A Coral Hospital de Lugo organiza un concerto (pre-Nadal) o día 15 na igrexa de Santiago A Nova de Lugo ás oito e media. Intervirán a Coral Estradense, Cantardelas e a Coral Hospital de Lugo.
A Nosa Voz
Encontro de Nadal do profesorado de relixión
O sábado, 15 de decembro, os profesores de relixión da Diocese reúnense no Gran Hotel de Lugo para manter o encontro de Nadal. Comeza ás 10.30 h e termina tras a comida.
Faise unha homenaxe aos profesores xubilados o curso pasado.
Ademais os profesores de relixión farán unha visita á Catedral con motivo da presentación dunha unidade didáctica para os alumnos desta materia que versará sobre a fe e a arte neste templo.
Publicación do señor Bispo, Mons. Alfonso Carrasco, sobre o Ano da fe
O Bispo de lugo, D. Alfonso Carrasco Rouco vén de publicar un escrito titulado O Ano da fe, unha renovación de vida. Nel vai expoñendo algunhas características da fe e do que supón celebrar o Ano da fe. Tamén fai ver o señor Bispo a necesidade de coidar o sacramento da confesión, que “é una forma sinxela de promover a vivencia da fe e a evanxelización, que sempre é facilitada polo encontro persoal”.
Ademais da peregrinación diocesana a Roma hai iniciativas concretas da Diocese lucense, como peregrinacións por arciprestados á Catedral, sesións para reflexionar sobre o Credo apostólico e haberá un día de celebración festiva de varias parroquias conxuntamente, en distintas zonas da Diocese, para “recoñecer, compartir e dar grazas polo tesouro da propia fe”.
Finalmente, Monseñor Alfonso Carrasco encomenda as tarefas deste Ano e a nosa fe á protección da Santa Virxe María.
Vixilia de oración polas vocacións
A Delegación de Pastoral Vocacional convoca a todos os interesados a unha Vixilia de oración polas vocacións, o día 13 no Seminario Diocesano ás 21.30 h. Estas vixilias continúan durante o curso cada tres meses (marzo, xuño).
Recuncho de Nadal de Mans Unidas
O Recuncho de Nadal que organiza a Delegación de Mans Unidas da Diocese de Lugo está situado nas Galerías da Praza de Santo Domingo, e o horario de atención ao público é de 11:00 h. a 13:30 h. (mañás) e de 17:30 h. a 20:30 h. (tardes). Permanece aberto de luns a venres laborables, e de 11:00 h. a unha e media. Os sábados está aberto polas mañás e os días festivos non abre.
Todo o diñeiro recadado será destinado aos dous proxectos que se financian este ano por parte de Mans Unidas da diocese de Lugo, un en Nixeria e outro en Níxer.
O proxecto de Nixeria céntrase nun programa de microcréditos para mulleres de comunidades agrícolas e ten como beneficiarias a 2.500 persoas.
O proxecto de Níxer consiste na construción de cinco pozos para poboación rural en comunidades e barrios de Tera e ten como beneficiarias a 7.500 persoas.
Este Recuncho de Nadal permanece aberto ata o día 20 decembro