Mes: Maio 2024

Con flores a María

Neste mes cantamos con xúbilo “vide e imos todos con flores a María”. E lembramos, se, a María. E visualizámola con nomes, medallas, tradicións, devocións, estampas… imaxes nas que os pobos e os artistas espremeron o seu enxeño para pintar, cantar e tallar a personalidade da Virxe.

A María todas as xeracións chamárona Benaventurada. E a fe deulle mil nomes. E os pobos inventáronlle un rostro, e trazáronlle unha talla de fermosura. Aplicáronlle un canon de beleza, aínda que ninguén sabe, en realidade, como eran os seus ollos, nin a súa estatura, nin a cor do seu pelo, ou a súa tez, máis ou menos branca. Fermosa, si. Chea de graza e fermosura, sabémola e imaxinamos. Vímola de ollos azuis, negros, brillantes, suplicantes, cheos de bágoas ou rebosantes da dita resucitadora. Vémola con Ollos Grandes. E vestímola, a imaxe das nosas mellores roupas. Mantos vermellos como a caridade, verde como a esperanza, azuis como a pureza, branco como a alegría, morado como a abnegación, negros de dor…

Todo un abano visual, de gustos, conviccións e acentos temporalmente distintos. Arte e afectos populares fana diferente, singular e única en cada pobo ou nación. Sempre, sexa o tempo ou o lugar que sexa, envolta en amor e devoción do pobo. . Sempre envolta en loanzas, súplicas e oracións.

Todo verdade. Todo dedución filial. Todo amor a quen só sabe amar. María é a obra máxima de Deus. O noso gozo é sumarnos á cadea de xeracións que a enxalzaron e amaron. Bendita entre todas as mulleres. Abóndenos a nós vivir como fillos. Como bos fillos seus. Vide, imos todos con flores a María!

Daniel García García

Párroco de San Xosé das Gándaras e San Lourenzo de Albeiros

Asemblea de Catequistas

O sábado 18 de maio no Colexio FEC San Xosé de Lugo (Rúa Santiago, 2) terá lugar a Asemblea de Catequistas, co lema do curso catequético 2023-24, “Catequistas para servir”. O programa é o seguinte:

  • 10.00 h  Acollida.
  • 10.30 h  “A creación fonte da catequese” por Francisco J. Castro Miramontes
  • 11.30 h  “A espiritualidade infantil. O método Godly Play”, por Anaís Ferreiro e responsables de Godly Play Galicia.
  • 13.00 h  Percorrido orante pola Catedral. Equipo do Departamento de Catequese de Lugo.
  • 13.30 h Clausura.

9 de maio, Día da Transrománica

Lugo forma parte da Ruta da Transrománica, recoñecida oficialmente co selo de Itinerario Cultural do Consello de Europa. E desde hai 4 anos celébrase o Día da Transrománica, que este ano é o xoves 9 de maio. Ás 11.00 horas organízase unha visita á Catedral de Lugo e á parte medieval da urbe. Ás 18.00 será a presentación da guía Lugo Románico: Lugo, Terra Chá, A Mariña no claustro da Catedral, trala acollida por parte do deán José Mario Vázquez Carballo. No acto intervirá o presidente da Deputación, José Tomé Roca.

A Deputación informa da dispoñibilidade de praza en varios teléfonos: para a actividade matutina chamar ao teléfono 982.260.234, e para o acto vespertino chamar ao 982.260.134

Feliz día mamá!

Co mes de maio, mes adicado á Virxe María a Nai de Deus, nos países de influencia cultural cristiá, celébrase o Día da Nai. Este domingo é o día elixido en España para render homenaxe a todas as nais.

“A nosa naiciña” é unha expresión tan rica, tan garimosa, na nosa lingua galega, que soamente pronunciala, co noso propio acento, parece que o enche todo. Ela fálanos dun misterio de vida regalado, dun amor incondicional, dunha mirada inconfundible, de bágoas de dor ferida, de mans que coidan, de peitos que aleitan e de abrazos que curan. Estas nais, tantas nais que quixeron darnos a vida, ben merecen un recordo agradecido e o mellor dos nosos agasallos máis aló do detalle material ou do valor pecuniario da cousa regalada.

Ao pensar nas nosas nais facemos referencia inconfundible a aquelas actitudes cotiás que máis arraigadas están á vida: as que esixen bicos de leite, coidar os corpos, protexelos, sostelos, alimentalos, limpalos; as que esixen proximidade e tempo, apoio emocional, aloumiños, miradas que salvan e alentan, dedicación, escoita, apoio emocional. Actitudes que se repiten unha e outra vez en distintas circunstancias de cada día e sen as cales a nosa vida sería un inferno, unha existencia insoportable e imposible. A maioría destas actividades están fóra do espazo da economía e reciben a peor das valoracións por parte da lóxica económica dominante en termos de condicións salariais e laborais. Por iso, se queremos pór rostro a quen maioritariamente realizan estas actividades e cultivan estas máis altas actitudes e virtudes, son mulleres e pobres. Ao contrario, por desgraza, as actividades máis recoñecidas e de maior visibilidade están máis preto do diñeiro que das persoas.

Aínda que calquera día é importante para demostrarlle á nosa proxenitora o noso agarimo e o noso afecto, é bo dedicarlle un día de máis proximidade, de máis tempo regalado, de máis abrazos compartidos e de felicidades debidas. Tamén elas necesitan do noso agradecemento, da nosa misericordia, da nosa fidelidade e consolo, das nosas sensibilidades gozosas e das nosas querenzas por elas merecidas.

Na Diocese de Lugo, lembrarase ás nais e rezarase por elas en todas as parroquias. Pero cónstame que no Centro Interparroquial San Xosé Obreiro de Oural, desde hai uns anos, alí na misa solemne do domingo, as nais reciben unha homenaxe moi especial. Laudable iniciativa de D. Julio Fernández Doval e de todas as comunidades parroquiais da zona.

Non debemos esquecer que este día dedicado ás nais naceu por iniciativa do Papa Pío IX no ano 1824 con motivo do día da Inmaculada. Con posterioridade e tamén pola especial devoción á Virxe no mes de maio, as autoridades eclesiásticas en 1965, decidiron trasladar a celebración da maternidade ao primeiro domingo de maio. Felicidades a todas as nais e oxalá nos alegremos todos os días da súa existencia e podamos gozar moito tempo do seu agarimo incondicional.

José Mario Vázquez Carballo

Vicario Xeral

Pascua do Enfermo

A Campaña do Enfermo 2024 comezou o 11 de febreiro e finaliza o 5 de maio, coa Pascua do Enfermo. A través do lema deste ano, «Dar esperanza na tristeza», invítasenos a que nos centremos no coidado e o acompañamento das persoas que padecen diversas formas de sufrimento psicolóxico, que se manifesta na tristeza, a pena, o desánimo ou a ansiedade. Todo isto debe movernos a levar o consolo de Deus a quen o está pasando mal, a compartir no noso corazón a súa angustia.

Os padecimientos mentais poden ser moi invalidantes, prolongados no tempo ou con pouca posibilidade humana de resolución. Sería bo que nos nosos enfermos houbese unha apertura á visión transcendente de que tamén a forza de Deus actúa eficazmente na nosa vida.

Como celebración da Pascua do Enfermo, o domingo 5 de maio ás 12:30 h haberá Misa solemne en Santo André de Castro – Conturiz e ás 13 h en San Pedro de Labio.

A %d blogueros les gusta esto: