Mes: Outubro 2021

Domund 2021

O domingo 24 de outubro celébrase a Xornada Mundial das Misións, o Domund, co lema “Conta o que viches e oíches”. O papa Francisco lembra que, cando recoñecemos a presenza de Deus como Pai na nosa vida, podemos abrir o corazón para deixarnos tocar por El, permitir que cure as nosas cegueiras e ser capaces de compartir no día a día o que vimos e oído da man de Jesús. É o que fan os misioneiros.

OBXECTIVOS DO DOMUND

  • Explicar o labor evanxelizador nos territorios de misión e mostrar a vida das comunidades que constitúen as Igrexas novas.

  • Buscar fondos para manter á Igrexa neses territorios encomendados á Congregación para a Evanxelización dos Pobos.

  • Fomentar as vocacións misioneiras, que son algo de hoxe e de sempre, así como a formación e a oración misioneira de todo o pobo de Deus.

  • Dar a coñecer as Obras Misionais Pontificias e a súa función esencial para a animación e a cooperación misioneiras.

O programa “Polo camiño da fe” da Televisión de Galicia dedícase esta semana ás misións. Domingo 24 ás 9:45 h

A continuación, a Misa das 10:00 h. será retransmitida por TVG desde a igrexa de San Francisco Xavier (Lugo)

Ás 12:30 h. na mesma igrexa celébrase unha Misa cos misioneiros, e familiares, da Diocese de Lugo. E seguidamente haberá unha comida no salón parroquial.

[Materiais]

Formarse e informarse, tamén como cristiáns

A miña insistencia na necesidade de formarnos e informarnos como cristiáns non é unha teima só miña. Con moita frecuencia hai iniciativas de formación de cristiáns que se organizan desde outros ámbitos distintos á parroquia, como pode ser todo o que se nos ofrece desde a Diocese ou desde outras parroquias ou entidades.

Ademais, agora, é moi doado participar nestas sesións de formación a través de internet, aínda que é verdade que se perde a riqueza de compartir experiencias dos encontros presenciais.

Necesitamos formarnos para dar razón da nosa fe, coñecer a Xesucristo e á súa esposa, a Igrexa, aos que tantas veces acudimos ao longo da nosa vida. Temos que saber por que cremos e que cremos. Non serve a «fe do carboeiro» (crer ás cegas, sen pensar).

E necesitamos informarnos ben sobre as noticias que circulan sobre a Igrexa e algúns dos seus membros. Con frecuencia, as cousas son moi distintas de como nolas contan. Hai moitos bulos e verdades a medias que nos fan ter unha idea equivocada das cousas.

Se de verdade dicímonos cristiáns e somos membros da Igrexa, temos que coñecer ben a quen seguimos, Xesucristo, e o lugar no que o seguimos, a Igrexa.

Neste sentido, aos sacerdotes ofrécensenos sempre desde a Diocese unhas sesións de formación permanente sobre temas de actualidade, como o é este ano a cuestión da eutanasia. Desde hai uns anos, esta formación tamén está aberta aos laicos, polas mesmas razóns presentadas máis arriba.

Miguel Ángel Álvarez

Párroco da Fonsagrada

[Artículo original]

Celebración na honra de San José María Díaz Sanjurjo

Un 25 de outubro de 1818 nacía San José Mª Díaz Sanjurjo na aldea de Vigo, pertencente á parroquia de Santa Eulalia de Suegos (concello de Pol). Na fin de semana máis próxima, o sábado 23 de outubro, organízase unha peregrinación a Suegos co lema “Con San José María Díaz Sanjurjo camiñamos en familia”. O programa é o seguinte:

– Acollida ás 10:30 h na igrexa de Montecubeiro (Castroverde). Oración e motivación

– Camiñada dende Sarceda ata Suegos (4 quilómetros)

– Celebración da Santa Misa no exterior da Capela das Neves

– Comida

A inscrición para participar nestes actos é gratuíta e está aberta para toda a Diocese de Lugo.

Inicio de sesións formativas sobre acompañamento na etapa final da vida

O mércores día 20 terá lugar a primeira xornada de formación que organiza a Diocese para este curso sobre a etapa final da vida das persoas. O encontro será de 10: 30 a 13: 15 h, no salón de actos do Seminario de forma presencial e poderá seguirse por YouTube de forma persoal ou nos puntos de conexión habilitados nas distintas zonas pastorais.

Neste primeiro encontro, o sacerdote da arquidiocese de Toledo D. Alfonso Fernández Benito terá varias intervencións co tema: “O Evanxeo da Vida”. D. Alfonso centrarase na atención ás persoas nas fases críticas e terminais da vida que aparecen na Carta Samaritanus bonus (carta da Congregación para a Doutrina da Fe sobre a eutanasia, publicada no ano 2020).

Durante este curso hai varias sesións formativas baixo o lema: “Sementadores de esperanza. Acoller, protexer e acompañar na etapa final da vida”. A seguintes sesións serán o 28 de decembro, o 19 de xaneiro e o 30 de marzo.

Apertura do camiño sinodal diocesano e do Curso Pastoral

O domingo día 17 de outubro abriuse o camiño sinodal na Diocese de Lugo: SÍNODO 2021 – 2023. POR UNHA IGREXA SINODAL: COMUÑÓN, PARTICIPACIÓN E MISIÓN. Ao mesmo tempo inaugurábase o Curso Pastoral da Diocese. Foi coa celebración dunha Eucaristía presidida por Mons. Alfonso Carrasco, que na parte final da súa homilía, dixo:

“Camiñar xuntos quere dicir que ninguén é todo, que non temos que pensar en como mando eu sobre o veciño. O sacerdote non pode ser a parroquia enteira, o mesmo o Bispo e a Diocese, somos un pobo. A vida consagrada forma parte intrinsecamente da comunidade, foi enviada á Igrexa, á comunidade concreta para dar testemuño dunha vida chea de valor para todos. Os que son catequistas, os que asumen responsabilidades, as moitísimas persoas que traballan e axudan nas parroquias, o mesmo sucede: tampouco é por mandar máis, por gobernar máis, é por un ben propio e de todos os irmáns para que poidamos camiñar xuntos. As familias, os matrimonios, os nenos… todas as nosas actividades deben estar habitadas por este mesmo espírito, por este mesmo xesto de caridade que temos que renovar sempre, unidos no medio da Igrexa.

“Imos celebrar a inauguración do Sínodo Diocesano, a tarefa está por diante: haberá preguntas para responder, haberá necesidade de facer algunha reunión, haberá necesidade de verse… tomádeo de corazón, como unha invitación do Papa a que prestemos atención ao máis esencial da nosa vida como cristiáns, que é formar parte deste pobo e camiñamos xuntos. Aceptemos esta invitación a dicir o que é importante, que volvamos a mirada a estes fundamentos do noso ser cristiáns para poder vivilo ben. E fagamos o traballo na medida en que poidamos. Pediremos para iso a graza do Espírito Santo, que o Señor nos bendiga”

A %d blogueros les gusta esto: