Vida e actualidade da Diocese de Lugo
A Nosa Voz O día 14 de xuño, desde a 11:30h. celébrase no Seminario o día do párroco dos seminaristas. Ás 13 h. é a Eucaristía, presidida polo Sr. Bispo e cos sacerdotes dos seminaristas.
Para o mesmo día a partir das 16:30 h. están programados os actos festivos de fin de curso. Neles participan os profesores, pais, sacerdotes e seminaristas. Entréganse diplomas e orlas do curso; trofeos deportivos, hai exposición de actividades académicas…
Ás 12 da mañá do 9 de xuño comezaba na Catedral de Lugo a cerimonia da Ofrenda do Antigo Reino de Galicia ao Santísimo Sacramento. O Bispo de Tui-Vigo, Mons. Luís Quinteiro Fiuza presidiu a Eucaristía na que concelebraron Arcebispo e bispos da provincia eclesiástica galega.
Acompañaron ao delegado rexio, alcalde de Tui, os representantes das cidades do antigo Reino de Galicia: Lugo, Santiago, Betanzos, Ourense, Mondoñedo e A Coruña; así como outras autoridades civís e militares.
O delegado Rexio, o alcalde de Tui, Moisés Rodríguez Pérez, presentaba a Ofrenda ao Santísimo Sacramento en nome do Antigo Reino como vén facendo desde hai séculos.
Na súa ofrenda apelou ás raíces cristiás de Galicia e agradeceu a protección, amparo e consolo do Señor sacramentado aos que acoden a El.
O alcalde de Tui pediu ao Santísimo polos gobernantes: “para que nos ilumines para promover, fronte a unha cultura do beneficio, unha cultura da xenerosidade, de solidariedade, de comuñón da que nos deches sempre exemplo”.
Na contestación á Ofrenda, o Bispo de Tui- Vigo, Mons. Quinteiro Fiuza, agradeceu as palabras do oferente cheas de confianza cristiá e de fonda preocupación social.
Facendo alusión ao refrán que di que unha cousa é predicar e outra dar pan, Mons. Quinteiro, afirmou que “o Señor dinos que hai que predicar e tamén dar para comer. Isto é algo que a súa Igrexa non pode deixar de atender nin de vivir”. Lembrou que celebrar a Eucaristía de costas aos irmáns e aos problemas do mundo é unha incoherencia na que os cristiáns non podemos caer:
Finalizada a celebración eucarística, todas as autoridades eclesiásticas e civís saíron en procesión acompañando ao Santísimo Sacramento polas rúas de Lugo.
Lemos na carta de Santiago (St 2,14.17.18b): “De que lle serve a un, irmáns meus, dicir que ten fe, se non ten obras? É que esa fe poderá salvalo? A fe, se non ten obras, por si soa está morta. Ensíname a túa fe sen obras, e eu, polas obras, probareiche a miña fe”.
Estamos no Ano da Fe. Un ano ten moitos días e resulta doado esquecerse deste ano de graza que a Igrexa nos ofrece para profundar na fe no Deus de Xesucristo.
Hoxe, máis que nunca, é moi necesario saber ben no que cremos e a quen seguimos.
Non todo serve á hora das obras, nin tampouco todo serve á hora de satisfacer os desexos de transcendencia, que xorden, inevitablemente, do noso interior.
A estas alturas do ano moitos pais xa están a ultimar os detalles da Primeira Comuñón dos seus fillos, moitos noivos preparando na súa voda para o verán, incluso moitos nenos que naceron no inverno e primavera tamén van ser bautizados nos próximos meses.
Estes sacramentos, igual que os outros, son ocasións especiais de crecemento na fe. Pero, chegados a este momento, é triste oír como o único que preocupa, á hora de preparar a celebración, é o que vai durar, ou como se teñen que colocar os noivos ou quen debe ter en brazos ao neno durante o bautizo.
Pois está claro, a celebración durará o que teña que durar, ata que termine, aos noivos xa os coloca o fotógrafo, e ao neno, o normal, é que o sosteña a persoa máis forte…
As cousas da fe, evidentemente, van por outro camiño. É necesario “pensar” a Deus, é necesario que as cousas, como dicimos en Galicia, “teñan xeito”, e desde aí ir descubrindo e amando a Xesucristo ata poñelo como centro da nosa vida.
O xoves 6 de xuño, na praza de Santa María de Lugo, poderá verse de 17 h a 20 h. a exposición “Viron e creron. A alegría de ser cristián” que a través de paneis con foto e texto fai un percorrido polos fundamentos da fe católica.
Ás 18.30 h, no mesmo lugar, terá lugar un recital de poesía e música relacionada co Corpus. A Summa poética consistirá no recitado de poemas clásicos e algún actual de temática eucarística. Na parte musical intervirá o Orfeón lucense.
O día 4 de xuño ás 13 horas no edificio administrativo da Xunta, Lugo, inaugúrase unha exposición de fotografías sobre a difícil situación que vive parte da infancia no mundo e sobre solucións a ese problema. A exposición, que organiza Mans Unidas, permanecerá aberta durante unha semana. Aínda que Mans Unidas non é unha organización adicada exclusivamente á infancia, si é unha das cuestións polas que se interesa.