Mes: Setembro 2017

Encontro Nacional de Delegados e Responsables de Pastoral Xuvenil en Lugo

Un dos encontros de delegados celebrado hai uns anos

Organizado polo Departamento de Pastoral de Mocidade da Conferencia Episcopal Española, celebrarase os días 28, 29, 30 de setembro e 1 de outubro. Están convocados os Delegados Diocesanos de Pastoral Xuvenil, responsables de Pastoral Xuvenil de Movementos de ámbito nacional, ou responsables de Pastoral Xuvenil de Congregacións ou Institutos seculares.

A Pastoral Xuvenil está nun momento moi importante e crucial. Tralas experiencias vividas en anos pasados, o Departamento de Pastoral Xuvenil iniciou un camiño centrado na comuñón e coordinación de todos aqueles que traballan na pastoral xuvenil.

Momentos como o Encontro Europeo de Mozos 2015 en Ávila, a Xornada Mundial da Mocidade 2016 en Cracovia, xunto con todo o traballo de reflexión e propostas, son exemplo diso. Un fito que mostra este traballo e o camiño que se quere seguir foi o II Encontro de Equipos de Pastoral Xuvenil, celebrado o pasado mes de abril en Granada.

Agora é o momento de facer balance e ver por onde se está camiñando e reforzar os alicerces fundamentais da Pastoral Xuvenil, todo á luz do próximo Sínodo, convocado polo Papa Francisco, que tratará sobre “Mozos, fe e discernimento vocacional“ .

Será un encontro de traballo que partirá do relatorio: “O Sínodo dos mozos ilumina a nosa pastoral xuvenil“. O entramado do relatorio será poñer en valor os grandes núcleos do documento preparatorio do Sínodo, conectándoos con Evagelli Gaudium, e deixando ver como ilumina o camiño feito na pastoral xuvenil española nos últimos anos.

Tralo relatorio, formaranse cinco grupos de traballo-reflexión cos que se poñerán en marcha unha dinámica de traballo onde se compartirán reflexións sobre cinco temas de interese na pastoral. Os cinco temas son: primeiro anuncio, acompañamento, discernimento, creatividade e axentes de pastoral.

Os dous primeiros temas recollen o camiño que coordina o Departamento de Pastoral de Mocidade nestes últimos anos. O discernimento é un dos temas claves do próximo Sínodo. A creatividade e os axentes de pastoral son dúas das preocupacións que actualmente están presentes na Pastoral Xuvenil.

Todo o encontro terá os seus momentos de oración e celebración eucarística, destacando a mañá de retiro que todo os Delegados e Responsables de Pastoral Xuvenil terán o venres 29 en Portomarín para comezar o traballo pedindo a luz do Espírito.

Acompañarán a todos os participantes, os bispos responsables do Departamento de Pastoral Xuvenil da CEE: D. Carlos Escribano, bispo de Calahorra e A Calzada-Logroño; D. Antonio Gómez, bispo de Teruel e Albarracín; e D. Arturo Ros, bispo auxiliar de Valencia. Contarase tamén coa visita do bispo de Lugo D. Alfonso Carrasco.

 

[Folla de inscrición]

 

Horario

Xoves 28:

Eucaristía de acollida

 

Venres 29:

Retiro e Eucaristía en Portomarín

Relatorio: “O Sínodo dos mozos ilumina a nosa pastoral xuvenil“

Grupos de traballo: 1ª e 2ª sesión

Visita nocturna guiada á cidade

 

Sábado 30:

Eucaristía

Grupos de traballo: 3ª e 4ª sesión

Conclusións do traballo realizado, diálogo e propostas de futuro

 

Domingo 1:

Informacións varias: Xornada Mundial da Xuventude de Panamá, Igrexa en Diálogo, Sínodo…

Visita á cidade, Catedral

Eucaristía de clausura

Fin de encontro

A quen queres máis: a papá ou a mamá?

Estamos demasiado afeitos aos dualismos e a ter que escoller entre dúas opcións: A quen queres máis, a papá ou a mamá?. Esta é a pregunta típica que lles facemos aos nenos sen saber o dano que podemos provocar na súa inocencia e bondade. O normal é que contesten que queren aos dous. Pero nós, non satisfeitos, volvemos insistir.

No Evanxeo do próximo domingo tamén se nos suscita unha cuestión, que, a primeira vista, parece que tamén adoece de dualismo: “Quen dos dous cumpriu a vontade do seu pai?” Neste caso a resposta é clara. A vontade cumpriuna o que “fixo” non o que “dixo”. Xa saben iso de que “obras son amores e non boas razóns”.

Neste texto evanxélico van ser moitos os que atopen unha xustificación para a súa forma de pensar e o seu estilo de vida, precisamente por ese dualismo do que falaba ao principio. Non vai faltar quen diga que non fai falta rezar (dicir), nin ir a Misa para facer obras boas. Tampouco vai faltar quen diga que os que intentamos rezar e imos a Misa somos os peores porque “dicimos” moito, pero facemos pouco ou nada. Se cadra non lles falta razón, pero tampouco ten por que ser así. Non todo ten que ser dualismo. Precisamente para os cristiáns isto é un reto: que as nosas obras se correspondan coas nosas palabras. As dúas cousas son posibles. Non é necesario escoller nin pelexarnos porque só unha sexa a importante. Non, as dúas son importantes, ¡como non vai ser importante a coherencia!. Pero… por que imos ter que escoller só unha cousa cando podemos escoller as dúas?

Xa que hoxe imos de ditos e refráns sigo con outro máis: Non se pode repicar e andar na procesión. É certo. Hai cousas incompatibles, pero outras non o son. Nós, os cristiáns temos a sorte de poder e deber loar a Deus (rezar, falar con Deus, dicir) e facer o ben e a vontade de Deus ao mesmo tempo. Con outras palabras repetíronnos isto mesmo os Papas Xoán Pablo II e Bieito XVI: “Non teñades medo de Cristo! El non quita nada, e dáo todo”.

Miguel Ángel Álvarez

Tomado da revista dixital Falando Baixiño, nº 159

Xubileu dos traballadores do mar no Corpiño

 O domingo 24 de setembro, no Corpiño celebrouse o Xubileu dos traballadores do mar, o cal contou cunha gran afluencia de fieis.

Na Carballeira do Santuario comezouse ás 11:40 coa Bendición a todos os peregrinos por parte do reitor do Santuario, José Criado Sánchez. Na  carballeira reuníronse co grupo de voluntarios e devotos que chegaban de realizar o Camiño dos pastorciños incluíndo peregrinos vindos de Girona. Seguidamente realizouse a Procesión cara á Porta do Ano Santo.

Ás 12 h tivo lugar a Eucaristía por todas as persoas relacionadas co mar e vítimas de naufraxios. Ao finalizar a celebración produciuse a Bendición de todos os profesionais do mar e dos utensilios de traballo que portaron e houbo unha oración especial pedindo a súa protección e a das súas familias.

Moita oración e reiniciar o sistema

Comezo contando algo que me pasa con bastante frecuencia. Moita xente acode a min, non só para auxilio espiritual, senón tamén por problemas informáticos e telefónicos, por chamalos dalgún xeito.

Xa saben: “como se fai tal cousa?”, “non me funciona isto”, “apareceume isto aquí”. Habitualmente son cousas moi sinxelas de arranxar e fágoo sen maior problema. Por iso, cando me preguntan como o fixen, respondo de forma irónica dicindo que hai cousas que só saen con moita oración. Pero o único que fago é apagar e volver acender, ou dito doutra forma, “reiniciar ou resetear”. Se a cousa é moi grave, a intervención ten que ser máis agresiva e hai que restaurar o sistema, volvéndoo aos valores de fábrica. Outras veces hai que formatear ou poñer un disco duro novo ademais de ampliar memoria. É frecuente que os equipos se volvan lentos por virus ou por acumulación de arquivos e aplicacións de todo tipo que non serven para nada. Xa, no peor dos casos, non queda outra alternativa que comprar un equipo novo porque o que tiñamos quedou obsoleto e non cumpre coas esixencias actuais.

Non son experto nin técnico nin científico, pero é fácil pensar que os móbiles, que non se apagan nunca, acaban saturados e fallando. Ata as máquinas necesitan un pequeno descanso ou desconexión para empezar de novo e funcionar correctamente. Trátase de que o sistema poña as cousas no seu sitio.

Outras veces as máquinas acenden mal e prodúcese un fallo no proceso de arranque. Cando isto pasa, a única opción é empezar de novo para facer o proceso completo sen saltarse ningún paso.

Pois se así ocorre coas máquinas que só fan unha cousa e sempre do mesmo xeito, e non teñen sentimentos e alma, pensen agora canto máis as persoas.

Opino que isto mesmo tamén serve para a Igrexa e todos os que a formamos. Todos necesitamos rezar máis, moita oración, e nunca mellor dito, tamén reiniciar o sistema ou restauralo por completo para poñer en marcha con forza a Nova Evanxelización.

Na vida de moitos cristiáns e da Igrexa hai moitas cousas que non funcionan: imos a remolque e cansos, sáltanse pasos no proceso de iniciación, ou non damos os correctos.

Non podemos volver á idade de 5 anos, pero si podemos nacer de novo, como lle dixo Xesús a Nicodemo. Necesitamos retiros, momentos de oración (moita oración), exercicios espirituais para facer un alto no camiño cotián e restaurar os nosos sistemas para comezar de novo e atoparnos de verdade con Xesucristo. Cantas veces para arranxar unha casa en ruínas hai que tirar todo e facela de novo?

Non é nada distinto ao que fixo Xesucristo: “Destruíde este Templo e en tres días levantareino […] Pero El referíase ao Templo do seu corpo” (Xn 2, 19-ss). Morrer ao home vello e resucitar ao home novo.

Esta tarefa pódenos asustar un pouco por medo a perder o que xa temos (case tanto como perder os contactos do móbil). Pero se non o facemos, corremos o perigo de que a casa termine sendo unha chea de lixo cuberto de silveiras.

 

Miguel Ángel Álvarez Pérez

Párroco de San Froilán

O Colexio Mª Inmaculada de Silleda inicia as celebracións do seu cincuentenario

Neste curso escolar celébrase o 50 aniversario do Colexio Mª Inmaculada de Silleda, que botou a andar o 24 de setembro de 1967.

Por este motivo haberá ao longo do curso unha serie de actos para conmemorar as vodas de ouro.

O primero destes actos terá lugar na xornada do luns 25 de setembro, co seguinte programa e horarios:

 

  • 11:00: Eucaristía na igrexa parroquial presidida polo Señor Bispo D. Alfonso Carrasco Rouco.
  • 12:00: Pregón, no salón parroquial, a cargo do Vicario Xeral D. Mario Vázquez Carballo coa presenza de autoridades locais
  • 13:00: Actuación do grupo “Aires do Trasdeza” na praza da Igrexa.
  • 14:00: Comida de profesorado e alumnado.
  • 15:00-17:00: Tarde lúdica, con inchables, xogos populares, diana futbolística…
  • 17:00: Festa da espuma (se o climatoloxía o permite)
  • 18:00: Merenda.
  • 18:00-18:45: Actuación do mago “Rafa” promovida pola AMPA “Meniños do Inmaculada”
  • 19:00 Clausura do acto coa solta representativa de globos.
A %d blogueros les gusta esto: