Vida e actualidade da Diocese de Lugo
O Arquivo Histórico Diocesano e o Central Parroquial (situados no Pazo Episcopal) permanecerán pechados durante o mes de agosto.
A súa actividade reiníciase o día 2 de setembro, co seguinte horario: 10 a 13.30 h de luns a venres (o sábado permanecerá sempre pechado).
Entre os días 15 e 26 de xullo Cáritas organiza o XIX Campamento Urbano para nenos de 8 a 13 anos. Trátase dunha actividade en Lugo e para Lugo, co fin de coñecer a cidade a través de excursións, xogos, obradoiros, deporte, festa. A base das actividades é no Colexio María Auxiliadora e o horario: de 10 a dúas e polas tardes de catro a oito.
O pasado martes día 9 de xullo, os Directores dos COF’s existentes nas dioceses galegas, Santiago, Lugo e Ourense, reuníronse para iniciar un camiño común. O lugar escollido foron os salóns parroquias de Silleda. O obxectivo era coñecerse, e tomar contacto de cara a unha coordinación, axuda mutua, derivación e formación común. Foi un encontro distentido e agradable. Estiveron por Santiago, D. Luis García Bernadal; por Ourense, D. Carlos González Prieto, e por Lugo o Director do COF Diocesano, D. Martiño Rodríguez-González. Espérase que desta colaboración poida haber máis capacidade aínda para servir ás familias das igrexas locais e no territorio onde elas camiñan.
O COF de Lugo está na rúa Ángel López Pérez, 12, local J
As Delegacións de Pastoral Vocacional de Galicia organizan en Porto do Son o XII Campamento Monagos de Galicia.
Será do 12 ao 18 de xullo para nenos e nenas que participen habitualmente nas actividades das parroquias.
De cada Diocese galega poden ir ata 20 rapaces.
O Bispo da Diocese de Lugo, Mons. Alfonso Carrasco Rouco, presidiu unha Eucaristía na igrexa de San Xurxo, en Ribeira de Piquín. Tratábase de celebrar os traballos de restauración que se levaron a cabo nos últimos anos.
Nos anos 1960 fixérase a anterior actuación de relevancia na igrexa. Desde entón, só se reparara a cuberta.
Polo ano 2006 nacía a Asociación de Amigos da Parroquia de San Xurxo, en Ribeira de Piquín, co único fin de lograr os fondos necesarios para restaurar a súa igrexa, unha edificación neoclásica de 1782. A entidade está formada por máis de cen socios, a metade deles residentes fóra do municipio.
Ao longo de 2009 Blanca Besteiro restaurou o altar maior, presidido pola Virxe de Guadalupe, patroa da parroquia, e San Xurxo, no alto. Despois actuou sobre o retablo da Virxe do Carme e sobre unha pintura sobre cobre da virxe de Guadalupe, valiosa peza. Para a mellora dos altares de San Roque, a Dolorosa e o Rosario o Bispado de Lugo achegou 12.000 euros. Tamén se renovaron o chan de madeira e os bancos.