Vida e actualidade da Diocese de Lugo
Na noite do domingo, día 1° de novembro, Festividad de Todos os Santos, a Adoración Nocturna celebra na Catedral, a partir das 21 horas, a reglamentaria Vixilia de Defuntos. Aplícase polos adoradores falecidos da Sección Diocesana e polo eterno descanso de familiares e benditas almas do purgatorio.
O señor Bispo, Mons. Alfonso Carrasco, preside a Eucaristía polos defuntos da Diocese no cemiterio de San Froilán o día 2 ás 17h
O director do Arquivo Diocesano de Lugo, Óscar González Murado, impartirá unha charla no local da asociación A Unión, Sarria (r/ Matías López), o próximo día 29 ás oito da tarde sobre a figura de Elías Valiña. En concreto sobre, do polifacético ‘cura do Cebreiro’, a preocupación do sacerdote natural de Sarria polo patrimonio documental diocesano.
A charla está organizada pola Unión e polo Seminario de Estudos Sarriaos Francisco Vázquez Saco como parte dos actos en memoria de Elías Valiña que se sucederán nos próximos meses ata maio. A idea é que se vaian alternando estudosos de Sarria e de fóra para que cada mes vaian dando a coñecer a figura de Elías Valiña desde un gran número de ángulos.
O 28 de outubro a partir das 9:40h , con invitación ás familias, terá lugar no Colexio da Inmaculada (Lugo) a celebración colexial Fourvière. É o inicio da celebración do bicentenario da promesa de constituír a Sociedade de María que fixo un grupo de sacerdotes, cheos de ilusión. Foi no Santuario de Fourvière, (Lyon) ao día seguinte da súa ordenación.
O texto da promesa é o seguinte:
En nome do Pai e do Fillo e do Espírito Santo. Todo para a maior gloria de Deus, e para a honra de Maria, Nai de noso Señor Xesucristo!
Nós, abaixo asinantes, queremos traballar para a maior gloria de Deus e de Maria, nai de Noso Señor Xesucristo, afirmamos que temos a sincera intención e as firmes ganas de consagrarnos, tan pronto como xurda a oportunidade, á institución da piadosísima Congregación dos Maristas. Velaí porque, polo presente acto, que leva as nosas sinaturas, comprometémonos irrevogablemente, nós e todo o que temos, en canto nos sexa posible, á Sociedade da benaventurada Virxe María.
«Que bonito é loitar cando se ten fe e valóranse as cousas á luz de Deus!» Esta é a cita da Madre María de la Purísima escrita na pancarta colocada no interior de parroquia de San Froilán durante os meses de preparación para a súa canonización. O nome desta Irmá xa figura no catálogo de santos desde o pasado domingo. A cerimonia, presidida polo Papa Francisco, tivo lugar na praza de San Pedro do Vaticano. Alí estiveron o Bispo de Lugo, o Rector do Seminario e catro fregueses da parroquia.
Supoño que resulta rechamante a importancia que lle demos na Parroquia e na cidade de Lugo a esta canonización. María de la Purísima foi a fundadora da casa das Irmás da Cruz en Lugo no ano 1987, primeiro na rúa Castelao e despois na de Miguel de Cervantes, ambas no territorio da parroquia de San Froilán. Con este motivo estivo na nosa cidade en varias ocasións, ademais das visitas que fixo despois ás irmás, das que era a Madre Xeral.
Madre María de la Purísima naceu en Madrid en 1926. En 1944 ingresa nas Irmás da Cruz. É elixida Madre Xeral en 1977 e reelixida 3 veces máis. Morreu en 1998 tras unha rápida enfermidade. Ao ano seguinte iníciase o proceso de canonización. Muller de amplo sorriso e con sólida formación, soubo continuar e expandir a obra da fundadora, sor Ángela de la Cruz, tamén santa.
Nestas liñas, non podemos esquecer o papel que tivo o sacerdote D. Alfonso Vilariño Blanco na fundación que Santa María de la Purísima fixo en Lugo. Grazas á insistencia de D. Alfonso chegaron a Lugo as Irmás da Cruz para facerse cargo dunha residencia para o coidado de persoas maiores, ademais da asistencia a enfermos nas súas casas. Moitos lucenses coñecen o labor abnegado, delicado e silencioso destas relixiosas que tratan de aliviar a cruz da enfermidade e a ancianidade a quen a padecen.
O domingo 25 de outubro terminou na Parroquia de San Froilán o triduo de acción de grazas pola nova santa. Deus estivo grande connosco e agradéceselle o agasallo da santidade de María de la Purísima e da presenza das súas “fillas” entre nós.
Miguel Ángel Álvarez
Párroco de San Froilán
A Área de Muller de Cáritas Diocesana de Lugo organiza unha exposición fotográfica itinerante, onde once mulleres en contextos de prostitución -algunha delas vítimas de trata de seres humanos- mostran os seus soños e os seus medos a través de fotografías realizadas co móbil. Así mesmo, as participantes desta acción explican as súas imaxes con comentarios escritos polo seu puño e letra.
Esta exposición pode verse na Biblioteca Intercentros do Campus de Lugo (ata o 13 de novembro).
Os doce paneis que compoñen a exposición fotográfica van acompañados de material informativo sobre a prostitución, a explotación sexual e a trata de persoas.