O sábado 16 de outubro conmemorouse o 125 aniversario do II Congreso Eucarístico Español, celebrado en Lugo.
O Bispo, Monseñor Alfonso Carrasco Rouco, presidiu a “Vixilia de espigas” na Catedral Basílica.
Previamente houbo unha conferencia sobre o venerable Luis de Trelles no Salón de Actos do Seminario, a cargo de D. José de Cora Paradela, escritor, xornalista e Director Xeral de El Progreso.
“É unha persoa excepcional, é unha personalidade dentro da historia de España estupenda, polimorfa e polifacética en infinidade de asuntos. Non podemos quedar co Luis de Trelles fundador da Adoración Nocturna, porque sería reducilo; non podemos quedar co Luis de Trelles avogado porque sería reducilo ou co Luis de Trelles mediador entre os bandos isabelino e carlista naquela terceira guerra carlista, na que fixo un papel fundamental. Tanto que foi destacado por adiantarse 50 anos ao espírito da Convención de Xenebra de 1930, naquilo que se refire ao bo trato que, aínda nas circunstancias calamitosas dunha guerra, debe darse aos prisioneiros. Dá parte da súa vida e dos seus bens, e consigue a liberación de miles de prisioneiros carlistas a cambio de miles de prisioneiros isabelinos”.
O corpo da conferencia de José de Cora tratou do caso xudicial que en 1876, levou Luis de Trelles: o caso Baldomera Larra (filla de Mariano José de Larra), fundadora tres anos antes dunha banca popular que ofrecía a obtención dun altísimo rendemento.
Estes actos foron celebrados por iniciativa da “Fundación Luís de Trelles” e contaron coa colaboración do Consello Diocesano da Adoración Nocturna lucense.
