Mes: Marzo 2024

Gonzalo Francisco Fernández Suárez fixo a presentación do libro de Óscar G. Murado

Na presentación do libro de Óscar González Murado Lecturas y lectores de la Biblioteca Pública Episcopal de Lugo (1771-1835) o pasado 12 de marzo, interveu o decano da Facultade de Humanidades da Universidade de Santiago de Compostela, Gonzalo Francisco Fernández Suárez. Fixo as seguintes consideracións:

“Se algo está presente neste traballo, é Lugo, que aparece ao longo de todas as páxinas como o inicio de cada novo capítulo, de cada novo apartado. E iso ao meu ver que ten un dobre significado. O autor deixa ben palpable de onde vén o profundo amor ao espazo no que discurriu boa parte da súa actividade formativa e a experiencia de vida persoal. Pero también grazas a ese discurrir, vainos introducindo cunha grandísima mestría no relato da obra, do que resulta que é unha lectura moi doada e amena no senso de que busca ser unha lectura accesible ao público, sexa experto ou non”.

Tamén destacou “o valiosísimo aparato gráfico e táboas dos riquísimos inventarios e catálogos que se achegan nesta obra e que estou seguro que van a facer as delicias de moitos investigadores e investigadoras interesados no mundo das bibliotecas.

Finalmente valorou a obra de Óscar González Murado como “un auténtico revulsivo, un punto de inflexión importante dentro desta temática e, polo tanto, un referente inexcusable”.

Novena de preparación para o Corpiño pequeno

No santuario do Corpiño celébrase o 25 de marzo a Festa de Inverno ou Corpiño pequeño, e como preparación haberá unha Novena a partir do 17 de marzo, día no que tamén se celebra o Xubileu dos país. E o día de San Xosé, o martes 19, será o Xubileu dos seminaristas.

Horario dos xubileus

Ás 11h saída do Santuario para realizar o “Camiño dos Pastorciños”.

Á 11,30 chegada á igrexa de S. Pedro de Losón e a continuación rezo do Santo Rosario.

Á 11,50 chegada á Carballeira do Santuario.

Bendición do Peregrino.

Entrada pola Porta Santa.

Celebración da Santa Misa Solemne.

Horario da Novena: todos os días ás 6:00 da tarde. (Domingos 12:00 da mañá e 6:00 da tarde)

Javier Diéguez participou na presentación do libro “Lecturas y Lectores de la Biblioteca Pública Episcopal de Lugo (1771-1835)” de Óscar González Murado

O 12 de marzo presentouse o libro “Lecturas y Lectores de la Biblioteca Pública Episcopal de Lugo (1771-1835)” de Óscar González Murado. O director de Publicacións Diocese de Lugo, Javier Diéguez, fixo as seguintes consideracións:

“Case 2500 páxinas. É moito contido, moita información, moito traballo editorial e tamén moitos datos que, sen lugar a dúbidas, quedaran aí para a posteridade, para uso de outros posibles investigadores.

“Estes libros, transmiten información importante para a diocese de Lugo. Coñecer a súa longa  historia, valorala, compartila na nosa sociedade é imprescindible. Se non sabemos de onde vimos, non sabemos quen somos, dificilmente seremos quen de construir o noso futuro. Por iso ten sentido o traballo que fixo Oscar González Murado para chegar aquí.

“Estes libros abordan a época ilustrada, rica e creativa. O papel da Igrexa nesta época probablemente non foi fácil, pero houbo persoas con iniciativas valiosas e xenerosas que nos transmitiron a nosa riqueza da que se fala na obra. Por iso, este libro achega un gran de area á nosa propia identidade como Igrexa, e permite saber situarnos no medio do mundo, da sociedade e da cultura para facer unha aportación vital. Se somos quen de aceptar a interpelación que nos plantexe a súa lectura, seremos quen de aportar tamén o mellor de nós para construir esa sociedad e esa cultura, o noso futuro. Todo isto é posible grazas ao traballo riguroso de Óscar González Murado”.

D. Alfonso Carrasco presidiu a presentación do libro “Lecturas y Lectores de la Biblioteca Pública Episcopal de Lugo (1771-1835)” de Óscar González Murado

O 12 de marzo presentouse o libro “Lecturas y Lectores de la Biblioteca Pública Episcopal de Lugo (1771-1835)” de Óscar González Murado, nun acto presidido por D. Alfonso Carrasco Rouco, que fixo as seguintes apreciacións sobre o autor:

“Aventurarse a un traballo destas dimensións fala ben de don Óscar. Foron anos, foi paciencia, moito esforzo, e penso que ten mérito. Agrádame facer este eloxio. E facéndoo, tamén facemos un eloxio da súa formación, do Seminario de onde vén, dos nosos sacerdotes lucenses. Hai unha historia grande de investigadores que examinaron o pasado. Sería para todos unha ledicia, un ben, que don Óscar, pouco a pouco, se convertese nun bo continuador daqueles grandes historiadores que levaron adiante un traballo de memoria desta diocese, nos nosos arquivos… Non podemos presentar unha tese sen dicir: “hai unha vida intelectual grande”. Nós temos que estar contentos non só por don Óscar, senón porque continúe unha tradición intelectual e unha vida intelectual grande”.

E sobre o contido da obra, D. Alfonso Carrasco, sinalou, entre outros aspectos, que “temos unha foto do que preocupaba na época do bispo Armañá, de como era a biblioteca, pero sobre todo, en realidade, entrevemos as preocupacións, as loitas do corazón e da alma daquel momento”.

 

Vivir é froitificar

Escoitemos a semente: “Algo me di que me entregue totalmente e sepúltame no escuro da terra, na esperanza de ser transformada en árbore. Por que, para cara arriba teño que ir cara abaixo, e pensar que toda árbore pode brotar de min?” (E. A. Gloeggler). Este soliloquio da semente non precisa, quizais, moita explicación, senón reafirmación e confirmación. Porque, en rigor, nada está perdido para a semente ao desaparecer no escuro da terra. Ao contrario, sepultarse e ir cara abaixo é a condición para froitificar. Sepultarse na terra vivifica a semente, desenvólvea. Ir cara abaixo non inutiliza, madúraa. Estamos, un ano máis, no tempo coresmal. Lembramos a quen “se humillou a si mesmo” (Flp 2, 8), Cristo, que abaixado e asumindo plenamente a nosa humanidade, fíxose semente que leva à plenitude da Vida à humanidade.

A Coresma é tempo para volver a dirixir a mirada ao escuro da vida. Para imitar a paciencia de Deus que segue “agardando o froito precioso da terra” (St 5, 7). Tempo para converternos en semente que produza bos froitos. Tempo, para volver a dirixir a mirada ao Sementador que agarda bo froito da terra boa.

Como ensina o Papa Francisco, tempo novo coresmal invítanos “ao xaxún, a oración e a esmola, tal como os presenta Xesús na súa predicación (cf. Mt 6, 1-18), que son as condicións e expresión da nosa conversión. A vía da pobreza e da privación (o xaxún), a mirada e os xestos de amor cara ao home ferido (a esmola) e o diálogo filial co Pai (a oración) permítennos encarar unha fe sincera, unha esperanza viva e unha caridade operante”. (Mensaxe do Para para a Coresma 2024).

Coresma, tempo novo no que vivir é froitificar. Mirémonos no espello da nosa propia vida e rompamos a coartada de esquivar o noso fracaso á hora de dar os froitos necesarios de conversión. Quizais o noso fracaso sexa mirar e buscar só o superficial, o que aparenta, o frívolo, o mediocre. Busquemos no agochado e fondo do corazón o crecer silencioso como o da semente. Acaso poidamos recuperar a mirada ao interior, afondar no profundo de onde nacen e susténtanse os froitos. Porque a árbore -a vida- máis esvelta e de mellores froitos é a que ten boas raíces.

Daniel García

Párroco de San Lourenzo de Albeiros e San Xosé das Gándaras

A %d blogueros les gusta esto: