Bispo

Publicacións Diócesis de Lugo vén de publicar o traballo de Mons. Alfonso Carrasco titulado Para una comprensión cristiana del Camino de Santiago. O Bispo considera a ruta xacobea como “un fenómeno espiritual de primeira orde na Igrexa e a sociedade actual”. Mons. Alfonso Carrasco escribe sobre a peregrinación en xeral, sobre a historia do Camiño de Santiago e sobre a peregrinaxe como tempo de verificación da fe.

A publicación complétase cunha sección que recolle textos do Novo Testamento axeitados para ser lidos, por exemplo, polos peregrinos, varias oracións e un espazo para anotacións persoais.

 

Un ano máis, a Igrexa celebrará a Xornada das Comunicacións Sociais no día da Ascensión do Señor, o próximo 20 de maio. Dende o seu inicio as Xornadas fixeron un especial fincapé na importancia dos medios de comunicación de cara á evanxelización, e consecuentemente na urxencia dunha formación que permitise levar a cabo ese obxectivo dun xeito profesional e efectivo.
A identidade mesma da Igrexa está constituida por unha misión de comunicación. Ela sabe que existe ao servizo da mellor das mensaxes, a Boa Noticia da salvación. E de feito, ao longo da historia, sempre utilizou os medios máis adecuados e as novas plataformas que ían aparecendo para cumprir a sua misión.
A utilización de novas técnicas ou medios de comunicación estaba destinada a anunciar e facer máis accesible o Evanxeo. Por iso, a Igrexa sempre se preocupou tamén de que as formas de transmisión servisen aos contidos e non os traizoasen, na música, na escultura, na pintura, etc., ata chegar ao uso da imprenta na época moderna. Hoxe en día, a nova cultura mediática introduce técnicas e necesidades novas, e, en primeiro lugar, a urxencia da información, que forma xa parte esencial do proceso de comunicación. Tamén aquí os contidos deben ter formas de expresión axeitadas, de modo que o acontecer eclesial faga presente no panorama dos medios a vida nova que nace do Evanxeo.
A novidade quizais máis grande está, non obstante, en que cada persoa pode ser xa non só receptor, senón tamén emisor de contidos, o que abre novas frontes e posibilidades á labor comunicativa da Igrexa. Cada vez máis persoas achéganse á rede deixando preguntas e buscando respostas sobre ás interrogantes últimas da existencia: quen son eu?, que podo saber?, que podo facer?, que podo esperar? A rede preséntasenos así como unha “ágora” nova, que multiplica os contactos e as ocasións de diálogo, e que pode mesmo conducir a relacións e encontros persoais, imprescindibles para a transmisión da fe.
Na mensaxe deste ano para a Xornada das Comunicacións, o noso Papa invítanos a aproveitar a ocasión de acercarnos a todas estas persoas coa proposta da Palabra e tamén do silencio. Pídenos logo que fagamos un alto no frenético ritmo do mundo mediático, que saibamos ir máis alá das cuestións técnicas, para chegar a utilizar as vantaxes das tecnoloxías da información en beneficio da persoa. O Papa recórdanos que “aprender a comunicar quere dicir aprender a escoitar, a contemplar, ademais de falar, e isto é especialmente importante para os axentes de evanxelización: silencio e palabra son elementos esenciais e integrantes da acción comunicativa da Igrexa para un renovado anuncio de Cristo no mundo contemporáneo”.
Esta unidade de palabra e de silencio é de grande importancia nas circunstancias actuais, ante a enorme cantidade de información que entra e afecta cada vez mais á nosa existencia cotiá por medio sobre todo da presenza constante de medios audiovisuais e dunha inmensa rede globalizada de comunicación.
Benedito XVI recoñece o feito e a importancia destas novas tecnoloxías, e ao mesmo tempo que non se bastan por sí soas. A persoa segue a ser determinante en todo proceso de comunicación, na transmisión e na recepción da mensaxe. Pois tamén aquí é verdade que o home non se salva grazas a novas técnicas, senon ao encontro con Aquel que é a Verdade e a Vida, Xesucristo o Fillo de Deus.
O seguimento da sua Persoa, nun silencio íntimo e atento, é o principio permanente dun cambio cualitativo tamén na nosa forma de comunicación, na nosa capacidade de escoitar e acoller a quen se nos achegue, e na de transmitir os contidos do Evanxeo. O silencio, no que respira o noso corazón, é compañeiro inseparable da palabra, e non pode quedar na sombra polas urxencias da inmersión nas novas tecnoloxías ou da capacitación para o seu uso.
Se sabemos acoller realmente na nosa interioridade a Palabra do Señor, crecerá sempre tamén o interés polas novas plataformas de información, que poden axudar ao home de hoxe a vivir e compartir momentos de reflexión, e mesmo a encontrarse con un testemuño noso dado á palabra de Deus.
Que María, que gardou no corazón todas as palabrasdo seu Fillo e meditounas caladamente, nos axude a escoitar sempre ao Señor e ao irmán, e a saber ir ao encontro de quen necesite unha palabra de esperanza, facéndolle presente a verdadeira Boa Noticia por todos os medios que ofrecen hoxe as tecnoloxías da información.
+ Alfonso Carrasco Rouco
Bispo de Lugo

O programa da visita pastoral do señor Bispo á parroquia de San Froilán, de Lugo, é o seguinte.

– Venres, 11 de maio

Ás 8 h. Confirmacións (17 nenos/as e mozos/as)

– Domingo, 13 de maio

· Ás 12 h. Misa Estacional.

· Ás 13 h. encontro cos fieis no Salón Parroquial.

– Luns, 14 de maio

· Ás 10:00 h. visita ao colexio da Milagrosa e á Comunidade das Fillas da Caridade.

· Pola tarde, encontro cos grupos, movementos e colaboradores da parroquia e Eucaristía.

– Martes, 15 de maio.

· Ás 11 h. visita á Comunidade das Nais Agostiñas.

· Ás 12:30 h. Visita aos residentes e á Comunidade das Irmás da Cruz.

· Pola tarde, visita a algúns enfermos da parroquia e Eucaristía.

– Mércores, 16 de maio

· Visita á Alianza en Xesús por María e Eucaristía.

ALGUNHAS ACTIVIDADES MAIS DO SEÑOR BISPO O DÍA 11 DE MAIO

O Bispo de Lugo participa na presentación da colección “Mosteiros e Conventos”

O Bispo de Lugo, Mons. Alfonso Carrasco Rouco, participa no acto de presentación da colección “Mosteiros e conventos” da editorial Hércules, o venres 11 de maio, ás 11.30 h, na sala multiusos do Museo Provincial de Lugo.

Nesta presentación tamén participa o profesor titular de Historia Medieval da Universidade de Santiago de Compostela, José Miguel Andrade Cernadas.

A colección “Mosteiros e conventos” pretende facer unha homenaxe e recoñecemento da importancia histórica e cultural destes lugares de espiritualidade, así como resaltar a importancia que a súa existencia representou e representa para a sociedade.

 

O día 11, Eucaristia ás 13 h na Catedral

O mesmo día 11 Mons. Alfonso Carrasco Rouco preside unha Eucaristia ás 13 h na Catedral á que asisten centenares de ex traballadores de Telefónica do noroeste de España.

O pasado día 21 de marzo, o señor Bispo, D. Alfonso Carrasco Rouco administrou a Unción de Enfermos na igrexa de Monterroso.

No templo desa vila asistiron unhas corenta persoas. O conxunto da colecta destinouse ao Comedor “San Froilán” de Lugo.