Cáritas

Campaña de Cáritas “Grazas a ti, poden elixir”

Durante este Nadal tan singular e complicado, Cáritas Diocesana de Lugo anima a colaborar coas persoas que afrontan estas datas nunha situación de maior vulnerabilidade. Por iso, levan a cabo a campaña “Grazas a ti, poden elixir”, mediante a cal poden adquirirse tarxetas solidarias de diferentes contías económicas que se utilizarán para que as persoas en necesidade poidan realizar a compra dun xeito normal.

Estas tarxetas poden comprarse en supermercados colaboradores de Lugo e realizando un donativo a través da páxina web www.caritaslugo.es

[Máis información]

Xornadas de formación organizadas por Cáritas: “Migrantes con Dereitos”

O Programa de Voluntariado de Cáritas Diocesana de Lugo, organiza xornadas de formación de voluntariado que levan por título “Migrantes con Dereitos”.

Este ano serán unhas xornadas adaptadas ás medidas de prevención da Covid-19, con cabida limitada e por iso, repartidas por varios puntos da Diocese de Lugo, para que cheguen ao maior número de voluntarios posible. A formación do voluntariado é unha peza importante para o desenvolvemento do seu labor e o seu achegamento ás persoas que son atendidas nos diferentes programas e parroquias.

As xornadas servirán para que as persoas voluntarias coñezan o funcionamento dos programas desenvolvidos por Cáritas Diocesana coa poboación inmigrante. Para iso cóntase cos coordinadores do Programa Participa connosco e do Programa Contade connosco.

A primeira xornada é o 18 de novembro na sede que Cáritas Diocesana de Lugo ten na Avda. Américas e as posteriores serán nos seguintes días e lugares:

  • Melide: 25 de novembro

  • Silleda: 10 de decembro

  • Monforte: 16 de decembro

Curso de iniciación á cociña organizado por Cáritas

Cáritas inicia o proceso de selección para participar no curso de “Iniciación á Cociña” que desenvolverá o Programa de Emprego en Monforte de Lemos.

Este curso está dirixido a persoas que se atopan en situación de desemprego e teñan interese por formarse nos labores propios dun Axudante de Cociña: Preelaborar alimentos, preparar e presentar elaboracións culinarias sinxelas e asistir na preparación de elaboracións máis complexas, executando e aplicando operacións, técnicas e normas básicas da manipulación, preparación e conservación de alimentos.

Os interesados en participar deben chamar ao 604 07 47 62

Vídeo de Cáritas “Como na casa, en ningures”

Cáritas Diocesana de Lugo presenta o documental Maiores no rural. Como na casa, en ningures con testemuños de varias persoas da Montaña lucense que apostaron por seguir vivindo no seu lugar habitual a pesar de que viven soas a maior parte do ano ou de que viven nalgunhas aldeas con moi pouca poboación. Gloria, Arsenio, Marisa, Jesús e máis persoas maiores que residen no rural quixeron compartir con todos as súas vivencias, os seus medos, a súa vitalidade, a súa sabedoría e as súas alegrías.

[Ver vídeo]

Cáritas alerta de que estafadores intentan conseguir datos persoais

Cáritas Diocesana de Lugo detectou unha estafa consistente en que persoas que son atendidas na Diocese están a recibir unha mensaxe por WhatsApp co logotipo da organización caritativa. Na mensaxe di que se poden recibir axudas de 1000 euros notificando o número de conta.

Non se lle pode dar á ligazón nin compartir a mensaxe.

En Cáritas Diocesana de Lugo NUNCA piden información persoal e sensible por WhatsApp nin por ningunha outra rede social.

Ante calquera dúbida, consultar as canles habilitadas para ese efecto tanto na páxina web da Cáritas Diocesanas como na web de Cáritas Española, ou a través dos servizos de atención telefónica da Cáritas máis próxima.

A %d blogueros les gusta esto: