Vida Ascendente celebra o 1 de febreiro o Día do Maior na parroquia de San Francisco Xavier cunha Eucaristía ás 13 horas celebrada polo consiliario xeral, Ramón Álvarez Varela. A continuación hai unha comida fraternal. En todos estes actos participan membros de Vida Ascendente de Lugo, Sarria, Pol, Rábade, Monforte…
O movemento agradece a colaboración dos párrocos de San Francisco Xavier.
No Colexio María Auxiliadora comeza a xornada do 31 de xaneiro con eucaristías nas Parroquias do Bo Pastor e San Francisco Xavier. A continuación Festival D. Bosco, que inclúe actos como Party Don Bosco e a representación dun musical: A pantasma da Ópera.
A Asociación de María Auxiliadora invita a toda a Familia Salesiana e aos amigos do colexio a celebrar a Eucaristía ás 19.00h. Despois proxéctase un documental sobre a obra salesiana na actualidade e o libdup pola paz.
O 1 de febreiro ás 17.00 horas, Novas Rutas tamén celebra a Don Bosco coa imposición de pañoletas e obradoiro de sándwiches “Nai Margarita”. Novas Rutas é movemento formativo cristián para nenos/as que axuda a empregar educativamente o tempo libre e vivir os valores evanxélicos.
Os sete colexios relixiosos da cidade de Lugo organizan varios actos no Día Escolar pola paz. Ademais dos que individualmente se preparan en cada centro, hai unha programación conxunta. No momento da oración ao inicio da xornada, hai o visionado dun vídeo, elaborado polo colexio correspondente, dunha canción que trata o tema da paz, como desmostración de que é unha cuestión que interesa a todos.
E ás 12 h. do día 30 nos sete colexios proxéctase un vídeo confeccionado con fragmentos dos vídeos de cada centro.
O Instituto Teolóxico Lucense e o Seminario Diocesano celebran a festa de Santo Tomé de Aquino o día 28, co seguinte programa de actos:
11:30 ACTO ACADÉMICO na Aula Magna, conferencia “A exclusión do bonum prolis na xurisprudencia recente da Rota Romana” polo Lic. D. José Manuel Penela Campos.
13:00 CELEBRACIÓN EUCARÍSTICA. Capela Maior do Seminario
14:15 COMIDA festiva de toda a comunidad educativa
Mons. Luís Quinteiro (á esqda.), xunto con Mons. Alfonso Carrasco e David Gil
A conclusión das Xornadas Abertas de Teoloxía correu a cargo do Bispo de Tui-Vigo, Mons. Luís Quinteiro, que tratou o tema do “fiel cristián segundo o Concilio Vaticano II”. Sobre a importancia deste concilio dixo o seguinte: a lectura da historia que fixo o Vaticano II é a lectura máis profunda que se ten feito no mundo contemporáneo.
Na época do Concilio, a Igrexa viu a necesidade de abrir as portas para facilitar o encontro con Xesús. E hoxe os cristiáns deben superar as súas coitas intrafamiliares, abrir os ollos ao mundo e proclamar que Xesús é a luz dos pobos.
Para o Bispo de Tui-Vigo, o que hoxe está facendo máis estragos na Igrexa é que vivimos na rúa segundo os criterios da rúa e na Igrexa segundo os criterios da Igrexa; ao final, acabamos perdidos.
Noutro momento da súa intervención, preguntou: por que os avós e as avoas teñen conquistados aos netos? E a resposta: porque están ao seu carón. Pois ben, a mocidade ten que sentir preto dela a catequistas, sacerdotes… E isto faise, entre outras cousas, desde unha unidade de vida.
Mons. Luís Quinteiro constatou que na sociedade actual hai unha demanda fantástica de espiritualidade. Pero ás veces fálase, por exemplo de Oriente, e parecería que a espiritualidade cristiá non tivese interese. Por iso, é unha necesidade imperiosa unha formación na vida espiritual.