Mes: Xuño 2014

Sor Amparo e o mundo das présas! 60 anos de vocación!

sor Amparo

 O 26 de xuño Sor Amparo cumpre 60 anos de vocación. Sor Amparo é unha relixiosa Filla da Caridade de San Vicente de Paúl que está na comunidade do Colexio da Milagrosa, á beira da Parroquia de San Froilán.
Ver a Sor Amparo é moi difícil, porque anda sempre á velocidade da luz. Isto é o que fai que o tempo lle renda o dobre. Podemos dicir que cumpre 120 anos de vocación e non 60.
A súa paixón son os nenos do Colexio e as actividades de pastoral con eles. Desvívese cada vez que hai algunha celebración especial cos nenos na parroquia. Sería impensable a celebración de San Vicente de Paúl, o Nadal, a Coresma, o día de María, o final de curso sen a presenza de Sor Amparo.
Grazas, en boa medida, a Sor Amparo os nenos do colexio da Milagrosa levan no seu interior unha pequena semente que se cadra un día xerminará. É asemente da Fe en Xesucristo e o amor a María, a Milagrosa…
E non é pouco nin calquera cousa! que nos tempos de hoxe uns nenos leven unha referencia ao transcendente no testemuño desta Filla de Caridade que poida dar unha consistencia maior á súa vida o día de mañá.
Nestes 4 anos que levo na parroquia tiven ocasión de compartir moitos momentos con Sor Amparo. Falamos do divino e o humano. E sei que estaría disposta a dar a vida para que ningún destes pequenos “se perda”.
60 anos de vocación e de virxinidade consagrada ao Señor pero moi frutífera. A súa descendencia multiplicouse como as areas do mar.
Grazas Sor Amparo por espabilarnos, por “meternos présa”, por falarnos de Deus.

Miguel Ángel Álvarez Pérez
Párroco de San Froilán

I Festival Internacional de Órgano do Corpus Christi de Lugo

cartel Fiocorpus

Dentro das actividades do III Encontro Eucarístico Lucense, están programados varios concertos de órgano.

Programa

Venres 20 de xuño de 2014  Santuario do Cebreiro

16:30 Primeiro concerto: Johannes Skudlik

Domingo 22 de xuño  S. I. CATEDRAL BASÍLICA

20:45 Segundo concerto: Wladimir Matesic

Mércores 25 de xuño  Parroquia de SANTIAGO A NOVA

20:30 Terceiro concerto: Lida Basterretxea Vila (voz), Giulio Mercati (órgano)

Venres 27 de xuño S. I. Catedral basílica

20:45 Cuarto concerto. Miquel González

[Máis información]

Misa de clausura do Curso Pastoral 2013-2014

Misa clausura Curso pastoral 2013-14

No mediodía do venres 29 clausurábase no Cebreiro o Curso Pastoral 2013-2014 cunha Misa.

Durante a homilía, o Bispo de Lugo, fixo memoria do amor que Deus nos ten e do que nos axudou durante o curso. Aínda que non podemos contabilizar a graza de Deus, si podemos mostrarnos agradecidos. O camiño foi longo e, alimentado pola súa forza levouse a cabo. O alimento é o pan baixado do ceo. Necesitámolo porque as nosas forzas non abondan. Por iso é necesaria a Eucaristía, que nos rexuvenece e cura. A Eucaristía recibida está cargada de amor, é un don para cada un, é o xesto de Deus que quere estar con nós, compartindo a nosa vida. A Eucaristía é un amor perenne, é un apoio constante, é Deus mesmo que se entrega a nós. Este amor acompañounos este ano e a comunidade enteira (xoves, nenos, maiores) recibiu este don. Tamén debemos mostrarnos agradecidos a Deus, pola súa misericordia cos nosos fallos. En fin, que se abran novos camiños mirando cara a Deus e cara á súa forma de amarnos. Finalmente, D. Alfonso Carrasco pediu a intercesión da Virxe.

Lugo e o Corpus Christi

Desde a miña inxenuidade teño as miñas dúbidas sobre o que pasa en Lugo no mes de xuño. A conxunción de Arde Lucus e Corpus suscita algunhas sospeitas. Algo non cheira ben, e nunca mellor dito. Perdoade, pero recoñezo as miñas teimas con certos asuntos.
A Cidade do Sacramento dá a sensación de que se vai a quedar só nunha cidade común. Cambiar a Deus por nada non creo que sexa o mellor choio. Pasamos de telo todo, a quedarnos baleiros…
Vivimos nun mundo moderno, cuns avances científicos e tecnolóxicos sorprendentes, pero tamén cunha serie de problemas que non se corresponden co progreso alcanzado no último século. Non se comprenden, por tanto, os insultos, violencias, desconfianzas, mentiras, fraudes, corrupcións, divisións, envexas, guerras, mortes, moitas mortes de todo tipo… que temos que soportar todos os días.
Empeñámonos en botar fóra do quebracabezas a única peza que estivo desde o principio e que daba unha perfecta cohesión a todo o conxunto. Sen esta peza o construído por unha banda disólvese por outro… É como facer castelos de area, xa sabemos o que duran!
Un mundo que se parece a un coche de alta gama, pero que conducimos co freo de man posto e con grave perigo de incendiarse e quedar reducido a cinzas.
Celebrar o Corpus é desexar e recoñecer a presenza de Deus no mundo. Un Deus que se implica coas persoas até as últimas consecuencias, para que non quedemos reducidos a cinzas, senón que teñamos vida abundante e eterna.
Contemplar a Xesús Sacramentado na Custodia non é mirar para unha peza de museo ou unha reliquia. Prostrarnos diante de Xesús-Eucaristía é mirar ao mundo e a nós mesmos a través dos ollos de Deus, ao mesmo tempo que tamén nos sentimos mirados e queridos por El.
En Lugo temos por diante unha semana e pico para celebrar solemnemente a presenza real de Cristo na Eucaristía. Non  desaproveitemos esta oportunidade.

Na Catedral, onde está exposto permanentemente o Santísimo Sacramento, temos un faro que ilumina a toda a cidade. Non fai ruído, pero está. Non o vemos, porque nos enganan os sentidos, pero ninguén queda fóra da súa mirada infinita.

Pasamos del, pero El non pasa de nós. Menos mal!
As actividades que se organizan desde a Diocese e as parroquias axudarannos a celebrar e a recoñecer o valor deste “tesouro”.

Miguel Ángel Álvarez Pérez

O cardeal D. Antonio Cañizares, na primeira xornada do Encontro Eucarístico Lucense

 

O 19 de xuño deu comezo o III Encontro Eucarístico coa conferencia inaugural do cardeal D. Antonio Cañizares, que calificou a Eucaristía non como un don máis que recibe a Igrexa, senón como o don por excelencia, don do mesmo Cristo, da súa persoa.

 Outro dos aspectos da Eucaristía resaltados por D. Antonio Cañizares é o da unión, non só da Igrexa, senón tamén da sociedade. Ademais, unha maior devoción eucarística daría máis paz ao mundo. Máis aínda, o futuro da humanidade depende da Eucaristía, e como esta non é posible sen sacerdotes, estes tamén fan posible o futuro. O cardeal Cañizares referiuse tamén á celebración eucarística fóra da Misa sinalando que desde o ano 2000 vese un rexurdir masivo en moitas partes do mundo da adoración perpetua.

 

A %d blogueros les gusta esto: