O venres 30 de decembro, de 9 a 10 da noite, será a Vixilia de fin de ano da Adoración Nocturna. Na Catedral de Lugo celébrase unha Eucaristía de acción de grazas polos beneficios recibido durante o ano. Tamén se pedirá axuda e fortaleza para seguir adorando pola noite a Cristo en representación de toda a Igrexa.
A Nosa Voz
Falecemento do sacerdote D. José García González
D. José García González, sacerdote de Lalín, faleceu o pasado día 28. O funeral é o día 29 ás 5 da tarde en Méixome, onde nacera o 23/12/1925. Levaba as parroquias de Sello (Santiago) e Palmou (San Xoán). Tamén se encargara das parroquias de Bermés, Vale, Senra, Asperelo, Riobóo, Río e Camba.
Actividades da Fundación O Noso Lar
A fundación O Noso Lar invita aos anciáns de Samos que vivan sós a pasar con eles os días de Noiteboa, Nadal, Ano Vello e Aninovo.
Concretamente, será entre os días 24 e 26 no Priorado de Lóuzara e do 30 de decembro ao 2 de xaneiro en Lousada. Os maiores estarán acompañados, recibirán comida, cea e almorzo. Para participar abonda con poñerse en contacto co Noso Lar. Se non quedan a durmir nos locais da Fundación, poden facelo nas súas casas, pois van a buscar e levar ás persoas que o soliciten.
Novo libro de D. Jaime Delgado
A obra titúlase Dos primicias histórico-arqueológicas.
Na primeira parte do libro resaltan tres detalles históricos: O Camiño de Santiago tiña identidade propia ben definida polo menos desde o século XII, o culto ao Apóstolo está documentado desde o século IX e varias parroquias que antes tiñan como titulares San Salvador e Santa Marta fixeron o cambio polo padroado de Santiago.
A segunda parte do libro conta a historia da confraría e irmandade “Glorioso Victorio” da Pobra do Brollón. Tamén se fala do santo e da capela a el adicada no mencionado Concello.
Disco da Coral do Hospital de Lugo
A Coral do Hospital de Lugo vén de publicar o seu segundo disco “Vinte anos cantando” co que queren facer chegar aos seus seguidores e amigos unha pequena mostra do seu traballo: un repertorio galego e internacional con 8 temas do seu anterior disco e 14 temas novos. Este ano 2011 tamén publicou o segundo DVD, que recolle o concerto celebrado no Hospital para conmemorar o 20º aniversario da agrupación musical.