Catedral

Música na Catedral de Lugo


Solo Voces No ano 1992 presentábase Solo Voces ao público e 25 anos despois celebra este aniversario cunha interpretación do mellor do seu repertorio. Será nun acto organizado polo grupo vocal e coa colaboración da Catedral de Lugo, onde será o concerto o domingo 19 de novembro ás 20:45h. Ademais de Solo Voces, dirixido por Fernando Gómez Jácome, escoitaranse as voces de Luis Varela Castiñeira, David Varela Vázquez e Daniel Gil González e os instrumentos de José Ignacio Castro Lozano (sacabuxa e frauta tenor) e de Andrés Díaz Pazos (baixón, baixonciño alto e frautas).

 Programa:

  • Asperges me, de Melchor López Jiménez

  • Sancta María succurre miseris, de Tomás Luis de Victoria

  • Magnificat

  • Motetes de advento, de Diego de las Muelas

  • Crudelis Herodes, de José Pacheco

  • Adjuva nos, de José Mª Álvarez

  • Circumdederunt me gemitus mortis, de Cristóbal de Morales

  • Sicut cervus, de Palestrina

  • Benedictus Dominus Deus meus, de Manuel Méndez

  • Beati omnes qui timent, de Manuel Méndez

As dúas primeiras pezas e as dúas últimas son do Arquivo da Catedral de Lugo.

 

Santa Icia

O 22 de novembro ás 8 da tarde, celebración de Santa Icía, patroa dos músicos, con intervención de coros e agrupacións da cidade de Lugo.

Aniversario de renovación da Indulxencia na Catedral de Lugo

O 13 de novembro na Catedral conmemorouse que había un ano se renovara a concesión da Indulxencia plenaria cotiá e perpetua. O primeiro acto foi un relatorio do Delegado Episcopal de Santuarios e Peregrinacións José Criado, que falou da “Indulxencia, experiencia de reconciliación”. Para explicalo puxo o exemplo dunha persoa a que lle trasplantan un corazón: o novo órgano salva a vida do paciente (o equivalente sería o perdón do pecado no sacramento da reconciliación). Pero trala operación cirúrxica, hai que pasar por un período de observación, coidados… ata chegar á recuperación total. Pois ben, cando a persoa peca hai unha pena temporal pero grazas á indulxencia lógrase a plena purificación. É como se o paciente trasplantado se librase de pasar polo período postoperatorio.

Tras o relatorio, houbo adoración ao Santísimo, e a continuación a Eucaristía presidida polo Bispo Mons. Alfonso Carrasco. Na súa homilía expresou o seu desexo de que o privilexio da Indulxencia axude aos diocesano e aos visitantes a confiar máis no Señor.

Aniversario da renovación da Indulxencia Plenaria

A Catedral de Lugo acolle o 13 de novembro ás 19h uns actos para conmemorar que hai un ano se renovou a concesión da Indulxencia Plenaria cotiá e perpetua.

  • 19h Relatorio do Delegado Episcopal de Santuarios e Peregrinacións José Criado: “Indulxencia, experiencia de reconciliación”

  • 19:30h Adoración ao Santísimo para gañar a indulxencia

  • 20h Eucaristía solemne presidida polo Bispo D. Alfonso Carrasco

    [Máis información]

A Catedral acolle a inauguración do Curso Pastoral da Diocese

O luns, 2 de outubro, ás 20 h na Catedral de Lugo iníciase oficialmente o Curso Pastoral 2017-18 cunha Eucaristía presidida polo Bispo Mons. Alfonso Carrasco. Participarán membros de organismos, asociacións, movementos, catequistas, profesores de Relixión da Diocese…

As principais liñas da acción pastoral da Diocese para este curso son as seguintes:

1.- Comunidades como verdadeiras escolas de fe. É necesaria a presenza próxima do fiel cristián, do Pobo de Deus como realidade perceptible, experimentable nas nosas comunidades, coas súas tradicións, iniciativas e celebracións, para que exista unha verdadeira escola na que se cultive a fe.

2.- Prioridade da catequese. Sen dúbida un instrumento fundamental para a educación na fe e parte principal da actividade pastoral.

3.- Continuar a reorganización pastoral da Diocese. Vontade de axeitar as nosas estruturas para que sirvan mellor á tarefa da evanxelización. O anuncio do Evanxeo pasa pola constitución de lugares de referencia, vivos, próximos, en que estean presentes os trazos esenciais da fe: a palabra e os sacramentos, a unidade e a caridade. Iso non diminuirá o valor das parroquias máis pequenas, ás que se continuará coidando como parte de nosa propia identidade.

4.- Valorar, apoiar e aproveitar os privilexios da nosa Catedral (Indulxencia plenaria permanente e perpetua) e de O Corpiño (Ano Xubilar Mariano).

Reapertura do Museo Diocesano-Catedralicio de Lugo

O 23 de xuño tivo lugar o acto de reapertura do Museo Diocesano – Catedralicio de Lugo. O Bispo de Lugo, Mons. Alfonso Carrasco Rouco, acompañado do presidente da Xunta, Alberto Núñez Feijoo, e outras autoridades inauguraron oficialmente a reapertura deste Museo.

O bispo de Lugo afirmou que “a fondura da vivencia dos nosos antepasados, relixiosa e, máis en concreto, cristiá, visibilízase aquí especialmente no conxunto de pezas dedicadas ao misterio da Eucaristía, como representándonos en palabras de arte o antigo lema de Galicia: hic hoc mysterium fidei firmiter profitemur.
Proseguiu recordando que “esta experiencia de fe segue viva entre nós, de modo que a visita pode converterse en encontro, nun momento en que resoen de novo as fibras do noso corazón, non só por sentir próxima a presenza dos nosos maiores e nosas mesmas raíces, senón tamén por axudarnos a recordar e a descubrir de xeito novo a beleza e o valor inapreciable daquilo no que cremos e esperamos”.

Mons. Carrasco quixo agradecer o traballo de tantas persoas e institucións neste museo: “O Museo é, por fin, unha obra feita posible pola colaboración tamén hoxe de homes e mulleres de Igrexa, da Diocese de Lugo e da Xunta de Galicia, asumindo a súa responsabilidade para co noso patrimonio histórico artístico”.

[Ver álbum fotográfico]

A %d blogueros les gusta esto: