Vida e actualidade da Diocese de Lugo
A Nosa Voz
Organizada por Equipos da Nosa Señora de Galicia o 14 de novembro de 2015 hai unha peregrinación mariana á Catedral de Lugo baixo o lema “Contemplar a Cristo con María”, pois trátase de honrar a Nosa Señora dos Ollos Grandes
O horario é o seguinte:
11: 00 acollida no Seminario diocesano
13:00 Misa na Catedral
14: 30 Comida
Con motivo da Xornada de Infancia Misioneira 2016, que leva o lema “Grazas”, a Obra Pontificia de Infancia Misioneira, convoca o concurso de fotografía “Di grazas cunha foto”.
Desde a Delegación de Misións de Lugo proponse dar as grazas cunha foto aos nenos de Benín, país no que algunha das súas parroquias está irmanada coa de San Francisco Xavier de Lugo. O sacerdote de Benin, Bertin Tantcheita, fálanos dos nenos de Infancia Misioneira da súa parroquia: “son un grupo de nenos que queren tomar parte na obra da evanxelización da Igrexa. Teñen tempo de oracións , tempo de encontros con nenos da súa idade para compartir cada un a súa crenza, fan xogos, fan colectas para mandar a Roma ás Obras Misionais Pontificias, e tamén axudan na escola aos nenos que menos teñen, compartindo o que poidan” . Hai motivos para darlles as grazas.
Poden participar nenos de 6 a 12 anos, que compartan a través dunha fotografía dixital, o modo de expresar o agradecemento. Trátase de reflectir os instantes, convertidos en imaxes, nos que nos sentimos agradecidos por todo aquilo que nos rodea, temos ou vivimos, sobre todo polo traballo dos misioneiros e dos nenos da Infancia Misioneira.
[Bases]
Na parroquia da Milagrosa terá lugar o venres 13 de novembro ás 20 horas o III Festival da Esperanza, no Salón de Actos do Colexio Divina Pastora (Salesianos). Organízao un grupo de mozos que a través da música queren facer algo polos demais, porque están convencidos que é posible construír un sociedade máis solidaria e xusta.
Con este acto colabórase con Cáritas parroquial da Milagrosa e co comedor salesiano, aportando fondos ao programa de “becas” de comedor e á atención das necesidades de familias do barrio. Para iso pídese un donativo de 3 € aos maiores de 16 anos. Os menores poden elixir entre doar 1€ ou colaborar con 1 Kg. de alimentos.
O Festival é tamén a ocasión para anunciar o proxecto Apadriñar unha familia, no que se buscan familias, entidades ou particulares que poidan e desexen apadriñar, no máis amplo sentido do termo, a outras familias e particulares que se atopan en situacións precarias.
O venres 13 ás 18:30 h. na Aula Magna do Seminario de Lugo preséntase o nº 51 de Lvcensia. Durante o acto Manuel Rodríguez Sánchez falará das reliquias da igrexa de Hospital de Quiroga.
Lvcensia segue coa temática ordinaria, sempre variada. Así, sobre os científi-cos lucenses do séc. XVIII escribe Isabel Fernández García. E sobre fauna cinexética tratan José Fernández-Pajares, Javier Gorgoso e Guillermo Riesco.
Un segundo apartado adícase a personaxes históricos: Ventura Cañizares del Rey, o político e académico galego Juan Armada Losada e o misioneiro lucense Nicolás Manuel Torres Soengas (que é dado a coñecer por Eligio Rivas Quintas).
Nun apartado máis heteroxéneo pero relativo a temas históricos e culturais inclúese a edición crítica dos “Decretos de Lugo de 1204”, de Alfonso Sánchez Mairena. Con motivo da beatificación de sor Patrocinio, publícase un artigo de Vicente Piñeiro González cunha selección poética. A semántica e a toponimia van da man de X. Miguel Costa Rico no tratamento dalgúns hidrónimos prelatinos. Julio Reboredo rememora acontecementos locais levados a cabo no Teatro-Circo (1905). Aurelia Balseiro García fala da homenaxe que o Museo Provincial de Lugo tributou ás persoas e entidades que o fixeron posible.
A Fundación Catedral de Lugo e Abanca chegaron a un acordo polo que a entidade financeira participará por un ano no plan de mecenado que a devandita Fundación puxo en marcha para financiar accións de mantemento, conservación e promoción da Catedral de Lugo.
O acordo foi asinado o día 11 de novembro por Walter Álvarez, director territorial de Abanca en Lugo, e por Alfonso Carrasco Rouco, bispo de Lugo e presidente da Fundación Catedral de Lugo, en presenza do deán da Catedral, Mario Vázquez.
A entidade financeira pretende colaborar con entidades, organismos e axentes sociais do tecido cultural e empresarial de Galicia na promoción, difusión e apoio ao coñecemento, á investigación, á cultura e á arte nos seus diferentes facetas.
A Fundación Catedral de Lugo, declarada de interese cultural pola Xunta de Galicia, púxose en marcha en 2011 a partir do inicio das obras de rehabilitación da basílica lucense. Entre os seus obxectivos destacan a promoción, divulgación, conservación e fomento dos valores culturais, históricos, relixiosos e patrimoniais da basílica. O ente promove tamén a investigación dos aspectos culturais, históricos e sociais vinculados á Catedral.