Catedral

Percorrido pola arquitectura funeraria da Catedral

O luns 31 de outubro ás 17h. na Catedral e no Museo Diocesano Catedralicio de Lugo realizarase durante 45 minutos a actividade denominada “O patrimonio funerario na Catedral de Lugo máis aló do sepulcro de Santa Froila”. O obxectivo é valorar o impresionante conxunto de obras de tipo funerario que se distribúen polo templo, máis aló da peza ben coñecida, sita na Capela de San Froilán, o medieval sepulcro de Santa Froila.

No Museo explicaranse a tumba romana e as lápidas funerarias medievais da vila de Rábade.

A tumba do Cabaleiro Vasco Pérez de Viveiro, no transepto, as tumbas dos García de Gayoso na Capela do Pilar ou a de Pedro da Cal e Catalina da Pena na do Ecce Homo configuran un magnífico exemplo de arquitectura funeraria dos séculos XV a XVII. A gótica xirola da Basílica tamén será centro de atención polas tumbas sitas na Capela de San Xoán ou na Capela de Santiago, poñendo énfase na Capela da Nosa Señora dos Ollos Grandes, a cal non ten ningunha sepultura no seu interior como parte do voto que os cóengos debían realizar ao entrar no Cabildo.

A Capela Maior da Catedral tamén foi secularmente lugar de enterramento destacado, sendo o lugar de eterno descanso de prelados do século XVIII como Francisco Yzquierdo Tavira, Manuel Santa María Salazar ou Lucas Bustos de la Torre. Tamén o Bo Xesús é lugar de enterramentos de bispos, sendo un caso destacado o do prelado do século XIX Santiago Rodríguez Gil.

A actividade remata na zona visitable do claustro, onde se lembrará aos ilustres cóengos que descansan no cemiterio capitular, construído no corredor sur do claustro en 1803. Sacerdotes como Francisco Vázquez Saco ou Ángel Garrote comparten espazo con outros como Alfredo Lorenzo López, insigne fundador do Museo Diocesano de Lugo.

Na actividade lembrarase a función inicial da Catedral como lugar de enterramento ao longo das súas naves, transepto ou xirola, estipulando os prezos de cada zona e localizando as tumbas de personaxes importantes para a historia de Lugo como Juan Pallares Gayoso (autor do Argos Divina) ou Tomás Ramírez de Arellano (patrocinador da fachada do Bo Xesús).

A actividade terá un custo de 2 euros, contando coa participación de persoal da Catedral e o Museo Diocesano Catedralicio de Lugo. As inscricións poden facer por teléfono no 683 166 703 ou por email na dirección: catedraldelugo@artisplendore.com.

Organizan: Artisplendore, Catedral de Lugo, Delegación de Patrimonio Histórico-Artístico e Museo Diocesano Catedralicio de Lugo.

Celebración da Asunción da Virxe na Catedral

O luns 15 de agosto celebrouse na Catedral a solemnidade da Asunción da Benaventurada Virxe María. Presidiu a Eucaristía Mons. Alfonso Carrasco Rouco, que se referiu na homilía á salvación da humanidade como algo que ten lugar cando “acolle o don de Deus, a súa graza, e aceptan os homes que non son os señores da historia… O mundo triunfará coa Virxe, con Deus, que van desvelando a verdade das cousas”. Tamén sinalou o Sr. Bispo, que é a graza de Deus o que sostén a vida de todos nós, que estamos destinados a ser redimidos. “Na Asunción isto realízase na Virxe María, no seu corpo e na súa alma… É unha gran patroa que nos invita a confiar nela, en Deus”.

 Nesta celebración da patroa da Diocese, a Virxe dos Ollos Grandes, estivo unha representación do Concello.

Celebración da solemnidade do Corpus

O domingo 19 de xuño, solemnidade de Corpus Christi, ás 11h na praza de Santa María (sempre que o permitan as condicións meteorolóxicas, e de non ser así sería na catedral) celébrase a Eucaristía de Corpus presidida polo Bispo de Lugo, Mons. Alfonso Carrasco.

Acompañarán a celebración o Orfeón Lucense, a Banda Filharmónica de Lugo e o Coro do Hospital. Estrearase unha obra do sacerdote e músico José Castiñeira, Misa Solemne a 5-6 voces, con arranxos de Uxío Domínguez. A continuación, procesión polas rúas da cidade.

A partir das 10.30 h na igrexa dos Franciscanos, a Xunta de Confrarías de Semana Santa de Lugo, repartirá pétalos de flores para arroxar ao paso do Santísimo.

Antes, durante e ao finalizar a procesión actuará o grupo “Os Xílgaros de Lugo”, dirixido por Óscar Pérez.

Por outra parte, entre os días 18 e 26 de xuño ten lugar na Catedral a Novena na honra ao Santísimo Sacramento “A Eucaristía, a Alianza das alianzas”. O predicador será o Delegado Episcopal de Laicos, Familia e Vida, Nicolás Susena Presas. O último día da Novena coincide co día no que se clausura o Ano da Familia.

Horario: ás 19:30 h Rosario e ás 20 h Eucaristía

Exposición de prataría no Museo Diocesano Catedralicio

O xoves 16 de xuño, ás 18.30 h no Museo Diocesano Catedralicio de Lugo (MDCL) inaugúrase a exposición temporal Adoro te Devote. Preséntanse un total de 25 custodias, ostensorios ou virís pertencentes a diversas parroquias da Diocese de Lugo, así como á propia Catedral. Preséntanse pezas de mestres como Rañoi, Somoza ou Meneses.

Nesta inauguración farase un percorrido guiado para os asistentes a cargo do delegado de Liturxia, Relixiosidade Popular e Patrimonio Histórico Artístico da diocese, José Antonio Ferreiro, e do director do Museo, Marcos Calles.

O conxunto da mostra representa un percorrido temporal da evolución destas pezas litúrxicas ao longo do últimos cinco séculos: XVI – XX.

Destaca excesivamente na exposición a custodia de asento regalo do prelado don Diego Castejón Fonseca, regalada na primeira metade do século XVII e que foi a utilizada na primeira Ofrenda de Galicia realizada en 1672.

A decoración das custodias será un dos puntos centrais da mostra, realizando un repaso da iconografía que inclúe desde o Barroco ao estilo Neogótico.

A exposición, que está promovida pola Diocese de Lugo, estará aberta do 16 de xuño ao 31 de xullo de 2022, no horario de apertura do museo. Están previstas outro tres visitas guiadas gratuítas a cargo dos responsables da mostra.

Esta iniciativa complétase coa utilización dos medios audiovisuais do MDCL, incluíndo diapositivas referentes á investigación sobre as custodias (por exemplo as marcas de prateiros) ou sobre a localización das pezas. Por iso hai colocados banners con infografías relativas a esta selección de obras de prataría.

Hai unha primeira visita guiada o 20 de xuño ás 17 horas . As vindeiras serán anunciadas na conta de twitter do Museo.

Intervencións no Congreso “O Mundo das Catedrais”

O 15 de xuño a Diocese de Lugo estará representada no Congreso Internacional VIII Centenario da Catedral de Burgos: O Mundo das Catedrais.

Ese día intervirá o director do Museo Diocesano Catedralicio de Lugo, Marcos Calles, coa comunicación “A evolución dos órganos da Catedral de Lugo durante a Idade Moderna”. E pola súa parte, o delegado Episcopal de Liturxia da diocese, José Antonio Ferreiro Varela, e o director do Departamento de Patrimonio Histórico-Artístico, Jesús Salvador López, presentarán unha investigación que leva por título: “Iconografía de San Froilán. A devoción polo Patrón na Catedral de Santa María de Lugo”.

A %d blogueros les gusta esto: