong Un soño con trampa

A alegría de ser catequistas

Bota a andar un novo curso de catequese e querémolo emprender con moito ánimo. Lembrade: o alento do Señor Xesús precédenos e empúrranos dende sempre.

Este curso teremos como lema “A alegría de ser catequistas”. Esta frase recolle a esencia daquelas persoas que ano tras ano se entregan con xenerosidade a misión de transmitir a fe nas nosas parroquias. Unha alegría que brota do encontro co Señor. O Papa Francisco convídanos a unha nova etapa de evanxelización marcada pola alegría (Evangelii gaudium)

Que alegría ser catequistas chamados polo mesmo Señor Xesús!
Nas nosas mans está a encomenda de axudar a cativos e familias a medrar en amizade con Xesús e no coñecemento da Igrexa.  Ben certo, atoparemos atrancos coma a saturación de actividades, os horarios e as presas… mais non nos ha faltar o Espírito que vive na comunidade e nos inspira e move á acción.

Que alegría ser catequistas que prestan as súas capacidades e o seu tempo nas nosas comunidades cristiás! Esta antiga vocación renova decote na Igrexa o compromiso de proclamar a nosa fe, de pasar uns a outros o testemuño pascual: Cristo Vive!

Que alegría ser catequistas e celebrar collidos das mans a presenza do Deus Amor! É o Señor quen nos convida a comer e beber o pan e o viño da alegría e da fraternidade.

Que alegría ser catequistas que coidan os pequenos detalles! A fe emerxe das cousas pequenas de cada día: do acoller, do empregar palabras sinxelas e doces, do ter xestos de complicidade coas familias, do sorrir, do collerse das mans…

Que alegría ser catequistas e contaxiar a alegría do Evanxeo!

Departamento de Catequese

Delegación Episcopal para a Educación na Fe da Diocese de Lugo

[Folleto explicativo do cartel e suxestións para a 1ª reunión]

Xornadas Europeas do Patrimonio

A Diocese de Lugo súmase à celebración das Xornadas Europeas de Patrimonio, este ano baixo o lema “Patrimonio Sostible”. As primeiras actividades programadas son as seguintes:

O día 14 na igrexa de Santa Mariña de Folgoso do Courel, a restauradora María Teresa López Pérez presenta o relatorio “Restauración do Retablo da Virxe do Rosario”. O obxectivo é mostrar ao público os procedementos necesarios para protexer, conservar e restaurar os bens culturais, neste caso, bens de uso cultual e litúrxico en uso e sensibilizar sobre as técnicas e materiais que se usan en restauración. A todos os asistentes entrégaselles o libro O Courel. Bajo la cruz de Santiago, s. XII – s. XIX

E outra actividade será o sábado 17 de setembro en horario de 10 a 14 horas. Consiste nunha procura de once representacións animais distribuídas pola Catedral de Lugo e o Museo Diocesano Catedralicio. Á entrada da Catedral entregarase aos visitantes un cartel coas once representacións animais que deben buscar e que pertencen a obras de distintos séculos e estilos.

A actividade será conducida polo director do Museo Diocesano Catedralicio de Lugo, Marcos Calles, o cal durante o horario da actividade axudará aos visitantes, explicará a relevancia histórico-artística de cada peza artística, así como a importancia da conservación de cada unha destas obras que forman parte de nosa historia. Actividade sen custo adicional ao prezo da entrada.

A %d blogueros les gusta esto: